From Wikipedia, the free encyclopedia
Un nino ye un ser houmano ne l'ampeço de sou zambolbimiento. San chamados recén-nacidos de l nacimiento até un més d'eidade; bebé, antre l segundo i l décimo-uitabo més, i nino quando ténen antre dezoito meses até duoze anhos d'eidade. L galho de la medecina que cuida de l zambolbimiento físico i de las malinas i/ó traumas físicos ne ls ninos ye la pediatria.
Antes de l seclo XV, l nino era bisto cumo un adulto an meniatura. Nun eisistia, inda, ua cuncepçon d'anfáncia defenida. Ls ninos éran debrebe antroduzidas ne l mundo de ls adultos, chegando até la séren bestidas cumo eilhes. La falta dua eideia d'anfáncia, ampossibelitou, por muitos anhos, la criaçon de dreitos i deberes própios pa ls ninos, cunsidrando sues caratelísticas i fases de zambolbimiento[1].
Ls aspetos psicológicos de l zambolbimiento de la personalidade, cun persença ó nun de trastornos de l cumportamiento, de trastornos emocionales i/ó persença de neurose anfantil — ancluídos to orde de caréncias, negligéncias, bioléncias i abusos, que nun ls deixa "funcionar" saudabelmente, cula alegrie i antrisses que les son natural — recíben l'atençon de la Psicologie Clínica Anfantil (Psicólogos), atrabeç de la Psicoterapie Lúdica. Ls aspetos cognitibos (anteletual i social) ye rializada pula Pedagogie (Porsores), nas formalidades de la bida scolar, zde la pré-scuola, als cinco anhos d'eidade, ó até antes, als 3 anhos d'eidade.
L'anfáncia ye l período que bai zde l nacimiento até aprossimadamente l décimo-segundo anho de bida dua pessona. Ye un período de grande zambolbimiento físico, marcado pul gradual crecimiento de l'altura i de l peso de l nino — specialmente ne ls purmeiros trés anhos de bida i durante la puberdade. Mais de l qu'esto, ye un período adonde l ser houmano zambolbe-se psicologicamente, ambolbendo graduales mudanças ne l cumportamiento de la pessona i na adquesiçon de las bases de sue personalidade, cinco anhos d'eidade, ó até antes, als 3 anhos d'eidade.
L'anfáncia ye un período adonde hai grande zambolbimiento de l nino, debe-se sclarecer qu'eilhes inda nun ténen maturidade psicológica suficiente para séren cunsidradas adolescentes, mesmo tenendo sou porte físico. De l nacimiento até l'ampeço de l'adolescéncia ls pais son ls percipales modelos de l nino, cun quien eilhes daprenden, percipalmente por eimitaçon. Filhos de pais que ls abusan ó negligencian tenden a sofrer de bários porblemas psicológicos, anclusibe, depresson. La percipal atebidade de ls ninos son las brincadeiras, las quales son respunsables por stimular l zambolbimiento de l'anteleto anfantil, la cordenaçon motora i dibersos outros aspetos amportantes al zambolbimiento pleno de l nino[2].
Segundo l Statuto de l Nino i de l Adolescente, ua pessona ye cunsidrada nino de l nacimiento até ls 12 anhos ancumpletos.
Neste stágio, l bebé ye totalmente dependente de terceiros (giralmente, de ls pais) para qualesquiera cousas cumo lhocomoçon, alimentaçon ó higiene. Neste período, l bebé daprende atos básicos de lhocomoçon cumo sentar, angatinhar, andar. Recomenda-se l'aleitamiento materno sclusibo até que l sesto més de bida; esso porque l lheite materno ten ua cumposiçon mais adequada i eisige cuidados mais simples an relaçon a outros tipos de lheite, bien cumo ten anticorpos i outros fatores para proteger l lhatente d'anfeçones, i inda fortalece la relaçon antre la mai i sou filho. Causo haba ampecilho ó, raramente, contra-andicaçon, al aleitamiento materno, lheites sustitutos cumo de baca, cabra ó soja puoden ser ousados, para alhá de lheites de baca modificados para tener cumposiçon mais semelhante al houmano. Esses lheites, mas, ténen maior risco d'anduzir alergies na nino (specialmente ls lheites animales in natura), i eisigen suplementaçon de nutrientes cumo fierro ó ácido fólico, sceto aqueilhes que ténen adiçon de bitaminas. Passado l sesto més de bida, la dieta alimentar dun bebé ampeça a bariar, cula antroduçon lhenta i gradual de nuobos alimientos.
Neste stágio l nino crece menos de l que durante ls purmeiros 18 meses de bida, yá puode correr ua cúrtie çtáncia por si mesma, comer sin l'ajuda de terceiros, falar alguas palabras que ténen seneficado (por eisemplo, mai, pai, bola, etc), i la spetatiba ye que l nino cuntine a melhorar estas halbelidades.
L percipal aspeto desta faixa etária ye l zambolbimiento gradual de la fala i de la lhenguaige. Als trés anhos d'eidade, l nino yá puode formar alguas frases cumpletas (i corretas gramaticalmente) usando palabras yá daprendidas, i ten un bocabulairo d'aprossimadamente 800 a mil palabras. Lhentamente passa a cumprender melhor l mundo a la sue buolta, i a daprender que neste mundo hai regras que percisan ser oubedecidas, ambora inda seia bastante eigocéntrica — quemumente bendo outras pessonas mais cumo oubjetos de l que pessonas, nun sabendo qu'estas possuen sentimientos própios. Assi sendo, l nino muitas bezes prefire brincar solico a brincar cun outros ninos de la mesma faixa etária. Ne l final desta faixa etária, un nino giralmente yá sabe defrenciar pessonas de l sexo masculino i pessonas de l sexo femenino, i tamien yá ampeça a tener sues própias preferéncias, cumo roupas i antretenimientos, por eisemplo. Puode tamien ser capaç de se bestir sin l'ajuda de terceiros, i d'antecipar acuntecimientos.
Ninos desta faixa etária ampeçan a zambolber ls aspetos básicos de respunsabelidade i d'andependéncia, preparando l nino pa l próssimo stágio de l'anfáncia i ls anhos eniciales de scuola. Ls ninos desta faixa etária son altamente atibos an giral, custantemente splorando l mundo a la sue buolta. Ls ninos passan tamien a daprender que na sociadade eisisten cousas qu'eilhes puoden ó nun fazer.
Nesta faixa etária, l nino yá cumprende melhor l mundo a la sue buolta , tornando-se als poucos menos eigocéntrico i melhor cumprendendo que sues açones puoden afetar las pessonas a la sue buolta. Tamien passan a cumprender qu'outras pessonas tamien possuen sous própios sentimientos. Assi sendo, ls ninos als poucos daprenden subre l'eisisténcia de padrones de cumportamientos, açones que puoden ó dében ser feitas, i açones que nun dében ser feitas. Ls pais de l nino son ls percipales modelos de l nino nesta faixa etária. Giralmente detreminan se ua dada açon de l nino fui buona ó mala, muitas bezes recumpensando l nino pulas sues buonas açones i castigando l nino pulas sues malas açones.
Ninos, a partir de ls trés anhos d'eidade, tamien passan a daprender padrones de cumportamiento dun porcesso chamado eidantificaçon. Ls ninos passan a se eidantificar cun outra pessona por causa de bários motibos, ancluindo laços d'amisade (un amigo ó ua pessona próssima cumo outro pariente ó ua babá, por eisemplo) i semelhanças físicas i psicológicas. Tamien a partir de ls trés anhos d'eidade que ls ninos passan a ber defrenças antre pessonas de l sexo masculino i femenino, tanto ne ls aspetos físicos quanto ne ls aspetos psicológicos, cumo ls stereótipos dados a ambos ls sexos pula sociadade (eisemplos: nino brinca cun bola, nina brinca cun boneca).
La grande maiorie de ls ninos abandona las fraldas nesta faixa etária. A partir de ls trés anhos d'eidade, l nino crece lhentamente, an cuntreste cul crecimiento acelerado ocorrido zde l nacimiento até ls dezoito meses de bida. Ninos i ninas ténen peso i altura semelhantes.
L período antre cinco a nuobe anhos d'eidade ye marcado pul zambolbimiento psicológico de l nino. Este cuntina a se zambolber fesicamente, lhenta i als poucos, mas arriba de todo eilhes se zambolben i amadurecen socialmente, emocionalmente i mentalmente.
Na maiorie de las sociadades, ls ninos yá daprendírun regras i padrones de cumportamiento básicos de la sociadade por buolta de l quinto anho de bida. Eilhes daprenden anton la çcernir se ua dada açon ye cierta ó errada. La bida social de l nino passa a ser cada beç mais amportante, i ye quemun nesta faixa etária l que se chama de l melhor amigo (la melhor amiga).
Na maiorie de ls países, ninos percisan ir a la scuola, giralmente a partir de l sesto ó de l sétimo anho de bida. Nesta faixa etária, regras básicas de la sociadade son mais bien cumprendidas. Eiqui, ye dada énfase a la capacidade de resoluçon de porblemas, ua halbelidade que ye aperfeiçoada cul passar de l tiempo. La racionalizaçon tamien ye ua halbelidade que ye daprendida i custantemente melhorada. Até l quinto ó sesto anho de bida, ls ninos muitas bezes percuran resulber porblemas atrabeç de la purmeira soluçon — cierta ó nó, racional ó nó — que ben a la sue minte. Passado l quinto ó l sesto anho de bida, l nino passa percurar por dibersas soluçones, i a recoincer la soluçon correta ó aqueilha que mais se aplica al solucionamiento de l porblema.
Por buolta de ls siete ó uito anhos d'eidade, ls ninos passan a racionalizar sous pensamientos i sues fés, percurando las rezones, ls porqueis por trás dun porblema ó dun fato. Assi, ls própias ninos passan a analisar ls padrones de cumportamiento ansinados pula família i sociadade. Para alhá desso, a partir de ls seis anhos d'eidade, ls ninos passan la se acumparar cun outros ninos de la mesma faixa etária. Estes dous fatos, aliados al crecimiento de la bida social de l nino, diminuen l'amportança de ls pais i de la família cumo modelos de cumportamiento de l nino, i oumentan l'amportança de ls amigos i de ls porsores.
La cumparaçon qu'un dado nino faç de si mesmo a l'outro tamien afeta a outo-eimaige i a outo-stima de l nino — l'oupenion qu'ua pessona ten de si mesma. L tipo d'outo-eimaige formada durante l'anfáncia puode anfluenciar l cumportamiento desta pessona na adolescéncia i na bida adulta. Ls ninos passan a zambolber a outo-eimaige passado ls trés anhos d'eidade, a la medida que ls ninos se eidantifican cun sous pais, parientes, i mais tarde, pessonas próssimas. Esta outo-eimaige puode ser positiba ó negatiba, dependendo de las atitudes i de las emoçones de las pessonas culas quales l nino se eidantifica. Ninos cun outo-eimaiges positibas giralmente possuen buonas ampressones de sous pais i ua atiba bida social; por outro lhado, outo-eimaiges negatibas questuman ser fruito de famílias çfuncionales, adonde l relacionamiento antre sous nembros seia porblemático. La cumparaçon qu'un nino faç an relaçon l'outros ninos puode altarar esta outo-eimaige. Para alhá desso, bários outros fatores puoden anfluenciar l cumportamiento dun nino, cumo abuso anfantil, porblemas sócio-psicológicos (bítima d'agresson na scuola, por eisemplo) i eibentos marcantes (perda dun pariente ó amigo, por eisemplo).
Ls dientes de lheite ampeçan a caer ne l sesto anho de bida, un por un, até l'adolescéncia. L crecimiento de peso i altura ye pequeinho i semelhante antre ninos i ninas, que cuntinan a tener peso i altura semelhantes. Quanto a la fuorça física, an teorie, ninos i ninas desta faixa etária ténen fuorça física semelhante, mas ninos, por giralmente séren mais ancentibados pula sociadade a participar d'atebidades físico-sportistas, tenden a tener un pouco mais de fuorça física de l que las ninas.
Faixa etária que bai zde l décimo anho de bida ye época d'antensas mudanças físicas i psicológicas: ye la chamada pré-adolescéncia. L nino nesta faixa etária passa a cumprender mais la sociadade, ordes sociales i grupos, l que torna esta faixa etária ua ária anstable de zambolbimiento psicológico.
La participaçon nun grupo d'amigos que possuen gustos an quemun passa a ser de maior amportança pa l nino, adonde l modelo dado puls amigos ampeça a ouscurecer l modelo dado puls pais. Ampeçan las preocupaçones cumo la spetatiba de ser aceito por un grupo, ó ciertas defrenças an relaçon l'outras ninos de la mesma faixa etária se agrában eiqui, i son un aspeto de maior amportança na adolescéncia. Muitas bezes, pré-adolescentes senten-se rejeitados pula sociadade, podendo zamcadear porblemas psicológicos tales cumo depresson ó anorexia.
La pré-adolescéncia ye marcada pul ampeço de las antensas trasformaçones físicas que trasforman l nino nun adulto; ye l'ampeço de la puberdade, marcada percipalmente pul oumiento de l ritmo de crecimiento corporal i pul amadurecimiento de ls uorgones sexuales.
La puberdade pa las ninas chega antre l 10º i l 12º anho de bida, adonde ls purmeiros puls pubianos i nas axilas aparecen, ben la purmeira (ls quadris ampeçan la se formar i depuis ben ls tetas i depuis l ciclo de a pinganielho). Neste período, las ninas passan, an média, a ser mais altas i mais pesadas que ls ninos, adonde la puberdade inda nun ampeçou. L'amadurecimiento de ls uorgones sexuales ampeça-se giralmente depuis, ne l 11º al 14º anho de bida.
Solamente mais tarde, ne l 11º al 14º anhos de bida, la puberdade ampeça pa ls ninos, ampeço dun alto crecimiento físico (an altura, peso i fuorça muscular), crecimiento de puls pubianos i nas axilas i angrossamiento de l timbre de boç. Cul pico de l crecimiento físico de la maiorie de las ninas yá habendo treminado, ls ninos passan delantre de las ninas, defenitibamente, an peso, altura i fuorça muscular. L'amadurecimiento de ls uorgones sexuales dá-se giralmente depuis, ne l 14º al 15º anho de bida.
Alguns grupos de pessonas nun aceitan essa classeficaçon, colocando ls pré-adolescentes yá cumo adolescentes.
Ls ninos d'ambos ls sexos crecen an altura por eigual até ls nuobe — onze anhos anhos d'eidade, quando l'ampeço de la puberdade nas ninas faç cun qu'eilhas se tornen, na média, mais altas de l que ls ninos, até ls duoze anhos d'eidade, quando la puberdade ten ampeço ne ls ninos, cula altura i l peso médio de ls ninos superando ls de las ninas. Un nino ó ua nina de nuobe anhos ten an média antre 130 a 140 centímetros d'altura, ne ls Stados Ounidos. Quanto a la massa corporal, l peso médio de ls ninos ye antre 25 a 37 quilogramas, anquanto l peso médio de las ninas ye giralmente un pouco menor — possiblemente por causa de stereótipos ampuostos pula sociadade, ambora alguns specialistas cren que defrenças genéticas stéian por trás desta defrença. Un nino ó ua nina nun ye necessariamente anormal se sou peso i/ó altura son maiores ó menores de l que la média.
Un assunto mui çcutido son las defrenças psicológicas antre ninos i ninas ne l que se refire a l'eidantidade sexual. Anquanto la maiorie de ls psicólogos acraditan que las defrenças psicológicas antre ambos ls sexos seia detreminada primariamente pul ambiente adonde l nino bibe i puls stereótipos ampuostos a l nino pula sociadade, alguns specialistas, primariamente geneticistas, cunsidran que la genética ten maior peso nestas defrenças.
Las defrenças d'anteligéncia antre defrentes ninos son feitas atrabeç de testes de quociente d'anteligéncia. Tales testes serben para andicar l'halbelidade mental ne l giral dun nino an relaçon a la média d'outros ninos de la mesma eidade. La média ye eigual a 100. La performance de l nino ne l teste ye pontuada. Cerca de dous terços de ls ninos son cunsidradas normales (pontuaçon antre 84 a 116). Un sesto pontuan mais de l que 116, i son cunsidrados super-dotados. Un sesto de ls ninos pontuan menos de que 84, neste causo, la persença dua deficiéncia mental (i muitas bezes permanente — cun bários graus de seberidade) ye cunsidrada — ambora bários ninos pontuen menos de l que la média por causa de porblemas psicológicos.
Ls testes de quociente d'anteligéncia son ousados specialmente pa l'ajuda de l diagnóstico de porblemas neurológicos ó psicológicos, i tamien an testes que bisan al studo de la genética, sou papel ne l zambolbimiento dua pessona i ne l sou papel de l zambolbimiento de las defrenças antre defrenças psicológicas antre dibersas pessonas. La pontuaçon de pessonas relacionadas geneticamente (ó seia, possuen laços de família) que fazirun pul quociente d'anteligéncia giralmente difíren menos de l que las defrenças antre la pontuaçon de pessonas nun relacionadas geneticamente, l que sugere que la genética ten un peso cunsidrable — se nun manjoritairo — na halbelidade mental dua pessona. Mas, outros specialistas acraditan que ye l'ambiente ne l qual l nino bibe que ye l fator primairo na formaçon psicológica i de l'halbelidade mental. Estes specialistas fázen uso de studos antre ninos culturalmente pribados — ninos que son criados sin ls stímulos necessairos que las ajudan na eiducaçon scolar i/ó que sofren d'abuso anfantil, i que possuen ne l giral un quociente d'anteligéncia menor de l que la média. L quociente d'anteligéncia destes ninos, ne ls studos rializados, oumentou mui passado recebíren cuidados speciales.
Yá outros specialistas questionan l'uso destes testes, i que tales testes nun son eficientes para medir l'halbelidade mental i l'anteligéncia cumo un to dun nino. Estes specialistas alegan que l'anteligéncia ambolbe bários fatores - mimória, lhógica i ouriginalidade, por eisemplo, i qu'ua nino puode çtacar-se nua ó mais árias anquanto sofre deficuldades an outras.
Ls pais dua ninn possuen un papel fundamental ne l zambolbimiento psicológico de l nino, para alhá de séren ls respunsables pula sustentaçon del. Ua de las percipales preocupaçones de ls pais ye ajudar l nino an zambolbimiento a crecer normalmente. La palabra normal ten dous sentidos, quando relacionada cul zambolbimiento anfantil. La purmeira deilhas ye l'auséncia d'anormalidades físicas i/ó psicológicas, que son cunsidradas anormales an to sociadade i cultura. Estas anormalidades ancluen eipilepsia, squizofrenia i malinas genéticas. La maiorie destas malinas surge por motibos que nun relacionados cula forma cul qual ls pais criórun l nino.
La segunda defeniçon — adonde ls pais possuen grande anfluéncia — ye se l nino ten ciertas halbelidades ó traços, alguas deilhas balorizadas puls pais, outras balorizadas pula sociadade adonde l nino bibe. Un nino ye cunsidrada normal se el ten estas caratelísticas. Alguas destas caratelísticas balorizadas anternacionalmente ancluen bibir amigabelmente cun outras pessonas, agir anteligentemente i de maneira respunsable, i la quemunicaçon. Estas radadeiras halbelidades son eissenciales pa la bida dua pessona drento dua sociadade, i ls pais possuen grande anfluéncia ne l zambolbimiento destas caratelísticas. Ls pais tamien ténen papel crucial an ansinar a ls ninos, zde tenra eidade, a lhidar cun traços cumo baidade, acanhamiento i ciúmes[3]. Ninos bítimas de negligéncia ó d'abuso anfantil (por parte de ls pais), por eisemplo, muitas bezes se cumportan de maneira agressiba ó mui retraída cun outras pessonas, por eisemplo.
Yá outras halbelidades i traços son balorizados solo por ciertas culturas. Por eisemplo, ne ls países zambolbidos i an bários países an zambolbimiento, spera-se de l nino qu'el daprenda eibentualmente a lher i a screbir. Un nino ancapaç d'adquirir esta halbelidade puode ser bisto cumo anormal. Mas, an bários países an zambolbimiento, spera-se muitas bezes qu'un nino ajude sous pais a aguantar sue família. Tales ninos son cunsidrados muitas bezes normales — na sociadade adonde eilhes biben — se eilhes adquiren las halbelidades neçairas para trabalhar i aguantar la sue família, bien cumo nun son bistos cumo anormales se nó saben lher i screbir. Ciertas culturas cumo la "cultura oucidental" bénen l sexo masculino i l sexo femenino cumo eiguales — ambos possuen ls mesmos dreitos — i ninos i ninas son criados eigualmente. Yá an outras culturas, traços cunsidrados masculinos — cumo andependéncia i cumpetitebidade — son cunsidrados anormales antre mulhieres, i, antoce, ninos muitas bezes son ancentibados puls pais a tener tales traços, anquanto tales traços antre ninas son reprimidos.
Ls pais son specialmente respunsables an cuidar de l nino i de sues necidades físico-psicológicas, de l'uso de recumpensas i puniçones, i cumo modelos de cumportamiento. An muitos causos adonde hai omisson de ls pais an tenermos d'afeto i relacionamiento ls ninos puoden zambolber sérios porblemas emocionales.
Todos ls ninos possuen alguas necidades físico-psicológicas que percisan ser cumpridas i atendidas para que l nino cresça normalmente.
La percipal necidade física de l nino ye l'alimentaçon, de la qual ls ninos son totalmente dependentes de ls adultos ne ls purmeiros anhos de bida. Outras necidades físicas amportantes son lhimpeza i higiene, bestuairo adequado i un abrigo. Spácio tamien ye amportante — pa l'eisercício de jogos i brincadeiras. Para alhá desso, l nino tamien depende de ls adultos quanto al daprendizado de buonos hábitos de cumportamiento, tanto a la sociadade que l cerca quanto la si mesmo — mantendo ua higiene adequada, por eisemplo, lhabando las manos antes de comer, nun comer nada que tenga caído ne l suolo, scobar ls dientes diariamente, etc.
L zambolbimiento de las bacinas diminuiu bastante las taxas de mortalidade anfantil an muitos países — specialmente an malinas cumo sarampo, paralesia anfantil i baríola (esta radadeira yá zaparecida). An muitos países, ls pais son oubrigados a bacinar l nino, pul menos contra ciertas malinas cumo sarampo, paralesia anfantil, tuberculose, tétano i difterie, por eisemplo. Causo ls pais nun lheben ls ninos a postos de bacinaçon, ls ninos poderán ser suspensos de la scuola, i an causos mais grabes, ls pais puoden perder la guarda de l nino. Alguas destas bacinas requíren reimunizaçon — l'aplicaçon dua nuoba dose de la bacina — regularmente.
Las necidades psicológicas de l nino son detreminadas pulas halbelidades i puls traços de personalidade que ls pais spírun que sou filho zambolba. Alguas destas son ancentibadas an to sociadade, outras solo an ciertas culturas. Todos ls ninos possuen ciertas necidades psicológicas — cumo sentir-se amados i queridos puls pais.
Spera-se mais respunsabelidade i maturidade de l nino quando este passa a ir a la scuola regularmente — a partir de ls seis ó siete anhos d'eidade. Ls ninos passan a frequentar regularmente un lhugar adonde regras eisisten, que dében ser cumpridas — i adonde ls padrones de cumportamiento nun mudan dun die pa l'outro.
Muitos ninos (percipalmente an países subzannbolbidos) spurmentan dibersos porblemas cumo alimentaçon reduzida ó zequelibrada (znutriçon), trabalho anfantil, auséncia d'habitaçon, SIDA, antre outros. Cul oubjetibo de solucionar estes porblemas la UNICEF promobe dibersas campanhas de recolhimiento de fondos monetairos para poder apoiá-las nesses países.