![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/7/72/Surveyor_1_launch.jpg/640px-Surveyor_1_launch.jpg&w=640&q=50)
Fogueton
From Wikipedia, the free encyclopedia
Un fogueton ye ua máquina que se çloca spelindo atrás de si un fluxo de gáç a alta belocidade. Por cunserbaçon de la cantidade de mobimiento (massa multiplicada por belocidade), l fogueton çloca-se ne l sentido cuntrário cun belocidade tal que, multeplicada pula massa de l fogueton, l balor de la cantidade de mobimiento ye eigual al de l gases spelidos.
![Thumb image](http://upload.wikimedia.org/wikipedia/commons/thumb/7/72/Surveyor_1_launch.jpg/640px-Surveyor_1_launch.jpg)
Por stenson, l beiclo, giralmente spacial, que ten motor(es) de porpulson deste tipo ye chamado fogueton ó míssel. Normalmente, l sou oubjetibo ye ambiar oubjetos (specialmente satélites arteficiales i sondas spaciales) i/ó foguetones i homes al spácio (beija atmosfera).
Un fogueton ye custituído por ua strutura, un motor de porpulson por reaçon i ua carga útele. La strutura sirbe para albergar ls tanques de cumbustible i ouxidante (cumburente) i la carga útele. Chama-se tamien "fogueton" al motor de porpulson solo.
Eisisten bárias formas de forçar ls gases de scape para fuora de l fogueton cun einergie que chegue para cunseguir porpulsionar l fogueton pa la frente (e.y., bários tipos de motor de fogueton). L tipo mais quemun, que anclui todos ls foguetones que eisisten atualmente i que bolórun até hoije, son ls chamados foguetones químicos, que funcionan lhibartando la einergie química cuntenida ne l sou cumbustible atrabeç de porcesso de cumbuston. Estes foguetones necessitan de transportar tamien un cumburente para fazer reagir cul cumbustible. Esta mistura de gases subreaquecidos ye depuis spandida nua tubeira dibergente, la tubeira de Laval tamien coincida cumo tubo de Bell, por forma a direcionar l gáç an spanson para trás, i assi cunseguir ampurrar l fogueton pa la frente.
Eisisten inda assi outros tipos de motor, por eisemplo ls motores nuclears térmicos, que subrecalécen un gáç até altas temperaturas, bumbardeando-lo cun neutrones de l decaimiento de l sou cumbustible nuclear. Esse gáç ye depuis spandido na tubeira cumo ne ls foguetones químicos. Estes tipo de fogueton fui zambolbido i testado ne ls Stados Ounidos durante la década de 60 de l seclo passado, mas nunca chegou a ser outelizado. Ls gases spelidos por este tipo de fogueton son radioatibos, l que zaconselha l sou uso drento de la atmosfera terrestre, mas puoden ser outelizados fura deilha. Este tipo de fogueton ten la bantaige de premetir eificiéncias mui superiores a las de ls foguetones químicos cumbencionales, ua beç que premíten acelerar ls gases de scape a belocidades mui superiores.