Ciéncia política
From Wikipedia, the free encyclopedia
Ciéncia política ye l studo de la política — de l sistemas políticos, de las ourganizaçones i de l porcessos políticos. Ambolbe l studo de la estrutura (i de las mudanças de strutura) i de ls porcessos de gobierno — ó qualquiera sistema eiquibalente de ourganizaçon houmana que tente assegurar sigurança, justícia i dreitos cebiles. Ls cientistas políticos puoden studar anstituiçones cumo corporaçones( ó ampresas, ne l Brasil), ouniones (ó sindicatos, ne l Brasil), eigreijas, ó outras organizaçones cujas struturas i porcessos de açon se aprossímen dun gobierno, an cumplexidade i anterlhigaçon.
Eisiste ne l anterior de la ciéncia política ua çcusson acerca de l oubjeto de studo desta ciéncia, que, para alguns, ye l Stado i, para outros, l poder. La purmeira posiçon restringe l oubjeto de studo de la ciéncia política; la segunda amplia. La posiçon de la maiorie de ls cientistas políticos, segundo Maurice Duberger, ye essa bison mais abrangente de que l oubjeto de studo de la ciéncia política ye l poder.
L palabra "ciéncia política" fui cunhada an 1880 por Heirbert Baxter Adams, porsor de Stória de la Ounibersidade Johns Hopkines.
La ciéncia política ye la teorie i prática de la política i la çcriçon i análeze de l sistemas políticos i de l cumportamiento político.
La ciéncia política abrange dibersos campos, cumo la teorie i la filosofie políticas, ls sistemas políticos, eideologie, teorie de l jogos, eiquenomie política, geopolítica, geografie política, análeze de políticas públicas, política cumparada, relaçones anternacionales, análeze de relaçones steriores, política i dreito anternacionales, studos de admenistraçon pública i gobierno, porcesso lhegislatibo, dreito público (cumo l dreito custitucional) i outros.
La ciéncia política amprega dibersos tipos de metodologie. Las abordaiges de la deciplina ancluen la filosofie política clássica, anterpretacionismo, struturalismo, behabiorismo, racionalismo, rialismo, pluralismo i anstitucionalismo. Na qualidade dua de las ciéncias sociales, la ciéncia política usa métodos i técnicas que puoden ambolber tanto fuontes purmárias (decumientos stóricos, registros oufeciales) quanto secundárias (artigos académicos, pesquisas, análeze statística, studos de causo i custruçon de modelos).