Biologie
From Wikipedia, the free encyclopedia
La biologie ye l ramo de la Ciéncia que studa ls seres bibos (de l griego βιος - bios = bida i λογος - logos = studo, ó seia l studo de la bida). Trata de las caratelísticas i l cumportamiento de l ourganismos, la ourige de speces i andebíduos, i la forma cumo estes anteraige uns culs outros i cul sou ambiente. La biologie ye un spetro amplo de árias académicas frequentemente cunsidradas deciplinas andependientes, mas que, ne l sou cunjunto, studan la bida nas más bariadas scalas.
La bida ye studada a la scala atómica i molecular pula biologie molecular, pula bioquímica i pula genética molecular, al nible de la célula pula biologie celular i a la scala multicelular pula fisiologie, pula anatomie i pula stologie. La biologie de l zambolbimiento studa la bida al nible de l zambolbimiento ó ountogenia de l Ourganismo andibidual.
Chubindo na scala para grupos de más que un Ourganismo, la genética studa cumo funciona la heireditariedade antre porgenitores i la sue çcendéncia. La eitologie studa l cumportamiento de l andebíduos. La genética populacional trabalha al nible de la populaçon, anquanto que la sistemática trabalha cun linhaiges de muitas speces. Las lhigaçones de andebíduos, populaçones i speces antre si i culs sous habitats son studadas pula eicologie i pula biologie eibolutiba. Ua nuoba ária, altamente speculatiba, la astrobiologie (ó xenobiologie) studa la possiblidade de bida para alhá de l nuosso planeta. La biologie clínica custitui la ária specializada de la biologie porfissional, para Diagnose an salude i calidade de bida, de ls porcessos ourgánicos eiticamente cunsagrados.