![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/e/e2/Timeline_of_Saint_Thomas_Christian_denominations.svg/langml-640px-Timeline_of_Saint_Thomas_Christian_denominations.svg.png&w=640&q=50)
പുത്തങ്കൂറ്റുകാർ
മാർത്തോമാ നസ്രാണികളിലെ അന്ത്യോഖ്യൻ സുറിയാനി വിഭാഗം / From Wikipedia, the free encyclopedia
മലബാറിലെ മാർത്തോമാ നസ്രാണികളുടെ ഇടയിൽ പതിനേഴാം നൂറ്റാണ്ടിൽ ഉണ്ടായ ഭിന്നിപ്പിനേത്തുടർന്ന് രൂപപ്പെട്ട രണ്ട് വിഭാഗങ്ങളിൽ ഒന്നാണ് പുത്തങ്കൂർ അഥവാ പുതിയകൂർ. ഈ വിഭാഗത്തിൽ ഉൾപ്പെട്ടവർ പുത്തങ്കൂറ്റുകാർ എന്നറിയപ്പെട്ടു. മറുവിഭാഗം പഴയകൂർ എന്നും അറിയപ്പെട്ടു.[1][2][3][4] കിഴക്കിന്റെ സഭയുടെ ഭാഗമായിരുന്ന നസ്രാണികൾ പതിനാറാം നൂറ്റാണ്ടിൽ കത്തോലിക്കാ സഭയുടെ ഭാഗമായി മാറിയിരുന്നു. 1599ലെ ഉദയംപേരൂർ സൂനഹദോസിനും അതിനേത്തുടർന്ന് 1653ൽ അരങ്ങേറിയ കൂനൻ കുരിശുസത്യത്തിനും ശേഷം കത്തോലിക്കാ സഭയിൽ നിന്ന് വിഘടിച്ച പുത്തങ്കൂറ്റുകാർ അന്ത്യോഖ്യൻ സുറിയാനി ഓർത്തഡോക്സ് പാത്രിയർക്കീസുമായി ബന്ധം സ്ഥാപിച്ചു. അതുവരെ ആരാധനയിൽ ഉപയോഗത്തിലിരുന്ന കൽദായ ആചാരക്രമത്തിന് പകരം അന്ത്യോഖ്യൻ സുറിയാനി ആചാരക്രമവും ഓറിയന്റൽ ഓർത്തഡോക്സ് വിശ്വാസവും കാലക്രമേണ ഇവർ സ്വീകരിച്ചു.[5] മലങ്കര യാക്കോബായ സുറിയാനി ഓർത്തഡോക്സ് സഭ, മലബാർ സ്വതന്ത്ര സുറിയാനി സഭ, മലങ്കര മാർത്തോമ്മാ സുറിയാനി സഭ, മലങ്കര ഓർത്തഡോക്സ് സുറിയാനി സഭ, മലങ്കര സുറിയാനി കത്തോലിക്കാ സഭ എന്നിവ ഈ വിഭാഗത്തിന്റെ ആധുനിക പിന്തലമുറക്കാരാണ്. കൂനൻ കുരിശു സത്യത്തിന്റെ നേതാവായ പറമ്പിൽ മാർ തോമാ അർക്കദിയാക്കോന്റെ നേതൃത്വത്തിൽ ഇവർ നിലകൊണ്ടു.[6][7]
![Thumb image](http://upload.wikimedia.org/wikipedia/commons/thumb/e/e2/Timeline_of_Saint_Thomas_Christian_denominations.svg/640px-Timeline_of_Saint_Thomas_Christian_denominations.svg.png)