സാർ അലക്സാണ്ടർ മൂന്നാമൻ
From Wikipedia, the free encyclopedia
റഷ്യയിലെ സാർചക്രവർത്തിയായിരുന്നു അലക്സാണ്ടർ III. അലക്സാണ്ടർ II ന്റെയും മരിയ അലക്സാണ്ട്രോവ്നയുടെയും പുത്രനായി അലക്സാണ്ടർ അലക്സാന്ത്രോവിച്ച് 1845 മാർച്ച് 10-ന് സെന്റ് പീറ്റേഴ്സ്ബർഗിൽ ജനിച്ചു. സഹോദരൻ നിക്കോളാസ് 1865 ഏപ്രിൽ 24-ന് നിര്യാതനായതിനെത്തുടർന്ന് അലക്സാണ്ടർ ചക്രവർത്തിപദത്തിന് അവകാശിയായി. നിയമവും ഭരണനടത്തിപ്പും സംബന്ധിച്ച പരിശീലനം പൊബിഡൊനൊസ്റ്റ്സേവി (1827-1907) ൽനിന്ന് ഈ കാലത്ത് ഇദ്ദേഹത്തിന് ലഭിച്ചു. 1866 നവംബർ ഒൻപതിനു ഇദ്ദേഹം ഡെൻമാർക്കിലെ സോഫിയ ഫ്രഡറിക്ക് ഡാഗ്മർ രാജകുമാരി (മരിയ ഫെദറോവ്ന ചക്രവർത്തിനി)യെ വിവാഹം ചെയ്തു. റൂസ്സോ-തുർക്കി യുദ്ധക്കാലത്ത് ഇദ്ദേഹം ബൾഗേറിയൻ പ്രദേശത്ത് യുദ്ധത്തിലേർപ്പെട്ടു; ഇക്കാലത്ത് സംഘടിപ്പിക്കപ്പെട്ടതാണ് റഷ്യൻ വളണ്ടിയർ ഫ്ലീറ്റ്. ഇത് പിന്നീട് റഷ്യൻ നാവിക വാണിജ്യപ്പടയുടെ കേന്ദ്രബിന്ദുവായിത്തീർന്നു. പിതാവായ അലക്സാണ്ടർ II ന്റെ വധത്തെത്തുടർന്ന് 1881 മാർച്ച് 13-ന് അലക്സാണ്ടർ III റഷ്യൻ ചക്രവർത്തിയായി.