From Wikipedia, the free encyclopedia
കാഴ്ച മെച്ചപ്പെടുത്തുന്നതിനായി സാധാരണയായി കണ്ണിന് മുന്നിൽ (കണ്ണടയിൽ ഉൾപ്പെടുത്തിയോ കോണ്ടാക്റ്റ് ലെൻസ് ആയൊ) ധരിക്കുന്ന ലെൻസാണ് തിരുത്തൽ ലെൻസ് എന്ന് അറിയപ്പെടുന്നത്. മയോപിയ, ഹൈപ്പർമെട്രോപിയ, ആസ്റ്റിഗ്മാറ്റിസം, പ്രെസ്ബയോപ്പിയ എന്നിവ പോലെയുള്ള റിഫ്രാക്റ്റീവ് പിശകുകൾ ചികിത്സിക്കുക എന്നതാണ് ഏറ്റവും സാധാരണമായ ഉപയോഗം. കണ്ണിനു മുന്നിൽ അൽപം അകലെയായി കണ്ണട ധരിക്കുന്നു. കോൺടാക്റ്റ് ലെൻസുകൾ കണ്ണിന്റെ ഉപരിതലത്തിൽ നേരിട്ട് വെക്കുന്നു. തിമിരം നീക്കം ചെയ്തതിനുശേഷം സാധാരണയായി കണ്ണിനുള്ളിൽ വെക്കുന്ന ഇൻട്രാഒക്യുലർ ലെൻസുകളുടെ മറ്റൊരു രൂപം, തിമിരം ഇല്ലാത്തവരിൽ കാഴ്ച വൈകല്യങ്ങൾ പരിഹരിക്കുന്നതിന് ഉപയോഗിക്കാറുണ്ട്.
തിരുത്തൽ ലെൻസുകൾ സാധാരണയായി ഒരു നേത്രരോഗവിദഗ്ദ്ധനോ, ഒപ്റ്റോമെട്രിസ്റ്റോ നിർദ്ദേശിക്കുന്നവയാണ്. ലെൻസ് നിർമ്മിക്കുന്നതിന് ആവശ്യമായ എല്ലാ സവിശേഷതകളും കുറിപ്പടിയിൽ ഉൾപ്പെടുത്തിയിട്ടുണ്ടാകും. കുറിപ്പുകളിൽ സാധാരണയായി ഓരോ ലെൻസിന്റെയും പവർ സവിശേഷതകൾ ഉൾപ്പെടുന്നു (ഓരോ കണ്ണിനും). ക്വാർട്ടർ- ഡയോപ്റ്റർ ഘട്ടങ്ങളിൽ (0.25 ഡി) ആണ് ലെൻസ് ശക്തികൾ സാധാരണയായി നിർദ്ദേശിക്കപ്പെടുന്നത്, ഇതിന് കാരണം, സാധാരണയായി ചെറിയ ഇൻക്രിമെന്റുകൾ (ഉദാ. എട്ടാമത്തെ ഡയോപ്റ്റർ ഘട്ടങ്ങൾ / 0.125 ഡി) തമ്മിൽ വേർതിരിച്ചറിയാൻ കഴിയില്ല എന്നതാണ്. അനുചിതമായ തിരുത്തൽ ലെൻസുകളുടെ ഉപയോഗം കണ്ണുകൾക്ക് നല്ലതല്ല, ഇത് ബൈനോക്കുലർ വിഷൻ പ്രശ്നങ്ങൾ വർദ്ധിപ്പിക്കുകയും ചെയ്യും. ഐകെയർ പ്രൊഫഷണലുകൾ (ഒപ്റ്റോമെട്രിസ്റ്റുകളും നേത്രരോഗവിദഗ്ദ്ധരും) വ്യക്തമായ തിരുത്തൽ ലെൻസുകൾ നിർണ്ണയിക്കാൻ പരിശീലനം ലഭിച്ചവരാണ്. ശരിയായ തിരുത്തൽ ലെൻസുകൾ വ്യക്തവും സുഖകരവും കാര്യക്ഷമവുമായ കാഴ്ച പ്രദാനം ചെയ്യുകയും ഇരട്ട കാഴ്ച ഒഴിവാക്കുകയും ബൈനോക്കുലാരിറ്റി പരമാവധി വർദ്ധിപ്പിക്കുകയും ചെയ്യും.
ലെൻസുകൾ സാധാരണയായി ഒപ്റ്റോമെട്രിസ്റ്റുകളുടെയോ നേത്രരോഗവിദഗ്ദ്ധരുടെയോ നിർദ്ദേശ പ്രകാരം വാങ്ങേണ്ടവയാണ്. പക്ഷെ, അങ്ങനെയല്ലാതെയും ലെൻസുകൾ വാങ്ങാറുണ്ട്. ഉദാഹരണത്തിന് വെള്ളെഴുത്തിനുള്ള റെഡി-മെയ്ഡ് റീഡിങ്ങ് ഗ്ലാസുകൾ ആളുകൾ കുറിപ്പടിയില്ലാതെ സ്വയം വാങ്ങി ഉപയോഗിക്കാറുണ്ട്.
ഈ ഗ്ലാസുകൾ ഒരു വ്യക്തിയുടെ വ്യക്തിഗത ആവശ്യങ്ങൾക്കനുസൃതമായി നിർമ്മിച്ചവയല്ല എന്നതാണ് ഇത്തരം രീതിയുടെ പോരായ്മ. കണ്ണുകൾക്കിടയിലുള്ള റിഫ്രാക്റ്റീവ് പിശകിലെ വ്യത്യാസം അല്ലെങ്കിൽ അസ്റ്റിഗ്മാറ്റിസത്തിന്റെ സാന്നിധ്യം ഇത്തരം ലെൻസ് നിർമ്മാണത്തിൽ കണക്കാക്കില്ല. ദൂര കാഴ്ചയ്ക്ക് തിരുത്തൽ ലെൻസുകൾ ആവശ്യമുണ്ടെങ്കിൽ, വായനക്ക് മാത്രമുള്ള ലെൻസുകൾ ഫലപ്രദമാകണമെന്നില്ല. ഒരു നേത്രരോഗവിദഗ്ദ്ധനോ ഒപ്റ്റോമെട്രിസ്റ്റോ നിർണ്ണയിക്കുകയും യോഗ്യതയുള്ള ഒപ്റ്റീഷ്യൻ നിർമ്മിക്കുകയും ചെയ്യുന്ന കണ്ണടകൾ അല്ലെങ്കിൽ, അവ തലവേദനയ്ക്കും കാഴ്ച അസ്വസ്ഥതയ്ക്കും കാരണമായേക്കാം. പതിവ് നേത്ര പരിശോധനയിലൂടെ തിരിച്ചറിയുന്ന പല നേത്ര രോഗങ്ങളും കണ്ടെത്താനാകില്ല എന്നത് കണ്ണടകൾ സ്വയം തിരഞ്ഞെടുക്കുന്നതിന്റെ മറ്റൊരു പോരായ്മയാണ്.
സിംഗിൾ വിഷൻ ലെൻസുകൾ ഒരു ദൂരത്തേക്ക് ഉള്ള കാഴ്ചയ്ക്ക് മാത്രം ഉള്ളവയാണ്. ദൂരത്തേക്ക് കാഴ്ച ശരിയാക്കുകയാണെങ്കിൽ, അടുത്ത് കാണുന്നതിന് അക്കൊമഡേഷൻ ആവശ്യമായി വരും.
സമീപത്തുള്ള ജോലികൾക്കായി രൂപകൽപ്പന ചെയ്തിരിക്കുന്ന സിംഗിൾ വിഷൻ ലെൻസുകളാണ് റീഡിംഗ് ഗ്ലാസുകൾ. സിങ്കിൾ വിഷൻ റീഡിങ് ഗ്ലാസുകളിൽ, ഫ്രെയിമിൽ മുഴുവൻ പവർ വരുന്ന തരത്തിലുള്ള വലിയ കണ്ണടകളും, മൂക്കിന് മുകളിൽ സാധാരണ കണ്ണടകളേക്കാൾ താഴേക്ക് ഇറക്കി വെക്കുന്ന തരത്തിലുള്ള ചെറിയ കണ്ണടകളുമുണ്ട്. [1] ഇത്തരം കണ്ണടകൾ ഉപയോഗിക്കുമ്പോൾ ദൂരത്തേക്ക് വ്യക്തമായി കാണുന്നതിന് കണ്ണട മാറ്റുകയോ, കണ്ണടയ്ക്ക് മുകളിലൂടെ നോക്കുകയോ ചെയ്യണം.
ദൂരക്കാഴ്ചയ്ക്കുള്ളത് സമീപക്കാഴ്ചയ്ക്കുള്ളത് എന്നിങ്ങനെ ഒരു ലെൻസിൽ തന്നെ രണ്ട് ഭാഗങ്ങളുള്ള ലെൻസാണ് ബൈഫോക്കൽ എന്ന് അറിയപ്പെടുുന്നത്. സാധാരണയായി, ലെൻസിന്റെ മുകൾ ഭാഗം ദൂര കാഴ്ചയ്ക്കായി ഉപയോഗിക്കുന്നു, താഴത്തെ ഭാഗം സമീപ കാഴ്ചയ്ക്ക് ഉപയോഗിക്കുന്നു. സമീപത്തുള്ള കാഴ്ചയ്ക്കുള്ള ലെൻസിന്റെ ഭാഗം ആഡ് സെഗ്മെന്റ് എന്ന് വിളിക്കുന്നു. വെള്ളഴുത്ത് രോഗികൾ ഏറ്റവും കൂടുതലായി ഉപയോഗിക്കുന്നത് ഇത്തരം ലെൻസുകളാണ്.
രണ്ട് ഫോക്കൽ ഭാഗങ്ങളുടെ മധ്യഭാഗത്ത് മൂന്നാമത്തെ ഭാഗം (ഇന്റർമീഡിയറ്റ് ഫോക്കസ്) കൂടിയുണ്ട് എന്നതൊഴിച്ചാൽ ട്രൈഫോക്കൽ ലെൻസുകൾ ബൈഫോക്കലുകൾക്ക് സമാനമാണ്. ഇടയിലുള്ള സെഗ്മെന്റ് ദൂരക്കാഴ്ചയ്ക്കും അടുത്തു കാഴ്ചയ്ക്കും ഇടയിലുള്ള (ഉദാ. കമ്പ്യൂട്ടർ ദൂരം) കാഴ്ച ശരിയാക്കുന്നു. ഈ ലെൻസ് തരത്തിന് രണ്ട് സെഗ്മെന്റ് ലൈനുകളുണ്ട്, ഇത് ലെൻസിനെ മൂന്ന് വ്യത്യസ്ത സെഗ്മെന്റുകളായി വിഭജിക്കുന്നു.
പ്രോഗ്രസ്സീവ് അഡീഷൻ അല്ലെങ്കിൽ വേരിഫോക്കൽ ലെൻസുകൾ, ദൂരക്കാഴ്ചയ്ക്കുള്ള പവറിൽ നിന്ന് സമീപക്കാഴ്ചയ്ക്കുള്ള പവറിലേക്ക് ക്രമേണ കൂടി വരുന്ന തരത്തിലുള്ളവയാണ്. ഇത്തരം ലെൻസുകളിൽ സെഗ്മെന്റ് ലൈനുകൾ ഒഴിവാകുകയും, ഇന്റർമീഡിയറ്റ് ദൂരം ഉൾപ്പെടെ എല്ലാ ദൂരങ്ങളിലും വ്യക്തമായ കാഴ്ച സാധ്യമാകുകയും ചെയ്യുന്നു.[2] ശക്തിയിൽ പെട്ടെന്നുള്ള മാറ്റത്തിന്റെ അഭാവവും ലെൻസിന്റെ ആകർഷകമായ രൂപവും "നോ-ലൈൻ ബൈഫോക്കൽ" എന്ന പേരിന് കാരണമാകുന്നു.
ഒന്നിലധികം ഫോക്കൽ പോയിന്റുകൾ ഉള്ള കോണ്ടാക്റ്റ് ലെൻസുകൾ മൾട്ടിഫോക്കൽ കോൺടാക്റ്റ് ലെൻസുകൾ (ഉദാ. ബൈഫോക്കൽ അല്ലെങ്കിൽ പ്രോഗ്രസ്സീവ്) എന്ന് അറിയപ്പെടുന്നു.
അഡ്ജ്സ്റ്റബിൾ അല്ലെങ്കിൽ വേരിയബിൾ ഫോക്കസ് ലെൻസിന്റെ പവർ അല്ലെങ്കിൽ ഫോക്കൽ ലെങ്ത് ധരിക്കുന്നയാളുടെ ആവശ്യങ്ങൾക്കനുസരിച്ച് മാറ്റാനാകും. അത്തരമൊരു ലെൻസിന്റെ ഒരു സാധാരണ ഉപയോഗം ഏത് ദൂരത്തിലും വ്യക്തമായ കാഴ്ച അനുവദിക്കുക എന്നതാണ്. വ്യക്തിയുടെ ശ്രദ്ധ മറ്റൊരു ദൂരത്തുള്ള ഒരു വസ്തുവിലേക്ക് മാറുമ്പോൾ നിരന്തരമായ ക്രമീകരണം ആവശ്യമായി വരുന്നു എന്നതാണ് അത്തരമൊരു ലെൻസിന്റെ ഡിസൈനിലെ പ്രധാന വെല്ലുവിളി. സ്വമേധയാലുള്ള ക്രമീകരണം ബൈഫോക്കലുകളെക്കാളും ബുദ്ധിമുട്ടാണ്. തിരുത്തലിന് ആവശ്യമായി വരുന്ന ഇലക്ട്രോണിക് സിസ്റ്റങ്ങൾ, പവർ സപ്ലൈസ്, സെൻസറുകൾ എന്നിവ ഓട്ടോമേറ്റഡ് സിസ്റ്റങ്ങൾക്ക് ആവശ്യമാണ്. ഇവ വില, വലുപ്പം, ഭാരം എന്നിവ വർദ്ധിപ്പിക്കുന്ന ഘടകങ്ങളാണ്.
പവർ ഇല്ലാത്ത തിരുത്തൽ ലെൻസിനെ പ്ലാനോ ലെൻസ് എന്ന് വിളിക്കുന്നു. റിഫ്രാക്റ്റീവ് പിശകിന്റെ തിരുത്തൽ ആവശ്യമില്ലാത്ത ഒരുകണ്ണിന് മാത്രമായോ രണ്ട് കണ്ണുകൾക്കുമായോ ഈ ലെൻസുകൾ ഉപയോഗിക്കുന്നു. നല്ല കാഴ്ചയുള്ള ചില ആളുകൾ സ്റ്റൈൽ ആക്സസറിയായി കണ്ണട അല്ലെങ്കിൽ കോണ്ടാക്ട് ലെൻസുകൾ ധരിക്കാൻ ഇഷ്ടപ്പെടുന്നു. അത്തരം സാഹചര്യങ്ങളിൽ പ്ലാനോ ലെൻസ് ആണ് ഉപയോഗിക്കുന്നത്.
തിരുത്തൽ ലെൻസുകൾ പല പ്രൊഫൈലുകളിലും നിർമ്മിക്കാമെങ്കിലും, ഏറ്റവും സാധാരണമായത് ഒഫ്താൽമിക് അല്ലെങ്കിൽ കോൺവെക്സ്-കോൺകേവ് ആണ്. ഒരു ഒഫ്താൽമിക് ലെൻസിൽ, മുന്നിലെയും പിന്നിലെയും ഉപരിതലത്തിന് പോസിറ്റീവ് ആരം ഉണ്ട്, അതിന്റെ ഫലമായി മുൻ ഉപരിതലം പോസിറ്റീവ് / കൺവെർജന്റ് ആയും, പിൻ ഭാഗം നെഗറ്റീവ് / ഡൈവേർജന്റ് ആയും മാറുന്നു. മുന്നിലും പിന്നിലുമുള്ള ഉപരിതലത്തിലെ വക്രതയിലെ വ്യത്യാസം ലെൻസിന്റെ പവർ ആയി മാറുന്നു. ഹൈപ്പറോപിയയിൽ ഒരു കൺവെർജെൻറ് ലെൻസ് ആവശ്യമാണ്, അതിനാൽ മുൻ ഉപരിതലത്തിന്റെ വക്രത പിൻ ഉപരിതലത്തിനെക്കാൾ കൂടുതലായിരിക്കും. മയോപിയയിൽ ഇതിന് വിപരീതമായി പിന്നിലെ ഉപരിതലം മുൻ ഉപരിതലത്തേക്കാൾ വക്രത കൂടിയതായിരിക്കും. പ്രെസ്ബയോപിയ ശരിയാക്കാൻ, വിദൂര കാഴ്ചക്കുള്ള ലെൻസിനേക്കാൾ കൂടുതൽ കൺവർജന്റ് അല്ലെങ്കിൽ കുറവ് ഡൈവർജന്റ് ആയിരിക്കണം.
ലെൻസിന്റെ ഉപരിതലത്തിലുടനീളമുള്ള മികച്ച ഒപ്റ്റിക്കൽ, സൗന്ദര്യവർദ്ധക സ്വഭാവസവിശേഷതകൾക്കായി ബേസ് കർവിൽ (സാധാരണയായി ഒരു നേത്ര ലെൻസിന്റെ മുൻ ഉപരിതലത്തിൽ നിന്ന് നിർണ്ണയിക്കപ്പെടുന്നു) മാറ്റം വരുത്താം. ഈ രണ്ട് കാരണങ്ങളാൽ തിരുത്തൽ ലെൻസ് നിർദ്ദേശിക്കുമ്പോൾ ഒപ്റ്റോമെട്രിസ്റ്റുകൾ ലെൻസിന്റെ ബേസ് കർവ് കൂടി തിരഞ്ഞെടുക്കാറുണ്ട്. ഗണിതശാസ്ത്ര സൂത്രവാക്യങ്ങളും പ്രൊഫഷണൽ ക്ലിനിക്കൽ അനുഭവവും ഒപ്ടോമെട്രിസ്റ്റുകളെയും ലെൻസ് ഡിസൈനർമാരെയും മിക്ക ആളുകൾക്കും അനുയോജ്യമായ അടിസ്ഥാന ബേസ് കർവുകൾ നിർണ്ണയിക്കാൻ അനുവദിച്ചിരിക്കുന്നു. തൽഫലമായി, മുൻവശത്തെ ഉപരിതല വക്രത മാറ്റമില്ലാതെ സ്റ്റാൻഡേർഡ് ചെയ്യുകയും, ഒരു വ്യക്തിയുടെ പവർ സാധാരണയായി ലെൻസിന്റെ പിൻ ഉപരിതലത്തിന്റെ ജ്യാമിതിയിൽ നിന്ന് ഉണ്ടാക്കുകയും ചെയ്യുന്നു .
ബൈഫോക്കലുകളും ട്രൈഫോക്കലുകളും ഒന്നിലധികം സങ്കീർണ്ണമായ ലെൻസ് പ്രൊഫൈൽ ഉള്ളവയാണ്. പ്രധാന ലെൻസ് ഒരു സാധാരണ ഒഫ്താൽമിക് ലെൻസാണ്. അതിന്റെ മുന്നിലെ ബേസ് കർവ് സ്ഥിരമാണ്, അതേസമയം പിന്നിലെ ഉപരിതല വക്രത ആവശ്യമുള്ള ശക്തി കൈവരിക്കുന്നതിന് മാറ്റുന്നു. ലെൻസിന്റെ മുൻ ഉപരിതലത്തിൽ കാണപ്പെടുന്ന ഒരു ആഡ് സെഗ്മെന്റ് എന്ന് വിളിക്കുന്ന മൂന്നാമത്തെ ഗോളീയ വിഭാഗമാണ് "ബൈഫോക്കൽ" ലെൻസിന്റെ അടുത്ത് കാണുന്നതിനുള്ള ഭാഗം. ആഡ് സെഗ്മെന്റുകളുടെ ഉദാഹരണങ്ങളിൽ ഫ്ലാറ്റ് ടോപ്പ്, ക്രിപ്റ്റോക്ക്, ഓർത്തോഗോൺ, ടില്ലിയർ എക്സിക്യൂട്ടീവ്, അൾടെക്സ് എ എന്നിവ ഉൾപ്പെടുന്നു. മൂന്ന് വ്യത്യസ്ത ദൂരങ്ങളിലേക്ക് വ്യക്തിയുടെ കാഴ്ച ശരിയാക്കുന്ന ലെൻസ് ആണ് ട്രൈഫോക്കലുകൾ. ഇതിൽ രണ്ട് ആഡ് സെഗ്മെന്റുകൾ അടങ്ങിയിരിക്കുന്നു.
പ്രോഗ്രസീവ് അഡീഷണൽ ലെൻസ് (പിഎഎൽ, സാധാരണയായി നോ-ലൈൻ അല്ലെങ്കിൽ വരിഫോക്കൽ ലെൻസ് എന്നും അറിയപ്പെടുന്നു) ബൈ / ട്രൈ-ഫോക്കലുകളിലെ പോലെ വര ഇല്ലാത്ത വളരെ സങ്കീർണ്ണമായ പ്രൊഫൈൽ ഉള്ള ലെൻസ് ആണ്. ഇതിന്റെ ബേസ് കർവ് തുടർച്ചയായി വ്യത്യാസപ്പെടുന്നു. വക്രതയിലെ ഈ മാറ്റം ലെൻസിനെ വിവിധ സ്ഥലങ്ങളിൽ വ്യത്യസ്ത ഉള്ളതാക്കി മാറ്റുന്നു.
കണ്ണിന്റെ മുൻഭാഗവും ലെൻസിന്റെ പിൻഭാഗവും തമ്മിലുള്ള ദൂരമാണ് വെർട്ടെക്സ് ദൂരം. ±4.00D ന് മുകളിൽ പവർ ഉള്ള ഗ്ലാസുകളിൽ, വെർടെക്സ് ദൂരം കാഴ്ച ശക്തിയെ ബാധിക്കും. [3] ഒരു ചെറിയ വെർട്ടെക്സ് ദൂരം കാഴ്ച മണ്ഡലം വിപുലീകരിക്കും, പക്ഷേ അത് കണ്പീലികൾ ലെൻസിന്റെ പിൻഭാഗവുമായി സമ്പർക്കം പുലർത്തുന്നതിന് കാരണമാകുകയും ധരിക്കുന്നവർക്ക് ശല്യമുണ്ടാക്കുകയും ചെയ്യും. അനുയോജ്യമായ സൗന്ദര്യശാസ്ത്രവും കാഴ്ച മണ്ഡലവും നേടുന്നതിന്, വെർട്ടെക്സ് ദൂരവും ഫ്രെയിം വലുപ്പവും തമ്മിലുള്ള ബാലൻസ് നിലനിർത്തി ഫാഷനബിൾ ഫ്രെയിം തിരഞ്ഞെടുക്കാൻ വിദഗ്ദ്ധനായ ഫ്രെയിം സ്റ്റൈലിസ്റ്റ് സഹായിക്കും. സാധാരണ കണ്ണടകളിലെ ശരാശരി വെർട്ടെക്സ് ദൂരം 12-14 മിമി ആണ്. ഒരു കോൺടാക്റ്റ് ലെൻസ് നേരിട്ട് കണ്ണിൽ വെക്കുന്നതിനാൽ കോർണിയയും ലെൻസും തമ്മിലുള്ള ദൂരം, അതായത് വെർട്ടെക്സ് ദൂരം ഫലത്തിൽ പൂജ്യമാണ്.
അപവർത്തനാങ്കം അല്ലെങ്കിൽ റിഫ്രാക്റ്റീവ് ഇൻഡക്സ് സാധാരണയായി nd എന്ന് ചുരുക്കിപ്പറയുന്നു. ലെൻസ് മെറ്റീരിയലുകളെ അവയുടെ റിഫ്രാക്റ്റീവ് ഇൻഡക്സ് പ്രകാരം തരം തിരിച്ചിരിക്കുന്നു:
ഇതൊരു പൊതു വർഗ്ഗീകരണമാണ്. ഇൻഡക്സ് 1.60 അല്ലെങ്കിൽ അതിൽ കൂടുതൽ ഉള്ള ലെൻസുകൾ പലപ്പോഴും മാർക്കറ്റിംഗ് ആവശ്യങ്ങൾക്കായി ഹൈ-ഇൻഡക്സ് എന്ന് വിളിക്കപ്പെടുന്നു. അതുപോലെ, ട്രൈവെക്സും മറ്റ് ബോർഡർലൈൻ നോർമൽ / മിഡ്-ഇൻഡെക്സ് മെറ്റീരിയലുകളും മിഡ് ഇൻഡെക്സ് എന്ന് വിളിക്കുന്നു.
CR-39 പ്ലാസ്റ്റിക് ലെൻസുകളുമായി താരതമ്യപ്പെടുത്തുമ്പോൾ ഗ്ലാസ് ലെൻസുകൾ പൊട്ടിപ്പോകാനുള്ള സാധ്യതയും അവയുടെ ഉയർന്ന ഭാരവും കാരണം ഇതിന്റെ ഉപയോഗം ഇപ്പോൽ കുറഞ്ഞ് വരുകയാണ്. പ്രത്യേക സാഹചര്യങ്ങളിൽ അവ ഇപ്പോഴും ഉപയോക്കിന്നുണ്ട്, ഉദാഹരണത്തിന് വളരെ ഉയർന്ന പവർ ഉള്ളപ്പോൾ (നിലവിൽ, ഗ്ലാസ് ലെൻസുകൾ 1.9 എന്ന റിഫ്രാക്റ്റീവ് ഇൻഡക്സ് വരെ നിർമ്മിക്കാൻ കഴിയും). കൂടാതെ ഗ്ലാസിന്റെ കഠിനമായ ഉപരിതലം തീപ്പൊരിയിൽ നിന്നോ മറ്റ് വസ്തുക്കളുടെ കഷണങ്ങളിൽ നിന്നോ കൂടുതൽ പരിരക്ഷ നൽകുന്നതിനാൽ ചില തൊഴിലുകളിൽ ഇത് കണ്ണിന് സംരക്ഷണം നൽകുന്നു. ഏറ്റവും ഉയർന്ന അബെ വാല്യു ഉള്ള സാധാരണ ലെൻസ് ഒപ്റ്റിക്കൽ മെറ്റീരിയൽ ഒപ്റ്റിക്കൽ ക്രൌൺ ഗ്ലാസ്, CR-39 എന്നിവയാണ്.
CR-39 നായി:
സുരക്ഷ, കുറഞ്ഞ ചെലവ്, ഉൽപാദന സൌകര്യം, ഉയർന്ന ഒപ്റ്റിക്കൽ നിലവാരം എന്നിവ കാരണം പ്ലാസ്റ്റിക് ലെൻസുകളാണ് നിലവിൽ ഏറ്റവും സാധാരണയായി നിർദ്ദേശിക്കപ്പെടുന്ന ലെൻസുകൾ. പലതരം പ്ലാസ്റ്റിക് ലെൻസുകളുടെ പ്രധാന പോരായ്മ ഉയർന്ന റിഫ്രാക്റ്റീവ് ഇൻഡക്സ് ലെൻസുകൾ നിർമ്മിക്കുന്നതിനുള്ള പരിമിതികളും ചെലവുകളുമാണ്.
ട്രൈവെക്സ് 2001 ൽ പിപിജി ഇൻഡസ്ട്രീസ് സൈന്യത്തിനായി വികസിപ്പിച്ചെടുത്തതാണ്.[4] ഹോയ കോർപ്പറേഷനും യംഗ് ഒപ്റ്റിക്സുമായി ചേർന്ന് പിപിജി 2001 ൽ ഒപ്റ്റിക്കൽ വ്യവസായത്തിന് ട്രൈവെക്സിന്റെ ലഭ്യത പ്രഖ്യാപിച്ചു.[4] യൂറിത്തെയ്ൻ അടിസ്ഥാനമാക്കിയുള്ള പ്രീ-പോളിമറാണ് ട്രൈവെക്സ്.[5] മികച്ച ഒപ്റ്റിക്സ്, തീരെ കനം കുറവ്, അങ്ങേയറ്റത്തെ കരുത്ത് എന്നീ മൂന്ന് പ്രധാന സവിശേഷതകൾ കാരണം പിപിജി മെറ്റീരിയലിന് ട്രിവെക്സ് എന്ന് പേരിട്ടു.[4]
എഡ്വിൻ സി. സ്ലാഗൽ ഈ മെറ്റീരിയൽ കണ്ടുപിടിക്കുകയും 1998 സെപ്റ്റംബറിൽ പേറ്റന്റ് നേടുകയും ചെയ്തു.[5]
പോളികാർബണേറ്റ് ലെൻസിന് സാധാരണ പ്ലാസ്റ്റിക്കിനേക്കാൾ ഭാരം കുറവാണ്. ഇത് അൾട്രാവയലറ്റ് രശ്മികളെ തടയുന്നു. പൊട്ടാത്ത ലെൻസ് ആയതിനാല് കുട്ടികൾക്കും കൌമാരക്കാർക്കും സ്പോർട്സ് ഗ്ലാസുകളായും ഇത് ഉപയോഗിക്കുന്നു. പോളികാർബണേറ്റ് മൃദുവായതിനാൽ എളുപ്പത്തിൽ സ്ക്രാച്ച് വീഴാൻ സാധ്യത ഉള്ളതിനാൽ ലെൻസ് രൂപപ്പെടുത്തി മിനുക്കിയ ശേഷം സ്ക്രാച്ച്-റെസിസ്റ്റന്റ് കോട്ടിംഗ് പ്രയോഗിക്കുന്നു. ക്രോമാറ്റിക് അബറേഷൻ ഉണ്ടാക്കുന്ന, ഒപ്റ്റിക്കലായി ഏറ്റവും മോശമായ വസ്തുക്കളിൽ ഒന്നാണ് 30 ന്റെ അബെ വാല്യു ഉള്ള സ്റ്റാൻഡേർഡ് പോളികാർബണേറ്റ്.
ഉയർന്ന ഇൻഡക്സ് പ്ലാസ്റ്റിക്ക് ലെൻസുകൾ കനം കുറഞ്ഞ ലെൻസ് നിർമ്മിക്കാൻ സഹായിക്കുന്നു. എന്നാൽ ഉയർന്ന സാന്ദ്രത കാരണം ലെൻസുകൾ ഭാരം കുറഞ്ഞതായിരിക്കില്ല. ഉയർന്ന റിഫ്രാക്റ്റീവ് ഇൻഡക്സ് ഉള്ള പ്ലാസ്റ്റിക് ലെൻസുകൾ വളരെ ഉയർന്ന അളവിലുള്ള ക്രോമാറ്റിക് വ്യതിയാനങ്ങൾ ഉള്ളവയായിരിക്കും.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.