![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/6/6f/Alexander_archipelago.jpg/640px-Alexander_archipelago.jpg&w=640&q=50)
അലക്സാണ്ടർ ദ്വീപസമൂഹം
From Wikipedia, the free encyclopedia
അലക്സാണ്ടർ ദ്വീപസമൂഹം (Russian: Архипелаг Александра) വടക്കേ അമേരിക്കയിലെ അലാസ്കയുടെ തെക്കുകിഴക്കൻ തീരത്തായി സ്ഥിതി ചെയ്യുന്ന ഏകദേശം 300 മൈൽ (480 കിലോമീറ്റർ) നീളമുള്ള ഒരു ദ്വീപസമൂഹമാണ് (ദ്വീപുകളുടെ കൂട്ടം). ഇതിൽ പസഫിക് സമുദ്രത്തിൽ നിന്ന് കുത്തനെ ഉയർന്ന് മുങ്ങിക്കിടക്കുന്ന തീരദേശ പർവതങ്ങളുടെ ഉപരി ഭാഗങ്ങളിലായി ഏകദേശം 1,100 ദ്വീപുകൾ അടങ്ങിയിരിക്കുന്നു. ആഴത്തിലുള്ള ചാനലുകളും ഫ്യോർഡുകളും ഈ ദ്വീപുകളെ തമ്മിൽ വേർതിരിക്കുന്നതോടൊപ്പം അവയെ പ്രധാന ഭൂപ്രദേശത്ത് നിന്ന് വിഘടിപ്പിക്കുകയും ചെയ്യുന്നു. ക്രമരഹിതവും കുത്തനെയുള്ളതുമായ തീരങ്ങളും ഇടതൂർന്ന നിത്യഹരിതവും മിതശീതോഷ്ണവുമായ മഴക്കാടുകളുമുള്ള ദ്വീപുകളിലെ മിക്കയിടങ്ങളിലും തോണിയിലോ വിമാനത്തിലോ മാത്രമേ എത്തിച്ചേരാനാകൂ. ഭൂരിഭാഗം ദ്വീപുകളും ടോംഗാസ് ദേശീയ വനത്തിൻ്റെ ഭാഗമാണ്.
![]() അലക്സാണ്ടർ ദ്വീപസമൂഹത്തിൻ്റെ ഒരു മോഡിസ് ഫോട്ടോ | |
Geography | |
---|---|
Location | ശാന്ത സമുദ്രം |
Coordinates | 57°N 134°W |
Administration | |
സംസ്ഥാനം | അലാസ്ക |
ഭൂവിസ്തൃതിയുടെ ക്രമത്തിൽ, ഏറ്റവും വലിയ ദ്വീപുകൾ പ്രിൻസ് ഓഫ് വെയിൽസ് ദ്വീപ്, ചിക്കാഗോഫ് ദ്വീപ്, അഡ്മിറൽറ്റി ദ്വീപ്, ബാരനോഫ് ദ്വീപ്, റെവില്ലഗിഗെഡോ ദ്വീപ്, കുപ്രിയാനോഫ് ദ്വീപ്, കുയു ദ്വീപ്, എറ്റോലിൻ ദ്വീപ്, ഡാൾ ദ്വീപ്, റാങ്കൽ ദ്വീപ്, മിറ്റ്കോഫ് ദ്വീപ്, സാരെംബോ ദ്വീപ്, കോസ്സിയൂസ്കോ ദ്വീപ്, ക്രൂസോഫ് ദ്വീപ്, ആനെറ്റ് ദ്വീപ്, ഗ്രാവിന ദ്വീപ്, യാക്കോബി ദ്വീപ് എന്നിവയാണ്. എല്ലാ ദ്വീപുകളും ദുർഘടവും ഇടതൂർന്ന വനനിരകളുള്ളതും വന്യജീവികളാൽ സമൃദ്ധവുമാണ്.
ടിലിംഗിറ്റ്, കൈഗാനി ഹൈഡ എന്നീ ജനവിഭാഗങ്ങളാണ് ഈ പ്രദേശത്തെ തദ്ദേശീയർ. ആനെറ്റ് ദ്വീപിൽ കാണപ്പെടുന്ന സിംഷിയൻ ജനത യഥാർത്ഥത്തിൽ ഈ പ്രദേശത്തു നിന്നുള്ളവരല്ല, മറിച്ച് 19-ാം നൂറ്റാണ്ടിൻറെ അവസാനത്തിൽ ബ്രിട്ടീഷ് കൊളംബിയയിൽ നിന്ന് ഈ പ്രദേശത്തേക്ക് കുടിയേറിയവരാണ്. റിവില്ലഗിഗെഡോ ദ്വീപിലെ കെച്ചിക്കാനും ബാരനോഫ് ദ്വീപിലെ സിറ്റ്കയുമാണ് ദ്വീപുകളിലെ ഏറ്റവും വലിയ പട്ടണങ്ങൾ. ഈ മേഖലയിലെ ഏറ്റവും വലിയ പട്ടണമായ ജുന്യൂവിലെ ഏറ്റവും ജനസാന്ദ്രമായ അയൽപക്കങ്ങൾ പ്രധാന ഭൂപ്രദേശത്താണ് സ്ഥിതി ചെയ്യുന്നതെങ്കിലും നഗരത്തിൻറെ ഭാഗങ്ങൾ ദ്വീപസമൂഹത്തിൻറെ ഭാഗമായ ഡഗ്ലസ് ദ്വീപിലേയ്ക്കും വ്യാപിച്ചുകിടക്കുന്നു. വിനോദസഞ്ചാരം, മത്സ്യബന്ധനം, മരവ്യവസായം എന്നിവയാണ് ദ്വീപുകളിലെ പ്രധാന വ്യവസായങ്ങൾ.