From Wikipedia, the free encyclopedia
അടോപിക് ഡെർമറ്റൈറ്റിസ് (എ.ഡി.), അടോപിക് എക്സിമ, എക്സിമ[1] എന്ന പേരുകളിൽ അറിയപ്പെടുന്ന അസുഖം ഒരു ത്വക് രോഗമാണ്. കുട്ടികളിൽ ഈ അസുഖമുണ്ടാകുമ്പോൾ ഇതിനെ കരപ്പൻ എന്ന് വിശേഷിപ്പിക്കാറുണ്ട്[അവലംബം ആവശ്യമാണ്]. ഈ അസുഖം തൊലിയിൽ വീക്കമുണ്ടാക്കുന്നതും, ആവർത്തിച്ച് ബാധിക്കുന്നതും, കലശലായ ചൊറിച്ചിലുണ്ടാക്കുതുമാണ്.[2]
അടോപിക് ഡെർമറ്റൈറ്റിസ് | |
---|---|
സ്പെഷ്യാലിറ്റി | ഡെർമറ്റോളജി |
ഈ അസുഖം ബാധിച്ചവർക്ക് ദേഹമാസകലം ഉണങ്ങിയതും ശൽക്കങ്ങളോട് സാദൃശ്യം തോന്നിക്കുന്നതുമായ ഉണ്ടാകാറുണ്ട്. ഡയപ്പർ ധരിപ്പിക്കുന്ന ഭാഗത്തുമാത്രമാണ് ഇത് കാണാതിരിക്കാറ്. കൈകാൽ മടക്കുകളിലും മുഖത്തും കഴുത്തിലും നല്ല ചൊറിച്ചിലുള്ളതും തൊലിയിൽ നിന്ന് അൽപ്പം ഉയർന്ന് നിൽക്കുന്നതുമായ ചുവന്നു തടിച്ച ഭാഗങ്ങൾ കാണാം.[3][4][5][6][7] ഈ ഭാഗങ്ങളിൽ നിന്ന് ചലം ഒഴുകുകയും അത് ഉണങ്ങി ഒരു ആവരണമാവുകയും ചെയ്യും.[7] രോഗമുണ്ടാകുന്ന ഭാഗങ്ങളിൽ ബാക്റ്റീരിയ, ഫങ്കസ്, വൈറസ് എന്നിവയുടെ ബാധയുണ്ടാകാൻ കൂടിയ സാദ്ധ്യതയുണ്ട്.[7]
ഈ അസുഖത്തിന്റെ കാരണം അറിയില്ല എന്നതാണ് പൊതുവിലുള്ള സമവായം.[4] ഈ അസുഖമുള്ളവരുടെ ബന്ധുക്കൾക്കും ആസ്മ, ഭക്ഷണസാധനങ്ങളോടുള്ള അലർജി, ഹേ ഫീവർ എന്നീ അസുഖങ്ങൾ (അടോപ്പിയുടെ ലക്ഷണങ്ങൾ) കാണപ്പെടുന്നുണ്ട് എന്നതിനാൽ അസുഖത്തിന് ജനിതക കാരണങ്ങളുണ്ടെന്ന് സംശയിക്കുന്നു.[4][3] 2006-ൽ ഫൈലാഗ്രിൻ എന്ന മാംസ്യം ഉത്പാദിപ്പിക്കുന്ന ജീനിന്റെ മ്യൂട്ടേഷൻ അടോപിക് ഡെർമറ്റൈറ്റിസ് ഉണ്ടാകാനുള്ള സാദ്ധ്യത വളരെയധികം വർദ്ധിപ്പിക്കുന്നുണ്ട് എന്ന് കണ്ടെത്തപ്പെട്ടു. തൊലിയുടെ സ്ട്രാറ്റം കോർണിയം എന്ന പാളിയിൽ ജലാംശം നിലനിർത്താനാവശ്യമായ മാംസ്യമാണിത്.[8] കുട്ടിക്കാലത്ത് നായ്ക്കളുമായി സഹവാസമുള്ള ആൾക്കാരിൽ ഈ അസുഖമുണ്ടാകാനുള്ള സാദ്ധ്യത കുറവാണ്.[9] വിരബാധയും ഈ അസുഖമുണ്ടാകാനുള്ള സാദ്ധ്യത കുറയ്ക്കുമെന്ന് പഠനങ്ങൾ സൂചിപ്പിക്കുന്നു.[10] വൃത്തിഹീനമായ സാഹചര്യങ്ങളിൽ വളരുന്നതും പാസ്ചറൈസ് ചെയ്യാത്ത പാൽ കുടിക്കുന്നതുമായ കുട്ടികൾക്ക് ഈ അസുഖം ബാധിക്കാനുള്ള സാദ്ധ്യത കുറവാണ്.[10] പൊടിയിലെ മൈറ്റുകളുമായി സമ്പർക്കമുണ്ടാകുന്നത് അസുഖമുണ്ടാകാനുള്ള സാദ്ധ്യത വർദ്ധിപ്പിക്കുന്നു.[11] ഭക്ഷണത്തിൽ ധാരാളം ഫലവർഗ്ഗങ്ങൾ ഉൾപ്പെടുത്തുന്നത് ഈ അസുഖത്തിൽ നിന്ന് സംരക്ഷണം നൽകുന്നുണ്ട്. ഫാസ്റ്റ് ഫുഡുകൾ കഴിക്കുന്നത് ഈ അസുഖമുണ്ടാകാനുള്ള സാദ്ധ്യത വർദ്ധിപ്പിക്കുന്നതായി കാണുന്നു.[10]
ഇരുപതാം നൂറ്റാണ്ടിന്റെ ആരംഭം മുതൽ മ്യൂക്കോസയിൽ വീക്കം ബാധിക്കുന്നതരം അസുഖങ്ങൾ കൂടുതലായി കണ്ടുവരുന്നുണ്ട്. അടോപിക് ഡെർമറ്റൈറ്റിസ് എന്ന അസുഖം അതിനൊരു ഉദാഹരണമാണ്. വികസിതരാജ്യങ്ങളിൽ 15-30% കുട്ടികളെയും 2-10% മുതിർന്നവരെയും ഈ അസുഖം ബാധിക്കുന്നുണ്ട്. അമെരിക്കയിൽ ഈ അസുഖം കഴിഞ്ഞ മുപ്പത്-നാല്പതു വർഷങ്ങൾ കൊണ്ട് മൂന്നിരട്ടി ആളുകളെ ബാധിക്കുന്ന തരത്തിൽ വളർന്നിട്ടുണ്ട്.[4][12]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.