Црква „Св. Троица“ - Ратавица

Света Троица — главна селска црква во селото Ратавица.^[1] Црквата е сместена во северниот дел од селото, во непосредна близина на подрачното училиште „Браќа Миладиновци“.

Света Троица
Поглед кон црквата
македонска православна црква
Епархија	Брегалничка
Архијерејско намесништво	Штипско
Парохија	Злетовска
Местоположба
Координати	41°58′07.5″N 22°13′04.3″E
Место	Ратавица
Општина	Пробиштип
Држава	Македонија
Општи податоци
Покровител	Свето Тројство
Завршено	2015
Осветување	3 мај 2015
Архитектонски опис

Историја

Камен-темелник за изградба на црквата бил поставен на 13 мај 2010 година од страна на Митрополитот Брегалнички г. Иларион.^[2] Изградбата била завршила во 2015 година, а црквата била осветена на 3 мај 2015 година од страна на Митрополитот Брегалнички г. Иларион по повод 70 години од одржувањето на првиот црковен народен собор во Скопје во март 1945 година.^[3]

Архитектура

Градбата има правоаголна основа, со апсида во задниот дел, и претставува крсто-куполен храм со осумаголна купола. Пред влезот на црквата има натстрешница со триаголен кров која е поддржана од два јонски столба. На предниот дел од натстрешницата има дрвена основа на којашто се наоѓа дрвен крст. Ѕидовите на црквата и столбовите на натстрешницата се обоени во жолта боја, додека јонските капители се бели. Градбата и натстрешницата се покриени со кров од ќерамиди, додека куполата е покриена со метален кров. Над влезната врата има живопис на полукружна основа кој го отсликува Светото Тројство. Внатрешноста на црквата целосно е живописана. Црквата нема камбанарија, но истата е во изградба во непосредна близина на градбата, од левата страна на главниот влез.

Галерија

• 
  Натстрешницата со влезната порта од црквата
• 
  Живопис кој го отсликува Светото Тројство над влезната порта
• 
  Внатрешноста на црквата

Поврзано

• Штипско архијерејско намесништво
• Злетовска парохија
• Ратавица

Наводи

1. Јелена Павловска, Наташа Ниќифоровиќ и Огнен Коцевски (2011). Валентина Божиновска (уред.). Карта на верски објекти во Македонија. Менора - Скопје: Комисија за односи во верските заедници и религиозните групи. стр. 29. ISBN 978-608-65143-2-7.
2. Спасовден - преосветување на црква во с. Полаки и поставување камен темелник за изградба на нова црква во с. Ратавица - Злетово Архивирано на 9 јуни 2020 г., страница на Брегалничката епархија.
3. Осветување на црква во с. Ратавица - Злетово Архивирано на 30 септември 2020 г., страница на Брегалничката епархија.

Надворешни врски

• Црква „Св. Троица“ - Ратавица на Ризницата ^?