Шат ел-Араб

Шат ел-Араб
Местоположба
Физички особености
Устие	Персиски Залив
• надм. вис.	0 м
Должина	200 км
Особености на сливот

Шат ел-Араб (арапски: شط العرب, „Арапски Поток“; персиски: اَروَندرود, Арванд^[1] = „Брза“) — река во Југозападна Азија со должина од 200 км. Се создава со спојување на Тигар и Еуфрат кај местото Курна во покраината Басра во Јужен Ирак. Јужниот крај на течението ја исцртува границата помеѓу Ирак и Иран, сè до устието во Персискиот Залив. Во ширина се движи од 232 м кај Басра до 800 м во устието. Се смета дека реката настанала релативно доцна во геолошки рамки, а пред тоа Тигар и Еуфрат се влевале во Персискиот Залив преку друг водотек на запад.

Кратки факти Шат ел-Араб, Местоположба ...

Затвори

Од иранска страна на реката ѝ се приклучува притоката Карун и донесува големо количество мил. Поради ова, коритото мора постојано да се ископува за да се задржи пловноста.^[2]

Во поречието е сместена најголемата шума на урмини палми во светот. Во средината на 1970-тите, подрачјето имало 17-18 милиони дрва, или ¹⁄₅ од вкупниот број во светот. Меѓутоа, веќе во 2002 г, воените судири, штетниците и солта уништиле преку 14 милиони палми, од кои 9 милиони во Ирак и 5 милиони во Иран. Голем број од преостанатите 3-4 милиони дрва се во лоша состојба.^[3]

Во персиската книжевност и епот „Шахнаме“ (977-1010), името اروند Арванд се однесува на Тигар, кој е една од реките што го сочинува Шат ел-Араб.^[4] Поимот почнал да се однесува на оваа река во периодот на Пахлевите и опстојува како таков и по Иранската револуција (1979) до денес.^[4]