Љупка Арсова-Џундева

Љупка Арсова-Џундева (11 јули 1934 во Скопје^[1] — 7 декември 2018 во Скопје) — македонска театарска, филмска и телевизиска глумица.^[2]

Љупка Арсова-Џундева
Роден(а)	Љупка Арсова 11 јули 1934 Скопје, Вардарска Бановина, Кралство Југославија
Починал(а)	7 декември 2018(2018-12-07) (возр. 84) Скопје, Македонија
Националност	Македонка
Народност	Македонка
Занимање	глумица
Активен период	1951-2018
Сопружник	Петар Џундев

Во ансамблот на Драмата при Македонскиот народен театар, Џундева се вработила во 1951 година. Припаѓа на генерацијата глумци кои ја завршиле Државната театарска школа во Скопје. Во овој театар, таа работела до пензионирањето во 1990 година, иако и по пензионирањето продолжилаа да биде активна во театарот.^[3]

Добитник е на Наградата „13 Ноември“ која е доделувана од Град Скопје, потоа на Наградата за уметничко остварување доделена од Југословенската радио-телевизија, Орден на трудот со златен венец и Орден на трудот со сребрен венец.

Животопис

Деството го поминала во близина на Градскиот парк во Скопје каде што и живеела. Основно образование има завршено во Скопје, во 1948 година се запишала на Државната средна театарска школа во Скопје. По завршувањето на Државната средна тетарска школа во 1951 година, Џундева веднаш била примена како уметник во Македонскиот народен театар. За разлика од поголемиот број нејзини колеги и колешки, таа му останала верна на својот театарски колектив каде работела сè до нејзиното пензионирање, односно 1990 година.

Подеднакво има настапувано во дела од домашна-македонска продукција и југословенска драматургија, во светска драмска класика и во сценски остварувања од најпознати современи автори. Била член на Театарскиот совет и на Уметничкиот совет при Драмата на МНТ. Играла во првиот македонски филм „Фросина“, во првата македонска комедија „Мирно лето“, во филмот „Македонска крвава свадба“ и во многу други театарски претстави, телевизиски драми, монодрами и радио-драми. Има отстварено голем број гостувања во поранешна Југославија, Италија, Словачка, Русија, Бугарија и други земји. Иако била во пензија од 1990 година, таа уште била активна на театарската сцена. Таа заедно со глумиците: Мери Бошкова, Нада Гешоска и Милица Стојанова се смета за една од најпознатите и најангажирани актерки и бардови на македонското глумиште.

Ги има добиено наградите:

• Награда за животно дело „11 Октомври“;
• Награда за животно дело „Војдан Чернодрински“;
• Награда „13 Ноември“ на Град Скопје;
• Орден на трудот со сребрен венец; и
• Орден на трудот со златен венец.

Има добиени и други помали награди и признанија.

Театарски улоги

Џундева има настапувано како:

• Анка („Г-ѓа министерка“);
• Ана („Ревизор“);
• Евдокија („Време за пеење“);
• Ирина („Матурска вечер“);
• Коломба („Валпоне“);
• Кате („Антица“);
• Наталија („Три сестри“);
• Павлина („Потоп“);
• Регана („Крал Лир“);
• Свршеничката („Крвави свадби“);
• Симка („Печалбари“);
• Жена на Рефренд („Посета на старата дама");
• Г-ѓа Де Резмонд („Опасни врски");
• Марина („Вујко Вања");
• и други

Филмографија

Година	Филм	Улога
1952	Фросина ТВ-филм	Љуба
1961	Мирно лето ТВ-серија	Мира Мишевска
1967	Македонска крвава свадба ТВ-филм	Гина
1967	Пустина ТВ-филм
1968	Стотиот чекор ТВ-филм
1968	Лудиот и калуѓерицата ТВ-филм
1968	Грдиот Нарцис ТВ-филм
1969	Свекник ТВ-филм
1969	Волшебниот воз ТВ-серија
1969	Итрата вдовица ТВ-филм
1969	Антица ТВ-филм	Кате
1970	Слики на дрво ТВ-филм
1970	Балада за орканата ТВ-филм
1971	Пречек ТВ-филм	Марија
1971	Делба ТВ-филм
1975	Волшебното самарче ТВ-серија
1975	Шути и рогати ТВ-серија
1977	Нели ти реков ТВ-филм
1980	Оловна бригада ТВ-филм
1980	Двојка ТВ-филм
1981	Првите цутови ТВ-филм
1981	Милион маченици ТВ-филм
1982	Илинден ТВ-серија
1984	Нели ти реков ТВ-филм
1986	Состојба пред инфаркт ТВ-филм	Евгенија
1988	Трето доба ТВ-серија	Цвета
1992	Време, живот ТВ-филм	Цвета
1997	Светлини и бои ТВ-филм
1997	Џипси меџик ТВ-филм	Сметко-водителка
1999	Време живот ТВ-филм
2000	Мултилевел ТВ-филм	Марта
2000-2001	Погрешно време ТВ-серија	Ката
2000-2001	Во светот на бајките ТВ-серија
2002	Наше маало ТВ-серија	Ана
2006	Мост ТВ-филм	Катерина
2012	Бардо ТВ-филм	Бабата
2015	Македонски народни приказни ТВ-серија	Гатачката
2016	Ослободување на Скопје ТВ-филм
2016	Златна петорка ТВ-филм	Ката
2017	Љубов и предавство ТВ-серија	Ката

Наводи

1. Почина Љупка Арсова - Џундева
2. Ристовски, Блаже, уред. (2009). „Џундева“. Македонска енциклопедија. , книга II (М-Ш). Скопје: МАНУ. стр. 1642. Text "series " ignored (help)
3. „ФИЛМ НА СЕЌАВАЊА за играниот филм "Време, живот" на Иван Митевски“. Mac Cinema. Посетено на 2010-05-17.^{[мртва врска]}

Надворешни врски

• Биографија на Љупка Џундева, Македонски народен театар