Кралска академија на науките (Шведска)

Кралска академија на науките (шведски: Kungliga Vetenskapsakademien, KVA) — една од кралските академии во Шведска. Ова е независна и невладина научна организација со задача да ги поттикнува и поддржува науките, пред сè природните науки и математиката.

Кралска академија на науките
Kungliga Vetenskapsakademien

Гесло	att främja vetenskaperna och stärka deras inflytande i samhället (да се поттикнат науките и да се зајакне нивното влијание во општеството)
Основана	2 јуни 1739
Седиште	Стокхолм, Шведска
Членство	1600 академици 175 странски членови
Претседател	Сванте Линдквист
Постојан секретар	Стафан Нормарк
Мреж. место	kva.se

Зградата на Кралската академија на науките во Стокхолм

Академијата е основана на 2 јуни 1739 г. од славниот природонаучник Карл Линеј, меркантилистот Јонас Алстремер, конструкторот Мортен Тривалд, чиновниците Стен Карл Билке и Карл Вилхелм Кедерхилм и политичарот Андерс Јохан фон Хепкен.^[1]

Академијата има за цел да посветува особено внимание на полезните сознанија и да објавува на шведски јазик за да ги распространи најзините наоди што пошироко меѓу населението. Создадена е со поинаква замисла од постарото Кралско научно друштво во Упсала (основано во 1719 г.), кое објавувало на латински јазик. Академијата е намерно сместена во центарот на градот, каде што биле најзастапени стопанските активности. Како пример послужиле Кралското друштво во Лондон и Кралската академија на науките во Париз.

Во рамките на установата постојат комитети за доделување на меѓународни награди:

• Нобелови награди за физика и хемија^[2]
• Нобелова награда за економија^[3]
• Крафордови награди за астрономија и математика, геонауки, бионауки (со задршка на екологија) и полиартритис^[4]
• Ролф Шокови награди за логика и филозофија^[5]
• Награда „Грегори Арминоф“ за кристалографија^[6]
• Медал „Оскар Клајн“

и државни награди:^[7]

• Награда „Јеран Густафсон“ за истражни трудови во природните науки и медицината
• Седербергова награда за економија или правни науки
• Награда „Таге Ерландер“ за физика, хемија, технологија и биологија
• Награди „Ингвар Линдквист“ за наставници од областа на физиката, хемијата, биологијата и математиката.

Пишани изданија

Kongl. Svenska Vetenskaps-Academiens handlingar, том XI (1750).

Ова се тековните научни списанија на академијата:

• Ambio (1972-)
• Acta Mathematica (1882-)
• Arkiv för matematik (1949-; од 1903 до 1949 под друг наслов, каде се опфаќале и физиката и астрономијата)
• Acta Zoologica (1920-)
• Levnadsteckningar över Vetenskapsakademiens ledamöter (1869-) - биографии на починати академици
• Physica Scripta (1970-) - заедно со Норвешката академија на науките и книжевноста
• Porträttmatrikel (1971-) - портрети на тековни членови
• Zoologica Scripta (1972-) - заедно со Норвешка академија на науките и книжевноста
• ETAI (1997-)

Поврзано

Пресконференција во салата за седници на академијата

• Кралски академии во Шведска
• Членови на Кралската шведска академија на науките

Наводи

1. „History“. The Royal Swedish Academy of Sciences. Посетено на 18 октомври 2009.
2. „Нобелови награди“. Кралска академија на науките. Архивирано од изворникот на 2010-01-21. Посетено на 18 октомври 2009. (англиски)
3. „Нобелова награда за економски науки“. Кралска академија на науките. Посетено на 18 октомври 2009. (англиски)
4. „Крафордова награда“. Кралска академија на науките. Посетено на 18 октомври 2009. (англиски)
5. „Ролф Шокови награди“. Кралска академија на науките. Архивирано од изворникот на 2013-01-31. Посетено на 18 октомври 2009. (англиски)
6. „Награда „Грегори Арминоф"“. Кралска академија на науките. Посетено на 18 октомври 2009. (англиски)
7. „Национални награди“. Кралска академија на науките. Архивирано од изворникот на 2020-09-23. Посетено на 18 октомври 2007. (англиски)

Надворешни врски

• Кралска академија на науките (англиски) (шведски)
• ETAI^{[мртва врска]} - мреж. место на списанието (англиски)