Sutan Sjahrir

Sutan Sjahrir^{[lower-alpha 1]} (5 Maret 1909 – 9 April 1966) adolah politikus jo pajuang kamerdekaan Indonesia nan kudian manjabaik sabagai Perdana Menteri (PM) patamo Indonesia sajak tahun 1945 sampai 1947. Sabalunnyo, inyo marupoan tokoh kunci pergerakan nasionalis Indonesia pado dasawarsa 1930-an sampai 1940-an. Indak saroman kabanyakan pajuang sapantarannyo, inyo samo sakali indak bapihak ka Japang salamo maso pandudukan Japang di Indonesia dan malah manantang Japang. Inyo dianggap sabagai urang idealis dan intelektual.^[1]

Sutan Sjahrir pado 1948

Barasa dari keluarga Minangkabau, inyo baraja di Universitas Amsterdam dan kudian manjadi mahasiswa hukum di Universitas Leiden. Inyo tertarik ka politik sosialis dan pergerakan Indonesia mamparoleh kamerdekaan, manjadi konco arek dari pajuang kamerdekaan nan labiah tuo, Mohammad Hatta, yang kudian manjadi Wakil Presiden patamo Indonesia. Salamo maso pandudukan Japang di Hindia Balando, Sjahrir manunjuakan sikap malawan. Manjalang proklamasi kamerdekaan pado 17 Agustus 1945, inyo terlibat dalam kajadian Rengasdengklok. Indak lamo saudah inyo mangaluaan pamflet berjudul "Perjuangan Kita" pado 1945, inyo diangkek sabagai PM Indonesia dek Presiden Sekarno. Sabagai PM, inyo adolah salah satu dari saketek pemimpin Republik nan dapek ditarimo dek pamarentah Balando, dek sikapnyo nan indak kooperatif salamo pandudukan Japang. Inyo juo punyo paran gadang dalam menegosiasikan Parundiangan Linggajati.

Sjahrir managakan Partai Sosialis Indonesia (PSI) pado tahun 1948 untuak manantang Partai Komunis Indonesia (PKI). Meskipun ketek, partainyo punyo pangaruah gadang pado tahun-tahun awal pasca-kamerdekaan. Namun, partai Sjahrir pado akhianyo gagal maraih dukungan dan kudian ditagahan pado tahun 1960, sasudah partai iko dicurigai terlibat dalam pargolakan Pemerintah Revolusioner Republik Indonesia (PRRI). Sjahrir surang malah ditangkok dan dipanjaro tanpa proses pangadilan pado tahun 1962. Pado tahun 1965, inyo dibebaskan untuak mandapek perawatan medis dan diagiah izin untuak pai ka Zurich, Swiss. Di sinan, inyo maningga dunia pado tanggal 9 April 1966. Pado hari nan samo, malalui Keputusan Presiden No. 76/1966, Sjahrir ditetapkan sabagai Pahlawan Nasional Indonesia.^[1]

Kahidupan awal

Maso mudo dan keluarga

Sutan Sjahrir lahia pado 5 Maret 1909 di Padang Panjang, Sumatera Barat. Inyo barasa dari keluarga Minangkabau, tapeknyo dari Nagari Koto Gadang, Kabupaten Agam kini.^[2] Apaknyo, Muhammad Rasyad Maharajo Sutan, manjabaik sabagai Hoofd atau Kapalo Jaksa di Landraad Medan. Mandehnyo, Siti Rabiah, barasa dari Natal, nan kini masuak dalam wilayah Kabupaten Tapanuli Selatan.^[3][4]

Ayah Sjahrir manikah anam kali, samantaro ibu Sjahrir adolah istri nan kalimo.^[5] Dari parnikahan tersebut, Sjahrir punyo banyak adiak-kakak, tamasuak duo saudara laki-laki kanduang. Mereka yakni Soetan Sjahsam, nan kudian bagaluik di bisnis, jo Soetan Noeralamsjah, nan kudian manjadi jaksa panuntuik jo politikus Partai Indonesia Raya (Parindra). Adopun di antaro saudara tirinyo, Rohana Kudus, tanamo sabagai tokoh pajuang pendidikan padusi jo jurnalis surat kaba padusi Soenting Melajoe.^[6][4]

Pandidikan awal

Meer Uitgebreid Lager Onderwijs (MULO) di Medan sekitar tahun 1920-an.

Meskipun barasa dari Padang Panjang, keluarga Sjahrir tingga di Medan, tapi inyo acok dibaok dek apaknyo ka rumah anduangnyo di Koto Gadang, nan kini alah jadi rumah tingga.^[7] Sjahrir sikolah di Europeesche Lagere School (ELS), sabalun manyambuang ka Meer Uitgebreid Lager Onderwijs (MULO) di Medan. Salamo di MULO, inyo patamo kali mangenal karya-karya panulih takah Karl May. Pado tahun 1926, inyo malanjuikan pendidikannyo ka Algemene Middelbare School (AMS), di Bandung, Jawa Barat.^[8][3]

Di sinan, inyo bagabuang jo Himpunan Teater Mahasiswa Indonesia (Batovis) sabagai sutradara, panulih, jo aktor.^[3] Panghasilannyo dari sinan inyo gunoan untuak mandanai 'Universitas Rakyat' (Cahaya), sabuah universitas nan ditagakan Sjahrir, untuak mamberantas buto huruf jo manggalang pitih untuak pamentasan drama patriotik di daerah Priangan.^[9][8] Sjahrir manyalasaian studinyo di AMS pado tahun 1929, dan pai ka Balando untuak kuliah, manggunoan beasiswa.^[10]

Parjuangan kamerdekaan

Aktivis mahasiswa nasionalis di Balando

Sjahrir tibo di Balando pado taun 1929, mandaftar partamo kali di Universitas Amsterdam dan kudian manjadi mahasiswa hukum di Universitas Leiden. Di sinan, apresiasinyo pado prinsip-prinsip sosialis mulai tumbuh.^[11] Inyo bagabuang jo babarapo serikat buruh dan inyo pun bakarajo mancari pitih untuk dirinyo surang. Baliau sempat sabanta manjadi Sekretaris Perhimpoenan Indonesia, sabuah organisasi mahasiswa Indonesia di Balando. Sjahrir juo marupoan salah satu pandiri Jong Indonesie, sabuah ikatan pamudo Indonesia bukannyo paralu adonyo ikatan untuak mambantu pakambangan pamuda Indonesia untuak generasi salanjuiknyo, hanyo untuak barubah dalam wakatu babarapo taun ka Pemuda Indonesia. Organisasi iko, khususnyo, punyo peran penting dalam Sumpah Pemuda, yakni mambantu kongres dapek bajalan. Salamo kagiatan politiknyo sabagai mahasiswa di Balando, inyo manjadi kawan arek jo aktivis kamardekaan nan labiah senior, Mohammad Hatta, calon wakil presiden Indonesia. Katiko inyo batahun-tahun diasiangkan dek Balando di Kapulauan Banda, inyo maaja anak-anak satampek untuak mancintoi nagarinyo jo maagiah inspirasi kapado mareka dalam banyak hal.^[rujuakan?]

Sangkek Perhimpoenan Indonesia barado di bawah pangaruah kumunih nan kian marajalela, Hatta sarato Sjahrir dikaluaan pado tahun 1931.^[12] Sabagai reaksi atas intrik nan dibuek dek kalompok komunis di PI terhadap Hatta jo dirinyo, Sjahrir tetap tanang dan taguah jo pandiriannyo. Dalam memoarnyo, kawan Balando mereka, Sol Tas, manganang: “Inyo indak terintimidasi satu menit pun dek parnyataan resmi atau semi-resmi, dari komunike atau kalompok lainnyo, indak takuik sadatiak pun dengan manuver-manuver nan diarahan ka inyo, dan indak terlalu peduli jo reputasinya. Perpaduan antaro kapercayaan diri jo realisme, kaberanian nan barasaa pado katiadaan ambisi atau kesombongan, manjadi ciri-cirinyo."^[13]

Pamimpin nasionalis di Hindia Belanda

Sjahrir alun manyaleaaian gala sarjana hukumnyo, sangkek Hatta mengirim Sjahrir mandahuluinyo ka Hindia Belanda pado tahun 1931, untuak mambantu managakan Partai Nasional Indonesia (PNI). Sjahrir sangat aktif dalam Daulat Rajat, surek kaba PNI nan baru.^[14] Dalam waktu nan relatif singkek, inyo tampil dari mulonyo parpanjangan tangan Hatta manjadi tokoh pamimpin politik jo intelektual nan punyo kadudukan tapandang. Kaduo pamimpin iko dipanjaro di Lembaga Pemasyarakatan Cipinang dek Belanda pado bulan Maret 1934. Pado bulan November 1934, kalua putusan bahasono mereka diasiangan ka Boven-Digoel; mereka tibo pada bulan Maret 1935, kudian dipindahan ka Banda satahun sasduah itu, dan sabalun Hindia Belanda jatuah ka tangan Japang pado tahun 1941, dipindahan baliak ka Sukabumi.

Salamo pandudukan Japang di Hindia Belanda, inyo indak banyak berperan di muko umum, dek mandario panyakik TBC.Inyo muncul sabagai salah satu dari saketek pamimpin kamerdekaan nan terlibat dalam gerakan parlawanan terhadap pandudukan Japang. Soekarno, Hatta, jo Sjahrir baiyo-iyo bahasonyo Sjahrir akan mamliliah jalan di bawah tanah untuak mangorganisir parlawanan revolusioner, samantaro nan lain akan malanjuikan karajo samo mereka jo penjajah Jepang..^[15]

Catatan

1. Juo ditulih dalam babagai kombinasi ejaan, tamasuakSutan Syahrir joSoetan Sjahrir.