Urang Banjar iolah kalompok etnik nan mauni wilayah Kalimantan Selatan, sarato sabagian Kalimantan Tangah jo sabagian Kalimantan Timur. Populasi urang Banjar jo jumlah gadang dapek pulo ditamui di wilayah Riau, Jambi, Sumatera Utara, jo Samananjuang Malaya dek migrasi urang Banjar pado abaik ka-19.[3]
Urang Banjar اورڠ بنجر | ||||||||||||||||||||||||||||||||||||
---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|
![]() Amak-amak Banjar nan biaso manggaleh di pasa apuang | ||||||||||||||||||||||||||||||||||||
Jumlah populasi | ||||||||||||||||||||||||||||||||||||
Kurang lebih 5,7 juta | ||||||||||||||||||||||||||||||||||||
Kawasan bapopulasi cukuik banyak | ||||||||||||||||||||||||||||||||||||
| ||||||||||||||||||||||||||||||||||||
Bahaso | ||||||||||||||||||||||||||||||||||||
Banjar, Indonesia, jo Malayu | ||||||||||||||||||||||||||||||||||||
Agamo | ||||||||||||||||||||||||||||||||||||
![]() | ||||||||||||||||||||||||||||||||||||
Kalompok etnik takaik | ||||||||||||||||||||||||||||||||||||
Dayak (Meratus, Maanyan, Bakumpai, Ngaju), Kutai |
Manuruik sensus panduduak 2010, urang Banjar bajumlah 4,1 juta jiwa. Sakitar 2,7 juta urang Banjar tingga di Kalimantan Selatan jo 1 juta urang Banjar lainnyo tingga di wilayah Kalimantan lainnyo sarato 500 ribu urang Banjar lainnyo tingga di lua Kalimantan.
Urang Banjar barasa dari daerah Banjar nan marupokan pambauran masyarakaik babarapo daerah aliran sungai iyolah DAS Bahan, DAS Barito, DAS Martapura, jo DAS Tabanio. Dari daerah pusek budayanyo, urang Banjar sajak barabaik-abaik lalu bapindah sacaro malaweh sacaro sentrifugal atau sacaro jauah ka babagai daerah inggo ka Madagaskar. Dikaranokan faktor historis pangislaman pribumi Kalimantan, mayoritas masyarakaik etnis Banjar pado umumnyo kini baragamo Islam (Muslim), masyarakaik Dayak pasisia iko manunjuakkan karakteristik nan agak babedo dari kabanyakan Dayak di kawasan padalaman Kalimantan; nan mano masyarakaik etnis Banjar cenderung mampunyoi gayo hiduik jo norma-norma nan babasis Islami. Etnis Banjar juo dikenal akan kamampuannyo dalam bidang paniagoan, pado maso kini populasi diaspora Banjar dapek dijumpoi pulo sacaro global atau di saluruah balahan dunia; tamasuak diantaronyo dalam cakupan kawasan Asia Tenggara maupun hinggo ka Timur Tangah (tarutamo di Arab Saudi).
Etimologi
Sacaro etimologis kato "Banjar" sabagai etnonim mulonyo barasa dari terminologi bahaso Ma'anyan dialek Janyawai nan baraka dari bahaso Jao kuno. Sacaro hakikeknyo, etnonim iko digunokan untuak mangidentifikasi goloangan Dayak dari etnis Ma'anyan, Meratus, jo Ngaju nan alah 'dijao kan' katiko masyarakaik etnis Jao tibo di kawasan tenggara Kalimantan untuak mambangun paradabannyo. Istilah "banjar" (ꦧꦚ꧀ꦗꦂ) itu di dalam bahaso Jao marupokan kapendekan dari kato karajo "mbanjarke" (ꦩ꧀ꦧꦚ꧀ꦗꦂꦏꦺ), nan bararti “mamisahkan jo manato ulang” sacaro harafiah, kato iko kamudian diadopsi manjadi etnonim lantaran alah manjadi 'rahasio umum' dalam masyarakaik Kalimantan bahwo etnis Banjar sajatinyo marupokan bagian dari masyarakaik Dayak nan labiah gadang nan alah mangalami asimilasi (baik itu dari sagi agamo, budayo, dan lain sabagainyo) dengan pangaruah lua.
Sijarah
Prasijarah
Dicaliak kabalakang dari genealoginyo, masyarakaik etnis Banjar pado jaman dahulu marupakan satu kasatuan entitas nan samo dengan masyarakaik Dayak lainnyo di sakitar wilayah Pagunuangan Meratus (khusuihnyo dengan etnis Bukik atau acok dikenali sabagai Dayak Meratus). Panalitian arkeologi pado jaman modern di kawasan Geopark Meratus mangungkokkan bahwo kawasan iko alah dihuni oleh manusia purba sajak jaman maso prasijarah.
Sivilisasi
Karajaan Dipa
Nagaro Dipa atau Dipa Nagaro marupokan sabuah sabuikkan lokal oleh masyarakaik etnis Banjar nan marujuak kapado suatu entitas karajaan nan dianggok sabagai sumber sivilisasi atau paradaban nan mampunyoi pangaruah dominan bagi masyarakaik Banjar. Karajaan iko ditandoi marupokan sabuah cabang atau vassal state dari karajaan utamonyo di pulau Jao; yoitu karajaan Banjar Negara. Kato dipa itu diambiak dari istilah dwipa dalam bahaso Jao nan mampunyoi arati "pulau", marujuak kapado Banjar Negara itu surang nan talatak di pulau Jao. Masyarakaik etnis Banjar pado maso kini kabanyakannyo marupokan katurunan dari kawasan Banjar Negara nan mano kamudian istilah Banjar diadopsi sabagai identitaih etnonim bagi etnis iko (pado maso lampau, kawargonagaroan Banjar Negara iolah Banjar Banso, samo saperti konsep nan dikenali pado maso kini manganoi nagaro Indonesia jo banso Indonesia).
Karajaan Banjar
Karajaan Banjar marupokan bantuak lanjuikan dari kakuasoan Dipa Negara atau Banjar Negara nan mano pado masa ko pamimpin monarki atau sang rajo alah dilantiak dari katurunan rajo nan manatok di Kalimantan, jo indak lai mangikuiti sentralisasi Jao jo marupokan bantuak awal desentralisasi kakuasoan kamaharajoan Jao.
Kasultanan Banjar
Pado maso kagamilangan Mataram, saluruah karajaan nan bahubungan samo Jao mangalami pangaruah kaislaman dengan disahkannyo pangadopsian sistem pamarintahan ala Timur Tangah, yoitu kesultanan. Sajak tu, karajaan Banjar batransformasi manjadi kesultanan Banjar; nan mano pamimpin monarkinyo barupo saurang sultan (indak lagi rajo saperti sabalumnyo).
Sistem kakarabatan
Waring |
↑ |
Sanggah |
↑ |
Datu |
↑ |
Kai (kakek) + Nini (nenek) |
↑ |
Abah (ayah) + Uma (ibu) |
↑ |
Kakak < ULUN (saya/sudut pandang pembaca)> Ading |
↓ |
Anak |
↓ |
Cucu |
↓ |
Buyut |
↓ |
Intah/Muning |
Saperti sistem kakarabatan umumnyo, masyarakaik Banjar mangenal istilah-istilah tatantu sabagai panggilan dalam kaluargo. Skema di sampiang bapusek dari ULUN sabagai panyabuiknyo.
Bagi ULUN juo tadapek panggilan untuak saudaro dari ayah atau ibu, saudao tatuo disabuik Julak, saudaro kaduo disabuik Gulu, saudaro barikuiknyo disabuik Tuha, saudaro tangah dari ayah jo ibu disabuik Angah, jo nan lainnyo biaso disabuik Pakacil (paman muda/kecil) jo Makacil (bibi muda/kecil), sadangkan tamudo disabuik Busu. Untuak mamanggia saudaro dari kai jo nini samo sajo, bagitu pulo untuak saudaro datu.
Disampiang istilah di ateh masih ado pulo sabuik lainnyo, yoitu:
· minantu (laki / bini dari anak ULUN)
· pawarangan (ayah / induak dari minantu)
· mintuha (ayah / induak dari laki / bini ULUN)
· mintuha lambung (saudaro mintuha dari ULUN)
· sabungkut (urang nan ciek Datu dengan ULUN)
· mamarina (sabuikan umum untuak saudaro ayah/induak dari ULUN)
· kamanakan (anaknyo kakak / adiak dari ULUN)
· sapupu sakali (anak mamarina dari ULUN)
· maruai (bini samo bini bersaudara)
· ipar (saudaro dari bini / laki dari ULUN)
· panjulaknya (saudaro tatuo dari ULUN)
· pambusunya (saudaro taketek dari ULUN)
· badangsanak (saudaro kanduang)
Untuak maimbau urang nan saumua buliah diimbau ikam, buliah juo manggunokan kato ambo untuak manunjuak diri surang. Sadangkan untuak manghormati atau maimbau nan labiah tuo digunokan kato pian, jo kato ulun untuak manunjuak diri surang.
Dalam sistem kakarabatan, urang Banjar manganuik prinsip garih katurunan bilateral (parental), aratinyo manarik garih katurunan dari pihak ayah jo pihak induak.
Kapicayoan
Agamo
Istilah Islam Banjar manunjuak kapado sabuah proses historis dari fenomena inkulturisasi Islam di Tanah Banjar, nan sacaro bakasinambuangan tatok hiduik basamo masyarakaik Banjar itu.[4] Dalam ungkapan lain, istilah Islam Banjar sataro dengan istilah-istilah barikuik: Islam di Tanah Banjar, Islam manuruik pamahaman jo pangalaman masyarakaik Banjar, Islam nan baparan dalam masyarakaik jo budayo Banjar, atau istilah-istilah lain nan sajenis, tantunyo dengan panakanan-panakanan tatantu nan bavariasi antaro istilah nan satu samo lainnyo.
Inti dari Islam Banjar adolah tadapeknyo karakteristik khas nan agamo Islam punyo dalam proses sijarahnyo di Tanah Banjar. Ciri khas itu adolah tadapeknyo kombinasi pado level kapicayoan antaro kapicayoan Islam, kapicayoan bubuhan, jo kapicayoan lingkuangan. Kombinasi itulah nan mambantuak sistem kapicayoan Islam Banjar.[5] Di antaro katigo sub-kapicayoan itu, nan paliang tuo jo labiah asli dalam konteks Banjar adolah kapicayoan lingkuangan, karano unsua-unsuanyo labiah marujuak pado pola-pola agamo pribumi pra-Hindu. Oleh karano itu, dibandiangkan kapicayoan bubuhan, kapicayoan lingkuangan iko tampak labiah fleksibel jo tabuka bagi upayo-upayo modifikasi katiko dihubuangkan dengan kapicayoan Islam.[4]
Sijarah Islam Banjar dimulai sairiang dengan sijarah pambantuakan entitas Banjar itu surang. Manuruik kabanyakan panaliti, Islam alah bakambang jauah sabalum badirinyo Karajaan Banjar di Kuin Banjarmasin, meskipun dalam kondisi nan relatif lambek lantaran balum manjadi kakuaikan sosial-politik. Karajaan Banjar, dengan demikian, manjadi tonggak sijarah patamo pakambangan Islam di kawasan Selatan pulau Kalimantan. Kahadiran Syekh Muhammad Arsyad al-Banjar labiah kurang tigo abaik kamudian marupokan babak baru dalam sijarah Islam Banjar nan pangaruahnyo masih sangaik taraso sampai dewasa ko.
Bahaso
![Thumb](http://upload.wikimedia.org/wikipedia/commons/thumb/7/71/Majapahit_Empire.svg/320px-Majapahit_Empire.svg.png)
Bahaso
Bahaso nan digunokan oleh masyarakaik etnis Banjar adolah bahasa Banjar. Sacaro geneaologis linguistiknyo, bahaso iko marupokan salah satu bahaso dalam rumpun bahasa Dayak (Pasisia) nan sarumpun dengan bahaso Paser, Tidung, dan lain sebagainyo.
Pangaruah linguistik
Sarupo dengan rumpun bahaso Dayak lainnyo nan digunokan di kawasan pasisia, bahaso Banjar mampunyoi pangaruah linguistik nan cukuik dominan dari bahaso Jao (khusuihnyo bahaso Jo kuno) nan didugo mangalami kanaikan pangaruah pado maso kamaharajaan Majapahit. Namun demikian, salain mandapek pangaruah dari bahaso Jao, tadapek juo pangaruah dari bahaso Arab jo bahaso Sanskerta nan manandokan sijarah linguistik bidang religiusitas dalam masyarakaik etnis Banjar.
Filosofi
Tadapek babarapo unsua filsafat hiduik urang Banjar, baik atau basipek positif maupun nan basipek negatif, antaro lain:[6]
- Baiman. Yoitu satiok Urang Banjar mayakini adonyo Tuhan/Allah. Satiok individu urang Banjar salalu disuruah untuak mampalajari tentang rukun iman jo malaksanokan dengan rajin kalimo rukun Islam. Bilo balum mampalajari tentang kaimanan jo rukun Islam iko dianggok kabaragamaan urang Banjar balum sampurna.
- Bauntung. Urang Banjar haruih punyo katarampilan hiduik. Jadi Urang Banjar dari ketek alah diajakan katarampilan kajuruan, yoitu katarampilan nan dikaikkkan dengan pakarajoan tatentu nan tadapek dilingkuangannyo. Hal iko buliah dicaliak dari asa Urang Banjar tasabuik misalnyo urang Kelua punyo kaahlian manjaik, urang Amuntai punyo kaahlian mambuat lemari, orang Alabio punya keahlian sabagai padagang kain, Negara punyo kaahlian sabagai padagang ameh, mambuek garabah, mambuek parahu/kapa, urang Mergasari punyo kaahlian sabagai pambuek anyaman, urang Martapura punyo kaahlian badagang batu-batuan. Urang Banjar salalu di ajaan life skill atau katarampilan supayo hiduik buliah mandiri. Urang Banjar haruih bakarajo taruih manaruih, karano satiok kali salasai suatu tugaih, tugaih lain alah mananti.
- Batuah. Arti barakah atau bamanfaaik bagi kahidupan urang lain. Urang Banjar sabagai mayoritas baragamo Islam, tantu akan mangamalkan ajaran sacaro elok, yoitu supayo hiduiknyo mambaok kaelokan bagi urang lain. Karano saelok-eloknyo manusia adolah nan bamanfaaik bagi urang lain. Jadi Urang Banjar dalam tatanan maso lalu maupun kini ko salalu diharokkan supayo hiduiknyo baguno bagi dirinyo, kaluargo jo urang banyak. Supayo buliah baguno bagi masyarakaik, mako Urang Banjar haruih mampunyoi iman nan kuek, ilmu nan bamanfaaik jo baramal kabajikan.
- Cangkal. Yoitu ulet jo rajin dalam bakarajo. Urang Banjar haruih bakarajo kareh untuak manggapai cito-cito, sahinggo di maso lalu inyo suko marantau. Sipek cangkal dalam bakarajo adolah salah satu identitaih urang Banjar. Dalam pandangan Urang Banjar bakarajo haruih maksimal, badoa jo batawakal kapado Allah SWT, sahinggo hiduiknyo akan bahagio di dunia jo akhirek.
- Elok Tingkah laku. Yoitu Urang Banjar dalam pargaulan sahari-hari haruih manunjuakkan budi pekerti nan luhua supayo inyo disukoi urang lain. Dengan kato lain, Urang Banjar haruih pandai baradaptasi dengan lingkuangan dimano inyo tingga.
- Kompetitif individual. Yoitu urang Banjar dikenal sabagai pakarajo kareh dalam manggapai cito-citonyo tetapi bakarajo surang-surang indak sacaro kolektif, sahinggo Urang Banjar indak mampu mambangun suatu poroih kakuatan ekonomi atau politik di Pentaih Nasional. Urang Banjar cenderung mampunyoi sipek individual jo ego nan tinggi sahinggo payah diatua.
- Materialis pragmatis. Gayo hiduik Urang Banjar kini ko dikaranokan pangaruah globalisasi dengan trend hiduik nan materialis-pragmatis, sahinggo pola hiduik Urang Banjar sangaik konsumtif. Disisi lain, gayo hiduik anak mudo Banjar dalam mamiliah karajo, labiah mangutamokan karajo kantuaan nan badasi atau karyawan supermarket daripado padagang ketek dengan modal surang jo mandiri.
- Sikap qanaah jo pasrah. Urang Banjar salagi mudo adolah pakarajo kareh untuak maraiah cito-citonyo, tapi kalau alah berhasil jo alah tuo hiduiknyo santai untuak manikmati hiduik jo baribadah kapado Allah untuak mangisi wakatu.
- Haram manyarah jo waja sampai kaputing. Yoitu pantang manyarah jo tagar pandirian. Kato hikmah di ateh diungkokkan oleh Pangeran Antasari dalam rangka mampakuek motivasi pasukannyo manghadoki pasukan panjajah Balando. Urang Banjar mampunyoi pandirian nan kuek untuak mampatahankan kayakinan atau nan dipajuangkannyo, sahinggo indak mudah goyang atau taombang-ambiang oleh situasi dan kondisi nan dihadoki. Prinsip iko digunokan jo dijadikan samboyan Provinsi Kalimantan Selatan.
Nilai budayo Banjar nan bakaitan dengan hubuangan manusia dengan Tuhan, hubuangan manusia dengan manusia, hubuangan manusia dengan dirinyo surang jo manusia dengan alam:[7]
- Wujuik konsepsi berelaan marupokan nilai ikhlas jo syukua dan samato-mato untuak ibadah jo mandapek ridho Allah SWT.
- Pado sistem kakarabatan, baik karano katurunan maupun karano status sosial jo profesi, ado konsep bubuhan. Dalam konsepsi bubuhan tamuek nilai bedingsanakan (pasaudaroan), betutulungan (toloang menoloang) jo mau haja bakalah bamanang (nio sajo kalah manang) maksuiknyo nio sajo maagiah jo manarimo. Bubuhan sabagai kasatuan sosial sangaik kuek ikatannyo dengan ke-gotoangroyoangan. Urang hiduik haruih betutulongan (toloang menoloang), jan hiduik saurang-saurang (manyurang diri).
- Nilai untuak pangambangan diri konsepsi gawi manuntung, yoitu sasaurang dalam mangarajokan sasuatu haruih dapek manyalasaikannyo dengan elok. Sarato konsepsi dalas balangsar dada artinyo biapun haruih basalanca dado nan maknonyo sasaurang haruih bajuang dengan sungguah-sungguah.
- Nilai konsepsi bisa-bisa maandak awak untuak manyasuaikan diri dengan lingkuangan. nasihaik iko biasonyo disampaikan supayo dapek manyasuaikan diri dengan adaik istiadaik
Kabudayoan
![Thumb](http://upload.wikimedia.org/wikipedia/commons/thumb/7/7f/PengantinBanjar.jpg/640px-PengantinBanjar.jpg)
Umumnyo adaik kabudayoan Banjar baraka dari adaik kabudayoan Dayak Kaharingan nan satalah pangislaman massal adaik kabudayoan Kaharingan iko disuntiang untuak disasuaikan dengan kayakinan baru inyo yoitu Islam.
Salah satu contohnyo adolah adaik baayun anak nan pado jaman dahulu adolah ritual pambarkekan anak Kaharingan dengan dibacokan mantra-mantra Balian, kini dalam adaik Banjar nan Islam baayun anak indak lagi manggunokan mantra-mantra Balian akan tetapi dengan pambacoan ayaik suci Al-Quran jo solawat kapado Nabi Muhammad SAW.
Katarampilan Mangolah Lahan Pasang Suruik
Kahidupan urang Banjar tarutamo kalompok Banjar Kuala jo Batang Banyu lakek dengan budayo sungai. Sabagai sarano transportasi, urang Banjar mangambangkan baragam jukung (parahu) sasuai dengan fungsinyo yoitu Jukung Pahumaan, Jukung Paiwakan, Jukung Paramuan, Jukung Palambakan, Jukung Pambarasan, Jukung Gumbili, Jukung Pamasiran, Jukung Beca Banyu, Jukung Getek, Jukung Palanjaan, Jukung Rombong, Jukung/Parahu Tambangan, Jukung Undaan, Jukung Tiung dan lain-lain.[8] Kondisi geografis Kalimantan Selatan nan banyak mampunyoi sungai dimanfaaikan dengan elok-elok oleh urang Banjar, sahinggo salah satu kaahlian urang Banjar adolah mangolah lahan pasang suruik manjadi kawasan budi dayo partanian jo pamukiman.[9] Sistem irigasi khas urang Banjar nan dikambangkan masyarakaik Banjar mangenal tigo macam kanal. Patamao, Anjir (ado juo nan manyabuiknyo Antasan) yoitu samacam saluran primer nan manghubuangkan antaro duo sungai. Anjir bafungsi untuak kapantiangan umum dengan titiak barek sabagai sistem irigasi partanian jo sarano transportasi. Kaduo, Handil (ado juo nan manyabuik Tatah) yoitu samacam saluran nan muaronyo di sungai atau di Anjir. Handil dibuek untuak manyaluakan aia ka lahan partanian daerah daratan. Handil ukuannyo labiah ketek dari Anjir jo marupokan punyo kalompok atau bubuhan tatantu. Katigo, Saka marupokan saluran tersier untuak manyaluakan aia nan biasonyo diambiak dari Handil. Saluran iko baukuran labiah ketek dari Handil jo marupokan punyo kaluargo atau pribadi.
Rumah Banjar
Rumah Banjar adolah rumah tradisional urang Banjar. Arsitektur tradisional ciri-cirinyo antaro lain mampunyoi perlambang, mampunyoi panakanan pado atok, ornamental, dekoratif jo simetris. Rumah tradisonal Banjar adolah tipe-tipe rumah khas Banjar dengan gayo jo ukiannyo ko alah mulai bakambang sabalum tahun 1871 sampai tahun 1935. Dari sakian banyak jenis-jenis rumah Banjar, tipe Bubungan Tinggi marupokan jenis rumah Banjar nan paliang dikenal jo manjadi identitas rumah adaik suku Banjar.
Tradisi lisan
Tradisi lisan oleh urang Banjar sangaik dipangaruahi oleh budayo Malayu, Arab, jo Cino. Tradisi lisan Banjar (nan kamudian hari manjadi sabuah kasenian) bakambang sakitar abaik ka-18 nan di antaronyo adolah Madihin jo Lamut. Madihin barasal dari bahaso Arab, yoitu madah (ﻤﺪﺡ) nan artinyo pujian. Madihin marupokan puisi rakyaik anonim batipe hiburan nan dilisankan atau ditulihkan dalam bahaso Banjar dengan bantuak fisik jo bantuak mental tatantu sasuai dengan konvensi nan balaku sacaro khusus dalam khasanah folklor Banjar di Kalsel. Sadangkan Lamut adolah sabuah tradisi bakisah nan baisi carito manganoi pasan jo nilai-nilai kaagamoan, sosial jo budayo Banjar. Lamut barasal dari negeri Cino jo mulonyo manggunokan bahaso Tionghoa.[10] Namun, satalah dibaok ka Tanah Banjar oleh padagang-padagang Cino, mako bahasonyo disasuaikan manjadi bahaso Banjar.[10]
Teater
Satu-satunyo seni teater tradisional nan bakambang di pulau Kalimantan adolah Mamanda. Mamanda adolah seni teater atau pamantehan tradisional nan barasal dari Kalimantan Selatan. Dibandiang dengan seni pamantehan nan lain, Mamanda labiah sarupo samo Lenong dari sagi hubuangan nan tajalin antaro pamain dengan panonton. Interaksi iko mambuek panonton manjadi aktif manyampaikan komentar-komentar lucu nan dapek mambuek suasano jadi labiah hiduik.[11]
Bedonyo, Kasenian lenong kini labiah mangikuti aman katimbang Mamanda nan monoton pado alua carito karajaan. Sabok pado kasenian Mamanda tokoah-tokoah nan dimainkan adolah tokoah baku saperti Rajo, Perdana Menteri, Mangkubumi, Wazir, Panglima Perang, Harapan Pertama, Harapan kedua, Khadam (Badut/ajudan), Permaisuri jo Sandut (Putri).[11]
Tokoah-tokoah iko wajib ado dalam satiok Pamantehan. Supayo indak katinggalan, tokoh-tokoh Mamanda acok pulo ditambah dengan tokoah-tokoah lain saperti Rajo dari Nagari Subarang, Parompak, Jin, Kompeni jo tokoah-tokoah tambahan lain guno mampakayo carito.
Istilah Mamanda digunokan karano di dalam lakonnyo, para pamain saperti Wazir, Menteri, jo Mangkubumi dipanggia dengan pamanda atau mamanda oleh Sang Rajo. Mamanda sacaro etimologis tadiri dari kato "mama" (mamarina) nan bararti paman dalam bahaso Banjar jo “nda” nan bararti tahormaik. Jadi mamanda bararti paman nan tarhormaik. Yoitu “sapoan” kapado paman nan dihormati dalam sistem kakarabatan atau kakaluargaan.[11]
Musik
Salah satu kasenian barupo musik tradisional khas Suku Banjar adolah Musik Panting. Musik iko disabuik Panting karano didominasi oleh alaik musik nan dinamokan panting, sejenis gambus nan mamakai senar (panting) mako disabuik musik panting. Pado awalnyo musik panting barasa dari daerah Tapin, Kalimantan Selatan. Panting marupokan alaik musik nan dipetik nan babarapo babantuak saperti gabus Arab tetapi ukuannyo labiah ketek. Pado maso dulu musik panting hanyo dimainkan sacaro paurangan atau sacaro solo. Karano samakin majunya pakambangan jaman jo musik panting akan lebih manarik jikok dimainkan dengan babarapo alaik musik lainnyo, mako musik panting mini ko dimainkan dengan alaik-alaik musik saperti babun, gong, jo biola, pamainnyo jugo tadiri dari babarapo orang. Namao musik panting barasa dari namo alaik musik itu surang, karano pado musik panting nan takenal alaik musik nyo jo nan sangaik baparan adolah panting, sahinggo musik tasabuik dinamoi musik panting. Urang nan patamo kali maagiah namo sabagai musik panting adolah A. SARBAINI. Dan kini musik panting terkenal sabagai musik tradisional nan barasa dari Kalimantan Selatan.[12]
Salain itu, ado sabuah kasenian musik tradisional urang Banjar, yoitu Musik Kentung. Musik iko barasa dari daerah Kabupaten Banjar yaitu di desa Sungai Alat, Astambul jo kampuang Bincau, Martapura. Pado maso kini, musik kentung iko alah mulai langko. Maso dahulu alaik musik ko dipatandiangkan. Dalam patandiangan iko indak sajo pado bunyinyo, tetapi juga hal-hal nan basipek magis, saperti kalau dalam patandiangan itu alaik musik iko buliah pacah atau indak dapat babunyi dari kapunyoan lawan batandiang.[13]
Tarian
![Thumb](http://upload.wikimedia.org/wikipedia/commons/thumb/9/92/Tari_Radap_Rahayu.jpg/640px-Tari_Radap_Rahayu.jpg)
Seni Tari Banjar tabagi manjadi duo, yoitu seni tari nan dikambangkan di lingkuangan istano (kraton), jo seni tari nan dikambangkan oleh rakyaik. Seni tari kraton ditandoi dengan namo "Baksa" nan barasal dari bahasa Jawa (beksan) nan manandokan kahaluihan garak dalam tato tarinyo. Tari-tari iko alah ado dari ratuihan tahun nan lalu, samanjak jaman hindu, namun garakan jo busananya alah disasuaikan dengan situasi jo kondisi dewasa iko. Contoahnyo, garakan-garakan tatantu nan dianggok indak sasuai dengan adab Islam mangalami saketek parubahan.
Makanan
Masakan tradisional Banjar diantaronyo: sate Banjar,[14] soto Banjar, katupek Kandangan, kue bingka dan lain-lain.
Tadaek 41 macam kue (wadai) khas Banjar.[15]
- Apam habang
- Apam putih
- Bubur habang
- Bubur putih
- Bubur baayak
- Babungku
- Babalungan halam
- Bingka
- Cingkaruk habang
- Cingkaruk putih
- Cincin
- Cucur habang
- Cucur putih
- Cucur kuning
- Dodol habang
- Dodol putih
- Gagatas habang
- Gagatas putih
- Hintalu karuang
- Kakicak habang
- Kakicak putih
- Kakicak gumbili
- Kakulih habang
- Kakulih putih
- Kalalapun
- Lakatan putih bahinti
- Lakatan kuning bahintalu
- Lamang
- Lupis
- Pupudak baras
- Pupudak sagu
- Papari
- Putu mayang
- Roti baras habang
- Roti baras putih
- Roti sagu
- Surabi
- Paliat
- Tapai baras
- Tapai gumbili
- Ular-ular
- Wajik
Populasi
Manuruik sensus BPS tahun 2010 populasi suku Banjar bajumlah 4.127.124.[16] Suku Banjar tadapek di saluruah provinsi Indonesia dengan 2.686.627 diantaronyo tingga di Kalimantan Selatan. Populasi suku Banjar dalam jumlah gadang juo dapek dijumpokan di Kalimantan Tengah (464.260) jo Kalimantan Timur (440.453) nan marupokan daerah parantauan primer urang Banjar. Di pulau Sumatra urang Banjar banyak tadapek di Riau (227.239), Sumatra Utara (125.707) jo Jambi (102.237) karano migrasi urang Banjar pado abaik ka-19 di pasisia timua Sumatra.
Populasi suku Banjar diantaronyo sabagai barikuik:[17]
Provinsi | Populasi Suku Banjar | Jumlah Panduduak | Konsentrasi | Distribusi |
---|---|---|---|---|
Kalimantan Selatan | 2.686.627 | 3.626.616 | 74,08% | 65,10% |
Kalimantan Tengah | 464.260 | 2.212.089 | 20,99% | 11,25% |
Kalimantan Timur | 440.453 | 3.553.143 | 12,40% | 10,67% |
Riau | 227.239 | 5.538.367 | 4,10% | 5,51% |
Sumatra Utara | 125.707 | 12.982.204 | 0,97% | 3,05% |
Jambi | 102.237 | 3.092.265 | 3,31% | 2,48% |
Kalimantan Barat | 14.430 | 4.395.983 | 0,33% | 0,35% |
Jawa Timur | 12.405 | 37.476.757 | 0,03% | 0,30% |
Kepulauan Riau | 11.811 | 1.679.163 | 0,70% | 0,29% |
Jawa Barat | 9.383 | 43.053.732 | 0,02% | 0,23% |
Daerah Khusus Ibukota Jakarta | 8.572 | 9.607.787 | 0,09% | 0,21% |
Sulawesi Selatan | 3.837 | 8.034.776 | 0,05% | 0,09% |
Sulawesi Tengah | 3.452 | 2.635.009 | 0,13% | 0,08% |
Aceh | 2.734 | 4.494.410 | 0,06% | 0,07% |
Banten | 2.572 | 10.632.166 | 0,02% | 0,06% |
Daerah Istimewa Yogyakarta | 2.545 | 3.457.491 | 0,07% | 0,06% |
Jawa Tengah | 2.336 | 32.382.657 | 0,01% | 0,06% |
Sumatra Selatan | 1.442 | 7.450.394 | 0,02% | 0,03% |
Nusa Tenggara Barat | 1.083 | 4.500.212 | 0,02% | 0,03% |
Sulawesi Utara | 594 | 2.270.596 | 0,03% | 0,01% |
Sulawesi Tenggara | 499 | 2.232.586 | 0,02% | 0,01% |
Lampung | 411 | 7.608.405 | 0,01% | 0,01% |
Sumatra Barat | 355 | 4.846.909 | 0,01% | 0,01% |
Bali | 349 | 3.890.757 | 0,01% | 0,01% |
Papua | 327 | 2.833.381 | 0,01% | 0,01% |
Bangka Belitung | 249 | 1.223.296 | 0,02% | 0,01% |
Sulawesi Barat | 221 | 1.158.651 | 0,02% | 0,01% |
Maluku | 213 | 1.533.506 | 0,01% | 0,01% |
Nusa Tenggara Timur | 200 | 4.683.827 | 0,00% | 0,00% |
Bengkulu | 180 | 1.715.518 | 0,01% | 0,00% |
Papua Barat | 165 | 760.422 | 0,02% | 0,00% |
Gorontalo | 134 | 1.040.164 | 0,01% | 0,00% |
Maluku Utara | 102 | 1.038.087 | 0,01% | 0,00% |
Total | 4.127.124 | 237.641.326 | 1,74% | 100,00% |
Subetnis jo diaspora
Subetnis
Badasarkan sistem sosiokultural masyarakaik Banjar, etnis Banjar dapek dibagi ka dalam tigo kalompok subetnis utamo, diantaronyo:
- Batangbanyu
Kalompok subetnis Banjar Batangbanyu sacaro hakikeknyo marujuak kapado kalompok etnis Banjar nan mayoritas bamukim di kawasan kisaran sungai.
- Kuala/kwala
Banjar Kuala didefinisikan sabagai masyarakaik etnis pribumi Banjar nan alah malakukan kawin campua samo etnis lainnyo nan barasa dari lua kawasan pulau Kalimantan, nan diantaronyo mancakup etnis Bugis, etnis Jawa, jo sabagainyo. Kato kuala atau kwala itu dalam bahaso Banjar bamakno "patamuan" atau "pacampuan".
- Pahuluan
Banjar Pahuluan marujuak kapado goloangan etnis Banjar nan barasa dari kawasan dataran tinggi atau pagunuangan, nan mano masyarakaik Banjar Pahuluan masih mampunyoi banyak kadakekan dengan etnis sarumpunnyo yoitu etnis Bukik (atau acok disabuik sabagai Dayak Meratus) nan mayoritas mauni kawasan pagunuangan Meratus.
Diaspora
Sabagai etnis nan suko malakukan paniagoan, etnis Banjar alah manyebar ka saluruah balahan dunia sajak jaman lampau untuak mamparoleh paruntuangan di barbagai tampek. Dalam cakupan banua Asia, kawasan Asia Tenggara jo Timur Tangah marupokan duo kawasan nan mampunyoi populasi sebaran diaspora Banjar tagadang di dunia; dengan saindaknyo ado kurang labiah sakitar 2–3 juta populasi di negara Brunei (khususnyp di kawasan tenggara Brunei), Sabah, Sarawak, Singapura, maupun Malaysia (khususnyo di Provinsi Perak).
Namun damikian, tadapek pulo komunitas minoritas diaspora masyarakaik Banjar di balahan banua lainnyo nan mancakup Australia, Amerika, maupun Afrika. Bahkan, babarapo studi genetik pado maso modern mangindikasikan bahwo leluhur masyarakaik etnis Malagasi di kawasan baraik pulau Madagaskar jo babarapo etnis lainnyo di timua Afrika (utamonyo kawasan Komoro) marupokan katurunan dari diaspora masyarakaik Dayak nan barasal dari daerah Banjar di selatan Kalimantan.[18]
Tokoah Masyarakaik
- A.A. Hamidhan, anggota PPKI 1945
- Abdul Hafiz Anshari, Ketua Komisi Pemilihan Umum 2007-2012
- Abdoel Wahab Sjahranie, Gubernur Kalimantan Timur 1967-1978.
- Dr. H. Abdurrahman M. Fachir, Wakil Menteri Luar Negeri 2014-kini
- Aberanie Sulaiman, Gubernur Kalimantan Selatan 1963-1968.
- Anang Ardiansyah, pambuek lagu
- Agus Sasirangan, koki
- Ardiansyah, grandmaster catur
- Arul Ifansyah, Panyanyi Band Power Metal.
- Bopak Castello, Palawak
- Denny Indrayana, Wakil Menteri Hukum dan HAM 2011-2014.
- Djohan Effendi, Menteri Sekretaris Kabinet 2000-2001.
- Fadjroel Rachman, Juru Bicara Presiden.2019-kini
- Fakhriansyah, atlet gulat.
- Drs. H. Gusti Hasan Aman, Gubernur Kalimantan Selatan 1995-2000.
- Prof. Gusti Muhammad Hatta, Menteri Lingkungan Hidup 2009-2011, Menteri Riset dan Teknologi 2011-2014.
- Gusti Mayur, wartawan.
- Gusti Sholihin, Palukih
- Hasan Basry, Pahlawan Nasional Indonesia.
- Ian Kasela, Panyanyi Band Radja.
- Idham Chalid, Wakil Perdana Menteri 1956-1959, Menteri Koordinator Kesejahteraan Rakyat 1968-1973, Menteri Sosial 1970-1971, Ketua MPR/DPR RI 1971-1977, Ketua DPA 1978-1983, Pahlawan Nasional Indonesia.
- Jhon Tralala, seniman madihin.
- Liem Koen Hian, anggota BPUPKI.
- Syekh Muhammad Arsyad al-Banjari, ulama Banjar.
- K.H. Muhammad Arifin Ilham, Ketua Majelis Adz Dzikra Jakarta.
- M. Jamani, Gubernur Kalimantan Selatan 1968-1970.
- Ir. H. M. Said, Gubernur Kalimantan Selatan 1984-1995.
- Muhammad Zaini Abdul Ghani, ulama jo tokoah Islam Indonesia.
- Mahyudin, Wakil Ketua MPR 2014-kini.
- Mubramsyah, Duta Besar RI untuak Irak.
- Olla Ramlan, artis.
- Pangeran Antasari, Pahlawan Nasional Indonesia.
- Pangeran Hidayatullah, pajuang.
- Pangeran Muhammad Noor, Gubernur Kalimantan 1945-1950, Menteri Pekerjaan Umum 1956-1959.
- Rebecca Suwignyo, koki
- Ir. H. Rudy Ariffin, Gubernur Kalimantan Selatan 2004-2014.
- Drs. Saadillah Mursjid, MPA, Menteri Sekretaris Kabinet 1988-1998, Menteri Sekretaris Negara 1998.
- Sjachriel Darham, Gubernur Kalimantan Selatan 2000-2005.
- Kapten Syamsuddin Noor, pajuang TNI AU.
- Syamsul Mu'arif, Menteri Negara Komunikasi dan Informatika 2001-2004.
- H. Syarifuddin, Imam Gadang Masjid Istiqlal.
- Brigjen Pol Dr. H. Taufiq Effendi, MBA, Menteri Negara Pendayagunaan Aparatur Negara dan Reformasi Birokrasi 2004-2009.
- Yulita Intan Sari, koki
- Letjen Z.A. Maulani, Kapalo BIN 1998-1999.
Rujuakan
Bibliografi
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.