![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/3/3e/Flag_of_New_Zealand.svg/langmin-640px-Flag_of_New_Zealand.svg.png&w=640&q=50)
Selandia Baru
From Wikipedia, the free encyclopedia
Selandia Baru adolah sabuah nagara kapulauan di barat daya Lautan Pasifik. Nagara ko tadiri dari duo pulau utamo sarato labiah dari 700 pulau ketek.[1] Pulau utamonyo, Pulau Utara jo Pulau Selatan dipisahan dek Selat Cook.[2] Salain itu, nagara ko bantuaknyo mamanjang nan labiah dari 1.600 km jo leba maksimum 400 km[3] jo total laweh daratan 268.000 km2.[4] Dek karano pulau-pulau ketek lataknyo bajauahan sarato garih pantainyo nan panjang, sakitar 15.000 km, Selandia Baru punyo sumber daya laut nan malimpah. Zona ekonomi eksklusifnyo salah ciek nan tagadang di dunia, bahkan 15 kali labiah gadang dari daratannyo.[5]
![Thumb image](http://upload.wikimedia.org/wikipedia/commons/thumb/3/3e/Flag_of_New_Zealand.svg/640px-Flag_of_New_Zealand.svg.png)
Selandia Baru marupokan nagara monarki konstitusional jo demokrasi parlementer[6] nan mano Charles III sabagai kapalo nagara,[7] nan diwakian dek Gubernur Jenderal.[8] Pardana Mantari manjadi kapalo pamarentahan nan mamimpin kabinet.[9] Kuaso legislatif dipacik dek Dewan Perwakilan Rakyat basamo Rajo. Sabalum tahun 1950, ado pulo Dewan Legislatif nan kemudian dihapuihan.[10]
Manuruik sensus nagara pado tahun 2018, Selandia Baru mampunyoi panduduak 4.699.755 jiwa,[11] maningkek 10,8% dibandiangan jo hasia sensus tahun 2013. Pado tahun 2024, panduduaknyo dipakiroan bajumlah 5.281.810.[12] 71,8% panduduak marupokan urang Eropa, 16,5% urang Maori, 15,3% Asia jo 9,0% Pasifik, nan sapatigonyo tingga di Auckland.[11]