From Wikipedia, the free encyclopedia
Rafflesia arnoldii, karubuik, atau cindawan biriang,[1] adolah spesies tumbuahan parasit babungo dari genus Rafflesia. Bungo ko tacataik sabagai bungo tungga paliang gadang di dunia.[2] Bungo ko mampunyoi baun nan sabana busuak cando bangkai, sainggo acok pulo diimbau bungo bangkai.[3] Inyo adolah tumbuahan endemik (asali) rimbo Sumatera jo Kalimantan.[4] Walau ado pulo tumbuahan lain nan labiah gadang bungonyo cando karubuik titan arum (Amorphophallus titanum) jo palma talipot (Corypha umbraculifera), kaduonyo sacaro teknis adolah kumpulan dari banyak bungo.
Rafflesia arnoldii
| |
---|---|
Taksonomi | |
Divisi | Tracheophyta |
Subdivisi | Spermatophytes |
Klad | Angiospermae |
Klad | mesangiosperms |
Klad | eudicots |
Klad | core eudicots |
Klad | Superrosidae |
Klad | rosids |
Klad | fabids |
Ordo | Malpighiales |
Famili | Rafflesiaceae |
Genus | Rafflesia |
Spesies | Rafflesia arnoldii R.Br., 1821 |
| |
Tata namo | |
Asal namo | Joseph Arnold (id) |
Sinonim takson |
|
Distribusi | |
Endemik (id) | Sumatra jo Kalimantan (id) |
Rafflesia arnoldii (bahaso Indonesia: padma raksasa) di Indonesia tamasuak ciek dari tigo bungo nasional. Duo bungo lainnyo yaitu bungo malua (malati) jo anggrek bulan.[5] Sacaro resmi dianggap sabagai bungo langka nasional (puspa langka nasional) manuruik Keputusan Presiden No. 4 tahun 1993.[6]
Urang Eropa partamo nan manamukan Rafflesia adolah panjalajah Parancih nan banamo Louis Auguste Deschamps. Pado maso itu, inyo malakukan panalitian ka Asia dan ditahan dek pihak Balando salamo tigo taun di Jawa, sarato diminta untuk manjalajah jo manaliti. Pado 1797 inyo mangumpuakan spesimen nan kini dikatahui sabagai Rafflesia patma. Salamo palayaran baliak di taun 1798, kapanyo diambiak Inggirih sainggo sadoalah panalitiannyo disita dek pihak Inggirih. Panalitiannyo dinyatokan ilang, dan akhianyo ditamukan pado taun 1954 di Museum Sijarah Alam Britania (British Museum of Natural History). Kajadian ko mambuek raso curiga di kalangan panaliti ka pihak Inggirih nan dianggap manyambunyikan panalitian Deschamps sabagai klaim kabarasilan nagarinyo surang.[7][8][9]
Pado 1818, ahli badah Inggirih, Joseph Arnold mangumpulkan spesimen Rafflesia spesies lain nan sangkek tu ditamukan dek palayan Malayunyo di Bengkulu, salamo maso pamarintahan Letnan Gubernur Bengkulu, Stamford Raffles.[10] Indak lamo sasudah itu, Armold maningga dek sakik dan hasia panalitiannyo disarahkan ka Robert Brown untuak dipalajari.[10] Brown kudian maagiah pidato sabalun patamuan Linnean Society of London pado bulan Juni 1820 dan di sinan inyo mantanamokan genus tumbuahan baru ko jo namo Raffesia untuak maagiah horomaik ka Raffles jo namo spesies arnoldii.[8]
Rafflesia arnoldii marupokan tumbuahan bapambuluah (vaskular). Walaupun baurek, inyo indak badaun, babatang, atau baurek surang, sarato indak baklorofil. Inyo iduik sabagai tumbuahan holoparasit (nan bagantuang jo induaknyo) dari genus Tetrastigma (Indonesia: Talikoja). Cando cindawan, R. arnoldii tumbuah dari untaian jaringan sarupo banang nan sapanuahnyo tatanam ka tumbuahan induaknyo untuak mandapek nutrisi jo aia. Satu-satunyo bagian darinyo nan dapek dikenali sabagai tumbuahan adolah bungonyo. Bungonyo gadang, barono coklat sirah, sarato babaun dagiang busuak.[1]
Bungo Rafflesia arnoldii tumbuah jo diameter mancapai sameter (3,3 kaki),[11] bareknyo mancapai 11 kilogram (24 lb).[12] Bungo-bungonyo kambang dari kuncuik saleba 30 cm (12 in), ampia sagadang lobak, nan barono sirah marun atau coklat tuo. Dari catatan salamo ko, kuncuik bungo paliang gadang nan panah tacataik ditamukan di Gunuang Sago pado bulan Mei 1956 nan mancapai diameter 43 cm.[13] Dek panaliti Indonesia, kuncuik bungo acok disabuik 'knop'.[14]
Rafflesia arnoldii ditamukan di hutan hujan primer jo sekunder. Tumbuah jo manompang ka tumbuahan induak. Satu-satunyo tumbuahan inangnyo di Sumatera Barat adolah Tetrastigma leucostaphylum. Tetrastigma surang sajinih parasit nan manggunokan kakuatan dari tagaknyo tumbuahan lain di sakitarnyo untuak mandapek cahayo. Wakatu mudo, Tetrastigma tumbuah manggulampai mamanjek pohon-pohon mudo cando jilatang gajah (Laportea stimulans) jo kopi robusta (Coffea canephora) di hutan primer. Tetrastigma ka manyalimuti tanaman inangnyo sainggo maalangi cahayo masuak ka dasa hutan dan hal iko disukoi dek Rafflesia arnoldii.[1]
Rafflesia arnoldii ditamukan dapek manompang tumbuah di tanah basa, netral, dan asam. Inyo indak tasuo jauah dari aia sarato ado di katinggian 490 inggo 1.024 meter.[1]
Tuneh R. arnoldii paralu babarapo bulan untuak dapek tumbuah dan hanyo etongan ari untuak kambang bungonyo. Jinih bungonyo adolah gonochoris, nan aratinyo hanyo ado ciek jinih kelamin untuak ciek bungo, dan paralu kaduo bungo supayo penyerbukan barasia.[1]
Katiko R. arnoldii siap untuak bareproduksi, tuneh ketek tabantuak kalua dari urek atau batang inangnyo nan kudian dapek bakambang dalam maso satahun. Tunehnyo babantuak lobak nan samakin lamo mambukak manjadi bungo. Putiak ataupun banang sarinyo malakek jo cakram baduri nan ado di dalam bungo. Baun busuaknyo mamikek langau untuak inggok. Supayo penyerbukannyo barasia, langau musti inggok ka kaduo jinih bungo. Bungonyo pun mahasiakan bungo nan lataknyo di dalam bungo, babantuak cawan tabaliak jo barisi banyak bijo.[15][1]
Jinih langau nan biaso inggok adolah Drosophila colorata, Chrysomya megacephala, jo Sarcophaga haemorrhoidalis. Samantaro serangga lain cando samuik itam (genus Euprenolepis) dapek mamakan tuneh dan mamatikannyo.[1]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.