![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/c/cc/Reva_charging.jpg/640px-Reva_charging.jpg&w=640&q=50)
Oto listrik
From Wikipedia, the free encyclopedia
Oto listrik iolah oto nan digariakan dek motor listrik, manggunoan energi listrik nan disimpan dalam baterai atau tampek panyimpanan energi lainnyo. Oto lisrik sangaik populer di akhir abad ke-19 jo awal abad ke-20, tapi kamudian maredup karano teknologi masin pambakaran dalam nan samakin maju jo harago kandaraan babahan baka bensin nan samakin murah. Krisis energi pado tahun 1970-an jo 1980-an pernah mambangkikan saketek minaik pado oto-oto listik ko, tapi pado tahun 2000-an lah para produsen kandaraan baru manaruah parhatian nan serius pado kandaraan listrik. Dek mangko bak itu dikaranokan harago minyak nan mambumbuang tinggi pado tahun 2000-an sarato banyak masyarakat dunia nan alah sadar akan buruaknyo dampak emisi gas rumah kaco[1][2]. Sampai bulan Novmber 2011[3], model-model listrik nan tasadio dan dijua di pasa-pasa babarapo negri iolah Tesla Roadster, REVAi, Renault Fluence Z.E., Buddy, Mitsubishi i MiEV, Tazzari Zero, Nissan Leaf, Smart ED, Wheego Whip Life, Mia listrik, dan BYD e6. Nissan Leaf, di jua labiah dari 20.000 unit di saluruah dunia (sampai November 2011), dan Mitsubishi i-MiEV, dijua global labiah dari 17.000 unit (sampai Oktober 2011), iolah kaduo oto listrik paliang laku di dunia.
![Thumb image](http://upload.wikimedia.org/wikipedia/commons/thumb/c/cc/Reva_charging.jpg/640px-Reva_charging.jpg)
![Thumb image](http://upload.wikimedia.org/wikipedia/commons/thumb/f/f8/2013-Monster-Tajima-Giti-EV.jpg/640px-2013-Monster-Tajima-Giti-EV.jpg)
![Thumb image](http://upload.wikimedia.org/wikipedia/commons/thumb/4/4d/OSCar_eO_Dakar_2012.jpg/320px-OSCar_eO_Dakar_2012.jpg)
Oto listrik mamiliki babarapo kalabiahan nan potensial jikok dibandiangan jo oto bamesin pembakaran dalam biaso. Nan paliang utamo iolah oto listrik indak manghasilkan emisi kendaraan bermotor.[4][5] Salain tu, oto jenis iko dapek manguranggi emisi gas rumah kaco karano indak mambutuhkan bahan baka fosil sabagai pangerak utamonyo. Pado akhirnyo, katagantuangan minyak dari lua nagari pun bakurang, karano bagi babarapo nagari maju sarupo Amerika Serikat jo banyak nagari Eropa,[1][6] kanaikan harago minyak dapek manakan ekonomi mereka. Bagi nagari bakembang, harago minyak nan tinggi samakin mambaraikan naraca pambayiaan nagari, sahinggo maambek patumbuahan ekonomi nagari.[7][8]
Maskipun oto listrik punyo babarapo kauntuangan potensial sarupo nan disabuikan di ateh, tapi pangunoannyo sacaro maluas mamiliki banyak paambek dan kakuranggan. Sampai di tahun 2011, harago oto listrik masih jauah labiah maha dibandiangan jo oto bamasin bensin biaso nan kandaraan listrik hibrida karano harago batrai ion litium nan maha.[9] Maskipun dek tu, kini ko harago batrai mulai turun karano mulai diproduksi dalam jumlah gadang.[10] Faktor lainyo nan maambek tumbuahnyo panggunoan oto listrik iolah masih saketeknyo stasiun pangisian batrai untuak oto listrik, ditambah katakuikan pagendara jo habisnyo isi batrai oto sabalum sampai ka tujuan. Babarapo pamarentah di babarapo nagari di dunia alah manabikan babarapo insentif jo aturan untuak mananggulangi masalah ko, nan tujuannyo untuak maningkatkan panjualan oto listrik, untuak mambiayai pagembangan teknologi oto listrik sahinggo harago batrai jo komponen oto bisa samikin efisien. Pamarentah Amerika Serikat alah mambarikan dana hibah sagadang US$2,4 miliar untuak pangembangan oto listrik jo batrai.[11] Pamarintah Cino mangumumkan bahwa inyo akan manyadiokan dana gadang US$15 miliar untuak mamulai industri oto listrik di nagarinyo. babarapo pamarentah lokal jo nasional di banyak nagari alah manabikan kredik pajak, subsidi, dan banyak insentif lainnyo untuak mangurangi harago oto listrik jo oto plug-in.[12][13]
Di nagari Indonesia ko, pado tanggal 1 April 2012 pamarentah kucuaan 100 miliar rupiah untuak riset oto listrik.[14] Lanjuik tanggal 10 juni 2013 pamarentah tegaskan kandaraan listrik bebas pajak. Dan kamudian pado tanggal 12 Juni 2013 Zbee dari Swedia resmi mambukak pabrik kandaraan listrik dengan namo PT Lundin Industry, nan talatak di Kota Banyuwangi, Jawa Timur, dengan target produksi minimal 100.000 unit per tahun.