Museum
From Wikipedia, the free encyclopedia
Museum adolah ciek lembaga nan marawaik atau mamaliaro koleksi artefak jo objek seni, budaya, sijarah, atau kapantiangan ilmiah lainnyo. Banyak museum umum punyo babagai koleksi bebas untuak dicaliak urang banyak barupo pameran nan bantuaknyo parmanen atau samantaro.[1] Museum gadang umumnyo talatak di kota-kota gadang di dunia, samantaro museum lokal tadapek di kota-kota nan labiah ketek, di daerah, atau di pakampuangan. Tiok-tiok museum punyo tujuan nan balainan, mulai dari malayani panaliti jo spesialis inggo malayani masarakaik umum. Tujuan malayani panaliti kini ko samakin bagarak ka arah malayani masarakaik umum.
Ado banyak jinih museum, antaro lain museum seni, museum sijarah alam, museum sains, museum parang, jo museum anak-anak. Museum tagadang jo tabanyak dikunjuangi di dunia antaro lain Museum Louvre di Paris, Museum Seni Metropolitan di Kota New York, Museum Nasional Cino di Beijing, Institut Smithsonian di Washington, D.C., Museum Britania jo Galeri Nasional di London, sarato Museum Vatikan di Kota Vatikan. Manuruik Dewan Museum Internasional, ado labiah dari 55.000 museum di dunia nan taseba di 202 nagara.[2]