From Wikipedia, the free encyclopedia
Ny Umma na Ummah dia ny vondrom-piarahamonin' ny Mozilmana rehetra, na inona na inona firenena niaviany na ny fahefana ara-pôlitika mifehy azy tsirairay sy isan-tokony. Atao hoe أمة / Umma izany amin' ny teny arabo.
Ny teny hoe Umma na Ummah dia avy amin' ny teny arabo hoe أمّة / umma, izay midika hoe "vondrom-piarahamonina" na "firenena" — mitovy fototra amin' ny teny hoe أمّ / umm izay midika hoe "reny". Ny Ummat dia ny firenena, vobndrom-piarahamonin' ireo izay teraka avy amin' ny reny iray ihany.
Mitovy hevitra amin' ny hoe أمة الإسلام / Ummat al-Islām ("fiaraha-monina silamo") na Ummat Islamiyya ny teny hoe Umma, izay midika hoe "ny firenena silamo"; matetika io teny io no anondroana ny fiarahamonina itambaran' ny vahoaka silamo rehetra.
Ao amin' ny tontolon' ny panislamisma sy ara-pôlitika, ny teny hoe ummah dia azo ampiasaina mba handikana ny foto-kevitry ny Fiombonan' ny Mpino Silamo (أمة المؤمنين / Ummat al-Muʼminīn).
Ao amin' ny Kor'any ny Ummah dia matetika manondro vondrona tokana miray finoana ara-pivavahana, indrindra ireo izay tanjonin' ny drafitry ny famonjena avy amin' Andriamanitra.
Tsy mitovy amin’ ny an’ ny teny hoe “Eglizy” na "Fiangonana" (ecclesia amin’ ny teny latina) eo amin’ ny Kristiana ny foto-kevitra entin' ny teny hoe Umma (eny fa na dia amin’ ny heviny manondro ny firambaran' ny mpino aza) satria ny Fiangonana na ny Eglizy dia ataon' ny Kristiana hoe "Vatan’ i Kristy Jesoa, Zanak' Andriamanitra. Eto ny Ummah dia manana heviny araka olona (ny mpino rehetra) sy ara-pôlitika (ny firenena islamika) ary ara-panahy (vondrom-piarahamonina mozilmana).
Tsy afangaro amin' ny hoe شعب / Sha`b, izay midika hoe "firenana" na "vahoaka manana razambe iraisana na fiaviana ara-jeôgrafia iraisana" koa, ny hoe Umma.