I Nôa na Nôe dia ilay lehilahy voalaza ao amin' ny Baiboly fa sisa tsy maty niaraka tamin' ny ankohonany, tamin' ny Safodrano teto an-tany nataon' Andriamanitra handringanana ny olombelona izay nanota tamin' ny fomba mihoa-pampana[1].
Fanati-pisaorana nataon' i Nôa (tokony tamin' ny taona1803), sary nataon' i Joseph Anton Koch. Nanorina alitara ho an' i Iahveh i Nôa taorian' ny nanafahana azy tamin' ny Safodrano; nandefa avana ho famantarana ny fanekeny Andriamanitra (Genesisy 8–9).
Ny tantaran' i Nôa dia hita ao amin' ny Baiboly sy ny Kor'any nefa misy fahasamihafany ny fomba fitantaran' ny boky tsirairay.
Ny Safodrano
Ny Sambofiaran' i Nôa, sary nataon' i Edward Hicks, taona 1846.
Araka ny Bokin' ny Genesisy ao amin' ny Baiboly dia nanamboatra sambofiara izay nitondra azy mianakavy sy ny biby nasain' Andriamanitra nentiny i Nôa ka ireo no nitaranaka nameno ny tany indray taorian' ny Safodrano. I Nôa no razamben' ny olombelona rehetra tamin' ny alalan' ny vinantovaviny sy ny zanany telolahy, dia i Sema sy i Hama (na Kama) ary i Jafeta.
Ny fanozonana an' i Hama
Ny fahamamoan' i Nôa
Indray andro dia mamon-divay i Nôa ka hitan' i Hama na Kama ny fitanjahany nefa tsy nanao afa-tsy ny nilaza izany tamin' ny rahalahiny izy ka ireto no nampitafy an-drain' izy ireo. Rehefa nisava ny hamamoan' i Nôa dia nanozona izy ka nanambara fa ho andevon' i Sema sy i Jafeta i Kanaana zanak' i Hama.
Ao amin' ny finoana silamo dia atao amin' ny teny arabo hoe نوح / Nûh i Nôa sady anisan' ny mpaminany nataon' Andriamanitra ho irany tety ambonin' ny tany tamin' ny alalan' ny fanambaràna (ar.: Risala "iraka", "mpitondra hafatra"). Ny toko faha-71 ao amin' ny Kor'any dia mitondra ny anarany sady itantarana ny toriteny izay nataony tamin' ny mpiara-belona taminy mba hanaiky ny didin' Andriamanitra tokana. Nitory ny tenin' Andriamanitra ilay Tokana tamin' ny mpanompo sampy izy (Kor'any 71:23). Ao amin' io soràta io dia voatanisa ny anaran' ny andriamanitry ny mpanompo sampy nivavahan' ny vahoakany, dia i Oda (ar.: Wudd), i Soà (arabo: Souwa'â), i Iagota (arabo: Yaghuth), i Iaoka (arabo: Ya'â'uq) ary i Nasra (arabo: Nasr).
Ny firesahana momba an' i Nôa ao amin' ny Kor'any dia misy fahasamihafana amin' izay hita ao amin' ny Baiboly. Tsy voatonona anarana sady tsy fantatra isa ireo zanaka lahin' i Nôa.
Nitory teny nandritra ny 950 taona teo anivon' ny vahoakany tamim-paharetana i Nôa (Kor'any 29:14) nefa olona vitsy no nanaraka azy ka ny ankamaroan' ireo dia olona mahantra. Nilaza taminy i Allah fa tsy hisy olona hafa intsony hanaraka azy. Ny ankamaroan' ny olona izay mpanompo sampy sy mpivavaka amin' andriamanitra maro dia nihevitra azy ho mpandainga (Kor'any 11:36).
Nanamboatra ny sambofiara (arabo: fulk) i Nôa araka ny baiko sy ny toromarika nomen' Andriamanitra (Kor'any 11:38-40) nefa ireo lehiben' ny tanàna dia nihomehy azy. Noho izany dia nampandevezin' Andriamanitra ny lafaoro ka niondrana tao amin' ilay sambofiara i Nôa sy ny tsiroaroa mpivady amin' ny zavamananaina rehetra sy ny ankohonany, afa-tsy ilay zanany voaozona, ary mpino vitsivitsy. Tsy fianakaviana akaikin' i Nôa avokoa ny olona tafiditra tao amin' ny sambofiara fa ny olona rehetra mino an' Andriamanitra (Kor'any 11:40).
Nisy tamin' ny havany no maty tao amin' ny safodrano. Tsy nanaraka azy ny vadiny (sahala amin' ny vadin' i Lôta nandritra ny fandravan' Andriamanitra an' i Sôdôma sy Gômôra) (Kor'any 6:10). Ny iray tamin' ny zanaka lahin' i Nôa dia tsy nety niondrana tamin' ny sambofiara fa nitady fialofana teny amin' ny tendrombohitra nefa natelin' ny rano satria tsy zanany ara-panahy izy fa naman' ireo izay nandà an' Andriamanitra (Kor'any 11:44-46).
Teo amin' ny Tendrombohitra Jōdȳ (arabo: جبل جودي / Jebel Ǧūdī), izay mety ho teo amin' ny tangoron-tendrombohitra Ararata no nipetrahan' ilay sambofiara tamin' ny farany. Miresaka ny amin' ny onjan-drano lehibe avo dia avo toy ny tendrombohitra ny Kor'any (Kor'any 69:11-12).
Ny tantara momba ny fahamamoan' i Nôa dia tsy hita ao amin' ny Kor'any ary inoan' ny mpino silamo fa voaaron' Andriamanitra amin' ny fahamamoana izy.
