From Wikipedia, the free encyclopedia
Ny gidro dia karazam-biby ao amin' ny fianakaviana Lemuridae. Eulemur mongoz ny anarany ara-tsiansa. Mirefy 30 hatramin' ny 40 sm io biby io ary ny rambony dia mirefy 40 hatramin' ny 65 sm eo ho eo.
Mipetraka anaty ala maina any andrefana amin’ i Madagasikara izy. Nampidirina azy ny tany Kômôro, ka anaty ala mando no fonenany any. Mivoaka andro na alina ny gidro, arakaraka ny fizaràn-taona.
Ity biby ity dia miaina anaty vondrom-pianakaviana kely misy ray sy reny ary zanany iray hatramin' ny efatra. Tsy fahita firy ny fihaonana eo amin' ny vondrona samihafa ary tsy misy ny herisetra raha mifanena.
Ny gidro dia mihinana voankazo masaka sy manta. Mihinana voa, ravina, vony, mamim-bony, zana-borona ary vitsika koa izy. Miovaova arakaraka ny vanin-taona ny sakafony, betsaka kokoa ny ravina haniny amin’ ny vanin-taona maina ary betsaka ny mamim-bony amin’ ny vanin-taona mando. Amin' ny vanim-potoana maina ihany izy no mihinana vorona sy vitsika.