Welsh hierevoetbalèlftal

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

't Welsh voetbalèlftal in 2011, aon de veuraovend vaan 'ne match tege Bulgarije.

Wales heet es eine vaan de veer deilstaote vaan 't Vereineg keuninkriek vaanajds 'n eige voetbalèlftal, wat op toernoje wie 't Europees kampioensjap en 't Wereldkampioensjap maag aontrejje. Op de Olympische Speule is dat evels neet touwgestande; daoveur moot me e Brits hierevoetbalèlftal formere. Nao Ingeland en Sjotland is Wales 't daarde ajdste nationaol voetbalèlftal op de wereld. Door 't klein aontal inwoeners vaan Wales heet 't Welsh èlftal neet väöl succes behaold. Hunne bèsten tied beleve ze midde jaore 2010; in oktober 2015 haolde ze 'n historische achste plaots op de FIFA-Wereldraanklies. Bijnaom vaan 't team is Y Dreigiau (Welsh) of The Dragons (Ingels).

Historie

Nao de opriechting vaan 'n apaarte Sjotse voetbalboond en d'n dao-op volgenden interland Sjotland-Ingeland in 1872 besloot me dat in Wales ouch te goonle. In 1876 woort zoe de Football Association of Wales (FAW) opgeriech. Op 25 miert vaan dat jaor späölde Wales zienen ierste wèdstried tege Sjotland, dee ze mèt 4-0 verlore. In 1906 kaom Wales bij de FIFA, meh wie de drei aander Britse boonde kraoge ze vreigel euver 't betaole vaan speulers, zoetot ze oetindelek in 1928 weer oet de wereldboond stapde. Heidoor sjreef Wales ziech neet in veur de ierste drei WK's.

In 1946 kaom de Britte weer bij de FIFA. 't Niveau vaan 't voetbal bleek evels neet zier hoeg in vergelieking mèt de aander voetballen, die ziech good oontwikkeld hadde. Toch kaom dao in de jaore 1950 verbetering in, zoe zier zelfs tot me later vaan 'n 'gouwe generatie' is goon spreke. 't Team woort geplaots veur 't WK vaan 1958; hei móste evels wel lotinge aon te pas koume naotot in de kwalificatie oonregelmaoteghede waore gebäörd. 't Land haolde de kwartfinaal.

De decennia dao-op wis Wales ziech noets veur e groet toernooj te plaotse, al kaome ze in 1976 kortbij kwalificatie veur 't EK. Dao-aon dege toen nog mer veer lan mèt; Wales haolde in de veurrundes de lèste ach. Ouch later wis 't èlftal soms aonsprekende euverwinninge te hole; in 1994 kaome ze kortbij plaotsing veur 't WK in de Vereinegde Staote. 't Groet succes kaom pas nao 2012, mèt ex-international Chris Coleman es trainer. Zienen tied bij Wales veel same mèt de opkoms vaan staarspeuler Gareth Bale. Dit Wales lökden 't ziech te plaotse veur 't EK vaan 2016, boe 't team nao oonder mie 'n aonsprekende euverwinning op 't Belsj oetindelek de haaf finaal bereikde.