Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Het Goede Doel waor 'n Nederlandstaolege popgroop oet Utrech, die begin jaore tachteg häör groetste successe had. De kern bestoont oet tekssjriever Henk Westbroek en componis Henk Temming; de res vaan de band wisselde door de jaore heer. De band bestoont vaan 1979 tot 1991 en kaom vaan 2001 tot en mèt 2011 weer noe en daan biejein.
Bezètting
De einege oonveranderleke leje waore:
- Henk Westbroek (zaank, tekste)
- Henk Temming (zaank, tósje, muziek, productie)
In hun gloriedaog bestoont de groop wijer oet:
- Sander van Herk (gitaar, productie)
- Roland Jongeneel (tósje)
- Stephan Wienjus (basgitaar)
- Ab Tamboer (slaagwerk)
Ietot de band doorbraok waor Hans Boosman d'n drummer. Ouch Toni Peroni heet veur de groop gedrump.
In de jaore nul waore neve Westbroek en Temming de musici:
- Arnold van Dongen (gitaar)
- Lené te Voorhuis (basgitaar)
- Danny Sahupala (slaagwerk)
Historie
Ind jaore zeventeg kaom oondergronds e circuit vaan Nederlandstaolege bandsjes op. Ouch in Utrech, boe veural de band Braak opzeen baarde, waore grope die in het Nederlands zoonge. Westbroek en Temming koze al gaw veur Nederlandstaolege tekste, aon d'n eine kant umtot Westbrook zien Ingelse vrundin wees op de tekortkouminge in de Nederlandse oetspraok vaan 't Ingels, aon d'n andere kant umtot ze Neerlands Hoop, de cabaretgroop vaan Freek de Jonge en Bram Vermeulen, tot veurbeeld naome.[1] Ze debuteerde al op 27 januari 1979, bij 't popkonzèr in kraakpand Tivoli Lepelenburg.[2] In hunnen jóngen tied kóste ze, door 't royaol subsidiebeleid in buurthoezer, nog ietot ze mer e wieneg bekind waore euveral optrejje. Hun choquerende tekste zörgde evels dèks genoog deveur tot ze örges neet mie trök mochte koume.[3]
Hun ierste tv-optrejje kump es Felix Meurders in 1982 opzeet bij de radio. Heer heet genoog vaan 't daan euverhiersend "smartlappe"- (levesleed-)genre en liet Het Goede Doel bij 'n interview optrejje es good veurbeeld vaan Nederlandstaolege muziek.[3] Op dat memint is de band al in de Tipparaad gekoume mèt In het leven; nao aonleiing vaan dit interview weurt 't leedsje Gijzelaar 'nen echten hit. Loupende 't jaor 1982 kump 'nen hype roond Doe Maar op, in hun spoer weurt ouch Het Goede Doel oongekind populair. Ind 1982 en begin 1983 hole ze twie groete hits die allebei de veerde plaots hole: België (Is er leven op Pluto?) en Vriendschap. Dees veer leedsjes zien, zoe good wie Hou van mij, allemaol aofkumsteg vaan d'n elpee België, dee zelf op nómmer ein vaan de elpee-paraad kump en mèt dees toppositie en vief hits (oet nege nómmere) hendeg succesvol is veur 'n debuutplaot. Westbroek en Temming koume es Henk & Henk daobij nog in de hitparaad mèt Sinterklaas, wie kent hem niet.[4] Um hun succes kriege ze in 1983 'n Zèlveren Harp oetgereik, same mèt collega-Nederpoppers Toontje Lager en Cherry Wijdenbosch.
Nao dat jaor geit 't evels gaw minder mèt Het Goede Doel. Allewel tot hun twiede plaat Tempo doeloe bès good verköp mèt de zèsde plaots in de albumparaad, heet de plaotemaatsjappij mie verwach. Van de 80.000 stökker die gepeers zien weurt mer de hèlf verkoch en 't platecontrak weurt beïndeg. Dit wijt me dèks direk aon 't oetereingoon vaan Doe Maar: 't ind vaan dee band beteikent 't ind vaan de raasj um Nederlandstaolege popmuziek. Me zeuk 'ne nuie platefirma, meh d'n opvolger Mooi en onverslijtbaar verköp nog minder good. Loupende de late jaore tachteg beginne versjèllende leje vaan de band aon soloprojekte. Henk Westbroek geit bij de radio wèrke, Henk Temming en Sander van Herk beginne 'ne studio, Toni Peroni góng in 1988 eine kier solo mèt KNMI ('n parodie op YMCA vaan de Village People). Westbroek en Temming sjrieve ouch leedjes veur andere, in 't bezunder veur 't VARA-kinderkoer Kinderen voor Kinderen. In 1989 kump Iedereen is anders oet: 'n plaat boemèt Het Goede Doel samewèrk mèt versjèllende Nederlandse solozengers. Alles kan een mens gelukkig maken (ouch bekind es Een eigen huis), mèt René Froger, haolt es single zelfs de nómmereinpositie. 't Album verkoup evels vrij slech. Ditzelfde gelt ouch veur Souvenir, hun leste album. Tegeliek deit de band 'nen theatertoer, Theatertourisme, dee ouch slech löp en oongunstege recensies krijg. Intösse zien de persoenleke ban tösse veural Westbroek en Temming verslechterd. In 1991 luf de band ziech daan ouch op.
In de jaore negeteg goon de bandleje op hunnen eige weeg door. Westbroek weurt landelek bekind, neet allein door zien solocarrièr en zie werk veur de radio, meh veural in de gemeintepolitiek (mèt Leefbaar Utrecht). Roond 't jaor 2000 steit de Nederpop oet vreuger daog evels volop in de belaankstèlling (ouch door de reünie vaan Doe Maar). Het Goede Doel beslut e reüniekonzèr te geve in de Heineken Music Hall, en gief 'ne verzaomeleer oet mèt de naom Geef de mensen wat ze willen. In 2007 weurt de vernuide samewèrking tösse Westbroek en Temming weer serieuzer: ze begóste e nui album op te neme. Dit album, Gekkenwerk, kaom in 2008 oet, iers es legaol downloadbaar album, daonao es gewoene cd. Dit geit gepaord mèt 'ne nuien toer. Vaan de oersprunkeleke bezètting is wijer geine trökgekierd, allewel tot Sander van Herk wel vaan opzij bij de band betrokke is (zoe späölt 'r gitaar op eint vaan de leedsjes). Dit album woort in 2011 gevolg door Liefdewerk. Daonao góng de band evels definitief kepot aon de vreigel tösse Westbroek en Temming, dee de band al iejer sjaoj had gedoon.
Werk
Albums
mèt hitnoteringe in de Nederlandse Album Top 100 en zien veurgengers
- België (1982, 1)
- Tempo doeloe (1983, 6)
- Mooi en onverslijtbaar (1986, 16)
- Live (livealbum, 1987, 14)
- Iedereen is anders volgens het Goede Doel (1988, 31)
- Souvenir (1989, 41)
- Het beste van het Goede Doel (verzameleer, 1991, 7)
- Geef de mensen wat ze willen (verzameleer mèt nui materiaol, 2001, 38)
- Gekkenwerk (2008)
- Liefdewerk (2011)
Hitsingles
mèt noteringe in de Nederlandse Top 40 en de Ultratop 50 en/of zien veurgengers
- In het leven (vaan België, 1982; tip)
- Gijzelaar (vaan België, 1982; 28)
- Sinterklaas, wie kent hem niet (es Henk & Henk, bijlaog bij België, 1982; 24)
- België (Is er leven op Pluto) (vaan België, 1982; 4, 9)
- Vriendschap (vaan België, 1983; 4, 18)
- Hou van mij (vaan België, 1983; 29)
- Eenvoud (vaan Tempo doeloe, 1983; 11)
- Geboren voor het geluk (vaan Tempo doeloe, 1984; tip)
- Net zo lief gefortuneerd (vaan Tempo doeloe, 1984; tip)
- Eeuwige kerst (mèt Kinderen voor Kinderen, Annie Schilder en De Stem des Volks; neet op album versjene, 1984; 12)
- Ik dans, dus ik besta (vaan Mooi en onverslijtbaar, 1986; 29)
- Alles geprobeerd (vaan Mooi en onverslijtbaar, 1986; 25)
- Zwijgen (vaan Mooi en onverslijtbaar, 1986; 17)
- Nooduitgang (live) (vaan Live [ieder versjene op Mooi en onverslijtbaar], 1987; 25)
- 4 films (Een filmster blijft voor eeuwig leven) (mèt Ramses Shaffy; vaan Iedereen is anders, 1987; tip)
- Uit vrije wil (vaan Souvenir, 1988; tip)
- Alles kan een mens gelukkig maken (mèt René Froger; vaan Iedereen is anders, 1989; 1)
- Speciale aanbieding (mèt VOF De Kunst; vaan Iedereen is anders, 1989; tip)
- Met open ogen (vaan Souvenir, 1989; 27)
- Vandaag (vaan Souvenir, 1989; tip)
- Als ik de bouw van Arnold Schwarzenegger had (neet op album versjene, 1991; tip)
Referenties
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
