![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/8/84/European_Commission.svg/langli-640px-European_Commission.svg.png&w=640&q=50)
President vaan de Europees Kemissie
From Wikipedia, the free encyclopedia
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
![Thumb image](http://upload.wikimedia.org/wikipedia/commons/thumb/8/84/European_Commission.svg/150px-European_Commission.svg.png)
![Thumb image](http://upload.wikimedia.org/wikipedia/commons/thumb/7/70/Ursula_von_der_Leyen_%2849468709252%29.jpg/640px-Ursula_von_der_Leyen_%2849468709252%29.jpg)
De President of Veurzitter vaan de Europees Kemissie[1] is 't hoof vaan de Europees Kemissie: 't einsegste instituut dat de direkte executieve mach vaan de Europese Unie (EU) es instituut oetoefend zoonder tot de belange vaan de EU-lidstaote mèt mage wege (wie dat wel 't geval is in d'n Europese Raod en Raod vaan de EU).
![Thumb image](http://upload.wikimedia.org/wikipedia/commons/thumb/d/d2/Belgique_-_Bruxelles_-_Schuman_-_Berlaymont_-_01.jpg/640px-Belgique_-_Bruxelles_-_Schuman_-_Berlaymont_-_01.jpg)
De President verblijf in 't Berlaymont-gebouw in Breusel. Zie of heer krijg e salaris vaan € 306.655 de jaor[2].
De President vaan de Kemissie leidt e kabbinèt vaan Eurokemissarisse (e soort "EU-ministers") boenao geriffereerd weure es 't kolleesj (college). Same zien ze verantweurdelek nao 't Europees Parlemint touw en zien ze de einsegste die EU-wètte kinne initiëre. De President heet de mach um de eurokemissarissjappe te definiëre en te verdeile, de eurokemissarisse vaan portfoloio ("ministerie") te wissele en ze te oontsloon es dat noedzakelek is. 't Kolleesj, boe de President 't hoof vaan is, dirigeert de deenste boe de Kemissie verantweurdelek veur is, 't zèt de beleidsagenda vaan de EU oet en 't sjrijf de wètte veur. De wètte motte daan wel nog weure goodgekäörd door 't Europees Parlemeint en d'n Europese Raod en tenslotte weure oetgesjreve door de Raod vaan de EU (of de "ministerraod"), boenao ze eventueel nog 'nen twiede kier door 't Parlemint kinne weure aofgeweze.
De president vaan de Kemissie is ouch verantweurdelek veur 't vertegeweurdege vaan de EU nao boete touw, same mèt de President vaan d'n Europese Raod en d'n Hoege Representant vaan de Unie veur Boetelandse Affaires en Veilegheidsbeleid.
De Europees Kemissie weurt soms, inkorrek, de "Europees regiering" geneump en de Kemissie-president daomèt de "Europese president"; die titel weurt evels noets door de President zelf gebruuk en weurt evegood, zjus zoe inkorrek, gebruuk veur de President vaan d'n Europese Raod.
![Thumb image](http://upload.wikimedia.org/wikipedia/commons/thumb/d/d7/Bundesarchiv_B_145_Bild-F028459-0019%2C_Robert-Schuman-Preis%2C_Verleihung_an_Walter_Hallstein.jpg/640px-Bundesarchiv_B_145_Bild-F028459-0019%2C_Robert-Schuman-Preis%2C_Verleihung_an_Walter_Hallstein.jpg)
De positie woort 'n feit bij de euvereinkoms vaan 't Verdraag vaan Roeme in 1958. D'n ierste President waor Walter Hallstein. Edere president weurt genomineerd door d'n Europese Raod (de nationaol leiers vaan de EU-lidstaote, wie de Belsj en Nederlandse premiers en d'n Duitse kanseleer) en mot daan nog weure goodgekäörd door 't nui Europees Parlemint veur 'n termijn vaan vief jaor. De nuie President weurt dus gekoze door 'n parlemintaire mierderheid die es gevolg vaan de viefjaorlekse Europese parlemintsverkezinge zien gevörmp.