Lydia Mutsch

D'Lydia Bernardine Mutsch, gebuer de 17. August 1961 zu Diddeleng, ass eng lëtzebuergesch Politikerin (LSAP).

Lydia Mutsch
Gebuer	17. August 1961 Diddeleng
Nationalitéit	Lëtzebuerg
Educatioun	Universitéit Göttingen, Lycée Hubert-Clément
Aktivitéit	Politiker, Journalist
Partei	LSAP

Karriär

D'Lydia Mutsch huet zu Göttingen Politik a Sozialwëssenschafte studéiert (1980-1985) an duerno am Journalismus an an der Publicitéit geschafft.

1987 ass si Member vum Escher Gemengerot ginn. Vum Abrëll 2000 bis zu hirer Ernennung als Ministesch war si Buergermeeschtesch vun der Stad Esch-Uelzecht.

1989 gouf d'Lydia Mutsch op der LSAP-Lëscht am Südbezierk an d'Chamber gewielt a gouf zanterhier, bis d'Chamberwale vum 20. Oktober 2013 nach mat, allkéiers erëmgewielt.

2013 huet si op hiert Deputéiertemandat verzicht, fir vum 4. Dezember 2013 bis de 4. Dezember 2018 Ministesch fir Gesondheet a fir Chancëgläichheet an der Regierung Bettel-Schneider ze ginn.

Bei de Chamberwale vum 14. Oktober 2018 ass si de 6. Dezember fir den Dan Kersch, dee Minister gouf, 'nogeréckelt'.^[1] Si huet hiert Mandat bis un d'Enn vun der Chambersessioun 2022-23 ausgefëllt.

Si war och Member vum Benelux-Parlament a Membre suppléant vum Comité vun de Regiounen.

Auszeechnungen

• Officier vum Ordre de la couronne de chêne (Promotioun 1999)^[2]
• Grand-Officier vum Ordre de Mérite du Grand-Duché de Luxembourg (Promotioun 2014)^[3].

Literatur

• Revue Nr. 43 vum 22.10.2012 (Stefan Kunzmann): Die Bürdenträgerin, S. 20-28

Kuckt och

• Lëscht vun de Buergermeeschtere vun Esch-Uelzecht

Um Spaweck

Commons: Lydia Mutsch – Biller, Videoen oder Audiodateien

• Biographie vun der L. Mutsch op der Websäit vun der lëtzebuergescher Regierung
• Portail www.sante.lu

Referenzen

1. Actualité of chd.lu.
2. Memorial B n° 58 vun 1999 mat der Lëscht vun de Leit déi 1999 eng national Auszeechnung kritt hunn Op der Säit 1149 vun deem Memorial steet 'Promotion 1999' wärend op der Säit 1150 'Promotion 1998' steet. 1999 ass wuel richteg wëll de Memorial op den 1. Dezember 1999 datéiert ass.
3. « Compte-rendu des séances publiques n°7 - Séance extraordinaire 2013-2014 », op https://www.chd.lu/