Europäesch Schoul

D'Europäesch Schoulen (Schola Europaea) sinn international Privatschoulen, déi zesumme mat de Regierunge vun de Memberstaate vun der EU gegrënnt goufen, an déi fir Kanner vun Elteren, déi an europäeschen Institutioune schaffen, geduecht sinn. Si vermëttelen en Unterrecht an der eegener Sprooch (Mammesprooch) a bestinn do, wou grouss europäesch Institutiounen hire Sëtz hunn. All voll beschäftegt Léierkräfte gi vun den nationale Parlamenter recommandéiert.

Si ënnerleien de gesetzleche Bestëmmunge vun den ëffentlech-rechtlechen Ariichtungen an de jeeweilege Länner, wou se hire Sëtz hunn.

D'Europäesch Schoule sollen net mat den Europaschoule verwiesselt ginn, sou wéi se haaptsächlech an Däitschland bestinn.

D'Geschicht vun den Europäesche Schoule fänkt zu Lëtzebuerg un

D'Gebai vun der éischter Europäescher Schoul zu Lëtzebuerg (haut ass do den INLL dran,

Fichier:MarcelDecombis1959.jpg

De Marcel Decombis, Direkter vun der éischter Europäescher Schoul zu Lëtzebuerg

Déi éischt Europäesch Schoul gouf op d'Initiative vun enger Grupp vu Beamte vun der CECA a mat der Ënnerstëtzung vun hiren Institutiounen, an der lëtzebuergescher Regierung den 12. Oktober 1953 zu Lëtzebuerg gegrënnt. Un der Grënnung hat den deemolege Greffier vum Geriichtshaff vun der CECA, den Albert van Houtte, e groussen Undeel. Hiren éischten Direkter war de Marcel Decombis.

D'Erzéiungserfahrungen déi opgrond vun der Abezéiung vu Kanner vu verschiddenen Nationalitéiten a Mammesprooche gemaach goufen, hate grousse Succès an hunn zu enger enker Zesummenaarbecht vun den Erzéiungsadministratiounen an de Memberlänner gefouert, besonnesch am Beräich vun de Schoulprogrammer, der Auswiel vun de Léierkräften, an der Unerkennung vun den ausgestallten Diplomer. D'Ënnerzeechnung vum Protokoll iwwer d'Europaschoul zu Lëtzebuerg huet aus hir eng éischt offiziell Europäesch Schoul gemaach. Den éischten europäeschen Abitur-Examen, deen am Juli 1959 ofgehale gouf, huet domat hiren Abiturienten de Wee zu allen Universitéite vun de Memberlänner opgemaach.
Den Erfolleg vun der éischter Europäescher Schoul huet dozou gefouert, dat op anere Plazen, wou Europäesch Institutiounen hire Sëtz hunn, aner Europäesch Schoule gegrënnt goufen.

Europäesch Schoulen, déi haut bestinn

Haut (Stand: November 2017) gëtt et dräizéng Europäesch Schoulen a sechs verschiddene Länner; d'Schoul vu Culham a Groussbritannien, déi 1978 gegrënnt gouf, huet den 31. August 2017 hir Dieren definitiv zougemaach^[1].

Lëscht vun den Europäesche Schoulen

Land	Stad	Numm	gegrënnt
Lëtzebuerg	Kierchbierg (fréier um Glacis)	Lëtzebuerg I	1953
Belsch	Uccle	Bréissel I	1958
Belsch	Mol	European School Mol	1960
Italien	Varese	Scuola Europea di Varese	1960
Däitschland	Karlsruhe	Europäische Schule Karlsruhe	1962
Holland	Bergen	European school Bergen	1963
Belsch	Woluwe-Saint-Lambert	Bréissel II	1974
Däitschland	München	Europäische Schule München	1977
Belsch	Ixelles	Bréissel III	2000
Däitschland	Frankfurt	Europäische Schule Frankfurt	2002
Spuenien	Alicante	Escuela Europea de Alicante	2002
Lëtzebuerg	Bartreng / Mamer	Lëtzebuerg II	2004
Belsch	Laeken	Bréissel IV	2007

Enn 2015 ware ronn 25.000 Schüler an Europäesche Schoulen ageschriwwen.

Um Spaweck

• Europäesch Schoulen
• Conseil Supérieur des Elèves (COSUP)
• European Schools Alumni Online Community
• Sproochofdeelungen an den Europäesche Schoulen

Referenzen an Notten

1. The European School Culham gekuckt den 12. November 2017