Critérium international de cross cyclo-pédestre

De Critérium international de cross cyclo-pédestre^[1] (C.I.) war eng populär Kompetitioun am Cyclo-cross (Vëlosport), déi um héchste Niveau all Joer mat e puer Ënnerbriechunge vun 1924 bis 1949 (20 Editiounen) ausgedroe gouf, an als offiziéis Weltmeeschterschaft betruecht gouf.

Critérium international de cyclo-cross
Detailer
Etappen	2
Länner	Frankräich Lëtzebuerg
	Dokumentatioun

An den 1920er Jore gouf a Frankräich festgestallt datt et wuel schonn a ville Länner Nationalchampionnater am Cyclo-Cross gouf, mee awer nach keng international Epreuve wou déi Bescht an där Disziplin sech miesse kéinten. An dësem Sënn gouf déi éischt Editioun vum “Critérium International de cross cyclo-pédestre” 1924 vun der Zeitung L'Auto^[1] et der Union vélocipédique de France an d'Liewe geruff. De Start vun der Course war zu Suresnes, engem Paräisser Faubourg. Vun do aus goung et dann iwwer de Mont Valérien an e Bësch am Weste vu Paräis. Déi bekanntst Schwieregkeet vum C.I., déi besonnesch vill Spectateuren ugezunn huet, war den Trou du diable. Op där Plaz ass et fir d'éischt schëtzeg biergof gaangen an direkt hannendrun grad esou géi biergop. Dat war sou schwéier a geféierlech, datt d'Coureuren an den Ufanksjore mol net um Vëlo erof gefuer sinn. Am Géigesaz zu modernen Cyclo-Cross-Courssen, déi op engem zouenen Circuit gefuer ginn, war d'Arrivée vum C.I. no der Course iwwer eng Distanz vun deemools 20,2 km net op derselwechter Plaz wéi de Start.

Lëtzebuerg hat vun Ufank u Coureure beim C.I. um Start. Schonn am Joer 1926 war et dem Jean-Pierre Engel, deemools nationale Champion am Cyclo-Cross, gelongen zu Paräis als Zweeten op de Podium vum C.I. ze klammen.

D'Editioun 1935 ass aus Lëtzebuerger Siicht besonnesch ervirzehiewen: mat de Bridder Arsène a Josy Mersch, souwéi de Bridder Pir a Mett Clemens hat Lëtzebuerg dat Joer souwuel zwéi Coureuren um Podium (1. Josy Mersch, 3. Arsène Mersch), wéi och d'Lännerklassement no Punkte gewonnen.^[2]

Et ass och bemierkenswäert, datt déi alleréischt Editioun vum C.I. nom Zweete Weltkrich am Joer 1947 an der Millebaach op engem Circuit am Bambësch organiséiert gouf.^[3]

Déi zwou lescht Editioune vum C.I. (1948 an 1949) waren dunn erëm zu Paräis, déi Kéier op engem Circuit am Bois de Vincennes. Dës Epreuve ass schlussendlech am Joer 1950 vun der éischter offizieller Cyclo-Cross-Weltmeeschterschaft vun der U.C.I. ersat ginn, déi um selwechte Circuit wéi d'Editioun vun 1949 ausgedroe gouf.

Palmarès

Joer	Datum	Plaz	Gewënner	Zweeten	Drëtten	Ekippeklassement
1924	17. Februar	Suresnes	FRA Gaston Degy	BEL Henri Moerenhout	BEL Théophile Van Eetvelde	Belsch
1925	8. Februar	Suresnes	BEL Henri Moerenhout	BEL Joseph Van Dam	ITA oder SUI[4] Charles Martinet	Belsch
1926	7. Februar	Suresnes	FRA Francis Pélissier	LUX Jean-Pierre Engel	FRA Eugène Christophe	Frankräich
1927	Net organiséiert
1928	5. Februar	Suresnes	FRA Camille Foucaux	BEL Georges Ronsse	FRA Paul Le Drogo	Frankräich
1929	3. Februar	Suresnes	FRA Camille Foucaux	FRA Charles Pélissier	FRA Auguste Segaud	FRA France
1930	2. Februar	Suresnes	FRA Hilaire Berthellin	BEL Georges Ronsse	FRA Camille Foucaux	Frankräich
1931	8. Februar	Suresnes	FRA Henri Deconinck	FRA Camille Foucaux	BEL Georges Ronsse	Frankräich
1932	7. Februar	Suresnes	FRA Aubert Winsingues	FRA Hilaire Bertellin	FRA Henri Deconinck	Frankräich
1933	5. Februar	Suresnes	BEL Sylvère Maes	SUI Karl Bosshard	SUI Walter Blattmann	CHE Schwäiz
1934	4. Februar	Suresnes	BEL Maurice Seynaeve	BEL Sylvère Maes	BEL Kamiel Vermassen	Belsch
1935	3. Februar	Suresnes	LUX Josy Mersch	FRA Charles Vaast	LUX Arsène Mersch	Lëtzebuerg
1936	9. Februar	Suresnes	BEL Maurice Seynaeve	FRA Robert Oubron	FRA Charles Vaast
1937	7. Februar	Suresnes	FRA Robert Oubron	BEL Kamiel Vermassen	ITA Dante Franzil
1938	6. Februar	Suresnes	FRA Robert Oubron	SUI Fritz Hartmann	BEL Jules Kneepkens
1939	5. Februar	Suresnes	FRA Charles Vaast	BEL Jules Kneepkens	BEL Kamiel Vermassen	Belsch
1940	Net organiséiert
1941	2 Mäerz	Suresnes	FRA Robert Oubron	FRA André Brulé	FRA Kléber Piot
1942		Suresnes	FRA Robert Oubron	FRA Kléber Piot	FRA Georges Pieuzat
1943-1946	Net organiséiert
1947	9. Februar	Millebaach	FRA Jean Robic	FRA Roger Rondeaux	ITA Mario Covolo
1948	8. Februar	Vincennes	FRA Roger Rondeaux	FRA Robert Oubron	SUI Max Breu	Frankräich
1949	3. Mäerz	Vincennes	FRA Roger Rondeaux	FRA Jean Robic	BEL Frans Decoster	Frankräich

Kuckt och

• Cyclocross-Weltmeeschterschaft

Referenzen an Notten

1. Titelsäit vun der franséischer Zeitung L'Auto: "Le Premier Critérium international de Cross Cyclo-Pédestre de L'AUTO". L'Auto (17. Februar 1924). Gekuckt de(n) 6.8.2020.
2. Mersch, C. (2017): Le Critérium International de cross cyclo-pédestre, Championnat du Monde avant l'heure op medium.com
3. Luxemburger Wort v. 7. Februar 1947: "Luxemburg, Austragungsort des 'Critérium International de Cross Cyclo-Pédestre'" (7. Februar 1947) Archivéiert de(n) 2017-07-24. Gekuckt de(n) 6.8.2020.
4. Verschidde jee no Quell