Boulevard de Kyiv

De Boulevard de Kyiv ass eng Strooss am Quartier Bouneweg-Süd vun der Stad Lëtzebuerg.

Boulevard de Kyiv

Um Boulevard de Kyiv a Richtung Norden
Ënnerhal vu(n)	Administration des ponts et chaussées
Situatioun
Land	Lëtzebuerg
Gemeng	Lëtzebuerg
Quartier(en)	Bouneweg-Süd
Deel vun	Nationalstrooss 40
Koordinaten	49°35'35,66"N, 6°8'12,80"O
Geschicht
Genannt	15. Juli 2022
Genannt no	Kyjiw

De Boulevard huet säin Ufank ëstlech vun der Jean-Pierre-Büchler-Bréck, wou e vun der Diddenuewener Strooss aus a Richtung Süde fortgeet. Tëscht der CFL-Busgarage am Westen an der Tramsstreck leeft e laanscht de Pôle d'échange Lycée Bouneweg a stéisst op der Grenz mat der Gemeng Hesper op de Rangwee.

D'Nationalstrooss 40 féiert driwwer.

Geschicht

De Stater Schäfferot huet de 15. Juli 2022 decidéiert der neier Strooss, déi parallel mat der Tramsstreck gebaut an am Summer 2022 opgaangen ass, no der ukrainescher Haaptstad ze nennen.

An der Begrënnung fir de Choix vum Odonym heescht et, dëst wär e Symbol vu Solidaritéit, Engagement an Ënnerstëtzung vun der Lëtzebuerger Haaptstad fir d'ukrainescht Vollek géintiwwer dem Ugrëff vu Russland op d'Ukrain deen net ze toleréiere wier^[1].

Allerdéngs war den ursprénglech erausgesichten Numm "Boulevard de Kiev". Well d'Stad sech awer selwer "Kyiv" schreift (an der Transkriptioun vum ukrainesche Київ) an de russeschen Numm "Kiew" net gär gesinn ass, gouf dat deen Dag drop rektifizéiert^[2].

Den Deel vum Boulevard tëscht der Diddenuewener Strooss am Norden an der Tramsstatioun „Lycée Bouneweg“ (rue de Neufchâteau) gouf den 31. Juli 2022 opgemaach^[3] an den 18. August 2022 offiziell ageweit^[4]. De leschten Deel vun der Strooss, bis op d'Limitt vun der Gemeng, ass den 12. Mäerz 2023 opgaangen^[5].

Biller

• 
  De Boulevard op Héicht vun der Tramsstatioun „Lycée Bouneweg“
• 
  …an um nërdleche Wupp, wou en op d'Diddenuewener Strooss stéisst.

Um Spaweck

Commons: Boulevard de Kyiv – Biller, Videoen oder Audiodateien

Referenzen an Notten

1. (fr)Ville de Luxembourg, La N3/N40 portera désormais le nom de « Boulevard de Kiev ». www.vdl.lu (20.07.2022). Gekuckt de(n) 20.07.2022.
2. "Municipality backtracks to name new road 'Boulevard de Kyiv'." rtl.lu, 22.07.2022.
3. "Éischten Deel vum Tronçon vun der N40 geet e Sonndeg op." rtl.lu, 28.07.2022.
4. (fr)Dévoilement du panneau routier du « Boulevard de Kyiv » | Ville de Luxembourg. www.vdl.lu. Gekuckt de(n) 18.08.2022.
5. (fr)Trafic Info - Chantier Rangwee à partir du 12.03.2023. vdl.lu. Gekuckt de(n) 08.03.2023.