![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/d/d1/WTCgroundzero.jpg/640px-WTCgroundzero.jpg&w=640&q=50)
Terroruschléi vum 11. September 2001 an den USA
From Wikipedia, the free encyclopedia
Am fréie Virmëtteg (lokal Zäit) vum 11. September 2001 huet eng Grupp islamistesch Selbstmordattentäter, déi d'Terrornetzwierk Al-Qaida ausgebilt a beoptragt hat, déi bis haut schwéierst a schlëmmsten Terroruschléi an der Geschicht vun den USA verbrach. Si hunn tëscht 8:10 Auer an 9:30 Auer véier Verkéiersfligeren op Flich am Land selwer entfouert, hunn der zwéin dovun an d'Tierm vum World Trade Center (WTC) zu New York City an een an de Pentagon zu Arlington, Virginia gesteiert. E weidere Fliger mat onbekanntem Attentatszil gouf duerch Kämpf tëscht de Passagéier an den Entféierer an der Géigend vu Pittsburgh, Pennsylvania zum Ofstuerz bruecht.
![Thumb image](http://upload.wikimedia.org/wikipedia/commons/thumb/d/d1/WTCgroundzero.jpg/640px-WTCgroundzero.jpg)
![Thumb image](http://upload.wikimedia.org/wikipedia/commons/thumb/a/a0/World_Trade_Center_9-11_Attacks_Illustration_with_Vertical_Impact_Locations.svg/640px-World_Trade_Center_9-11_Attacks_Illustration_with_Vertical_Impact_Locations.svg.png)
![Thumb image](http://upload.wikimedia.org/wikipedia/commons/thumb/f/f7/WTC-remnant_highres.jpg/640px-WTC-remnant_highres.jpg)
Duerch d'Opschloe vum Fliger an d'Feier, dat doduerch ausgeléist gouf, sinn d'Säitefronte vum Pentagonsgebai zerstéiert ginn. Béid Tierm vum WTC sinn eng bis zwou Stonne no der Kollisioun, wéinst den duerch Kerosinbränn an hirer Struktur geschwächte Stolstäipen a sech zesummegefall. Fënnef weider Gebaier vum WTC, dorënner d'Nopeschgebai WTC 7 goufen duerch d'Schied an d'Feier matzerstéiert, donieft och véier Metrostatiounen. 23 weider Gebaier, déi ronderëm de WTC stoungen, goufen zum Deel sou schwéier beschiedegt, datt se méi spéit mat ofgerappt hu misse ginn.
Bei den Uschléi sinn am Ganzen ongeféier 3.000 Mënsche gestuerwen: 266 Passagéier an de Fligeren, zirka 2.600 Mënschen am WTC, an 125 Persounen am Pentagon.
D'Uschléi ginn an den USA mam Kierzel 9/11 (nine-eleven) bezeechent, den déi amerikanesch Schreifweis vum Datum an zugläich och déi landeswäit Noutruffnummer bedeit.