Musculus corrugator supercilii
From Wikipedia, the free encyclopedia
Musculus corrugator supercilii[1] est parvus torulus subcutaneus infra musculum frontalem et supra musculum orbicularem oculi situs. Homini corrugatores bini sunt, quorum uterque inter se positione congruenter iacet in extremo arcu superciliari ad glabellam vergenti.
| Musculus corrugator supercilii |
|---|
 |
| Origo |
| Musculus orbicularis oculi Musculus frontalis |
| Insertio |
| Cutis frontalis |
| Nervus |
| Nervus facialis (Nervus cranialis VII) |
De musculi opera
Musculus corrugator supercilia ad interiorem marginem orbitalem contrahit ita ut cutis supra supercilium conrugetur. Hoc motu efficitur, ut superior palpebra paululum deprimatur depressisque superciliis operiatur.[2] Musculi corrugatores etiam supercilia ita constringunt[3] ut rugae supra nasum perpendiculares nasci possint.[4] Corrugatores naturaliter una cum musculo procero moventur.
De vultus significatione
Corrugator supercilii ab iis musculis est qui vultus argutias exprimunt. Itaque Cicero dicit "ex oculorum optutu, superciliorum aut remissione aut contractione, ... ex ceteris similibus" facile iudicari posse, quo quisque animi affectu sit.[5] Et Quintilianus expressis verbis, quales affectus plerumque corrugatoris supercilii opera significentur, aperit: "ira enim contractis <superciliis>, tristitia deductis, hilaritas remissis ostenditur."[6] Addit etiam supercilia "adnuendi quoque et renuendi ratione" demitti aut allevari".[7] Constat vultus argutiis corrugatoris opera effectis varias, prout rerum condiciones variant, esse significationes. Consideratur hodie actionem musculorum corrugatorum mensuram valetudinis obiectivam cogitationum internarum ita respondere aut contractione secundum iram aut relaxatione secundum levamentum animi[8].
Notae
Bibliographia
Wikiwand - on
Seamless Wikipedia browsing. On steroids.