Flavius Victor

Flavius Victor (quando natus, quando mortuus sit, nescimus) vir militaris ac publicus Romanus saeculi quarti fuit.

Origo et Familia

Victor origine Sarmatica erat^[1] et filiam reginae Saracenorum Maviae in matrimonium duxit^[2]. Familiaris eius Libanius orator erat^[3].

Cursus honorum

Victor anno 363 expeditioni Persicae imperatoris Iuliani comes rei militaris interfuit^[4] et una cum aliis viris militaribus (Dagalaifo, Flavio Nevitta et Arintheo de novo principe deliberavit, cum Iulianus die 26 Iunii proelio necatus esset. Iovianum imperatorem proposuit^[5]. Qui eum ad magistri equitum honorem sustulit. Annis 366 atque 369 cum Gothis manadto Valentis imperatoris de pace et agris agebat^[6]. Anno 369 consul erat, una cum Flavio Valentiniano Galate, filiolo Valentis. Anno 377 legatus ad Persas missus est^[7]. Anno 378 Valentem Augustum frustra admonuit, ne pugnam contra Gothos committeret^[8] et imperatorem inter Proelium Hadrianopolitanum frustra servare nitebatur^[9]. Fugit e pugna et in occidentem, Gratiano imperatori occidentali cladem et mortem avunculi Valentis nuntiavit^[10].

Notae

1. Ammianus Marcellinus, Res gestae, XXXI 12,6
2. Socrates Scholasticus, Historia Ecclesiastica, IV 36
3. Libanius, or. II 9
4. Ammianus Marcellinus, op.cit., XXIV 4,13
5. Op.cit., XXV 5,2
6. Op.cit., XXVII 5
7. Op.cit., XXX 2,4-5
8. Op.cit., XXXI 12,6
9. Op.cit., XXXI 13,9
10. Zosimus, Historia Nova, IV 24,3

Antecessores: Imp. Caesar Flavius Valentinianus Augustus II et Imp. Caesar Flavius Valens Augustus II

Consul 369 cum Flavio Valentiniano Galate

Successores: Imp. Caesar Flavius Valentinianus Augustus III et Imp. Caesar Flavius Valens Augustus III