The Birds (novella)

The Birds ('Aves') est narratiuncula phantastici generis a Daphne du Maurier in anthologia The Apple Tree anno 1952 divulgata.^[1]

Daphne du Maurier scriptrix anno 1947.

De argumento

Quae narratiuncula tractat de Nathan Hocken, agricola bello vulnerato, qui praediolum in Cornubia situm cum uxore et duobus liberis incolit, paucis annis post secundum bellum mundanum. Autumnali mutato caelo Nathan marinas terrestresque aves in vicinia infense se gerere comperit. Nathan, cum motus avium acriter observasset, aves inordinate volitantes in caelo propinquoque sinu maritimo quadam collecticia intellegentia in gregem concinnari suspicatur. Contra ceteros homines ille imminens periculum praesentiens parvam domum suam munire incipit.

Nathan similes in variis regionibus accidisse impetus per radiophoniam audit. Postquam non iam nuntia extranea audiuntur, et vicini agricolae propter avium impetus pereunt, Nathan consilium salutis sibi et familiae suae excogitat. Cum aves aestu maris tantum actuose se movere animadvertit, horis quietis utitur, ut ad imminentes impetus se praeparet. Cibum et ligna reservat, quibus diem de die sperat se expedire posse. Sed mox aves iterum impetum faciunt. Postremo Nathan in culina ad caminum sedet. Ultimum sigarellum incendit, et tabacarium in ignem iacit.

Quid postea, silentio praeteritur.

De re cinematographica

Alfredus Hitchcock anno 1959 sibi potestatem paravit, qua novellam Daphnes du Maurier in pelliculam cinematographicam redigere posset. Anno 1963 edita est The Birds pellicula, quae fabulam omnino dissimilem docet: nam nihil nisi violentia aves Hitchcockianas cum avibus Daphnes du Maurier coniungit. Eventa fabulae non in Cornubia sed in ora Californiensi conlocata sunt, et nulla similitudo hominum eorumque operum et curarum inveniri potest. Opera inter se plane differre videntur. Vix praeter exspectationem accidit, ut pellicula scriptrici nostrae displieret.

Notae

1. Zondergeld 1983: 84.

Bibliographia

• Gale Group (2016) A Study Guide for Daphne du Maurier's 'The Birds'. Gale Division of Cengage Learning Incorporated.
• Habibi, Helena (2020) ‘Restless Birds’. Avian Encounters in the Fiction of the Brontës and Daphne du Maurier. Dissertation Durham University.
• Snodgrass, Mary Ellen (2004) The Birds. Encyclopedia of Gothic Literature. Facts on File.
• Zondergeld, Rein A. (1983) Du Maurier, Daphne. Lexikon der phantastischen Literatur. Suhrkamp.