![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/8/85/NAMA_Myst%25C3%25A8res_d%2527Eleusis.jpg/640px-NAMA_Myst%25C3%25A8res_d%2527Eleusis.jpg&w=640&q=50)
Sacra Eleusinia
mysteria / From Wikipedia, the free encyclopedia
Sacra Eleusinia[1][2] sive mysteria Eleusina,[3][4] (Graece Ἐλευσίνια μυστήρια)[5][6] saepe aliter appellata,[7][8][9] fuerunt initia Demetris et Persephones quotannis habita, Eleusine in Atticae antiquae oppido notissimo condita. Quae sacra inter ceteras caerimonias apud antiquos celebrata maximi momenti habebantur.
![Thumb image](http://upload.wikimedia.org/wikipedia/commons/thumb/8/85/NAMA_Myst%C3%A8res_d%27Eleusis.jpg/640px-NAMA_Myst%C3%A8res_d%27Eleusis.jpg)
![Thumb image](http://upload.wikimedia.org/wikipedia/commons/thumb/7/7c/NAMA_Triade_%C3%A9leusinienne.jpg/640px-NAMA_Triade_%C3%A9leusinienne.jpg)
![Thumb image](http://upload.wikimedia.org/wikipedia/commons/thumb/1/14/Eleusinian_hydria_Antikensammlung_Berlin_1984.46_n2.jpg/640px-Eleusinian_hydria_Antikensammlung_Berlin_1984.46_n2.jpg)
Constat Eleusinia sacra fuisse in vetere cultu agrario posita, qui a tempore Mycenaeo (c. 1600–1100 a.C.n.) originem trahere videtur. Notio immortalitatis, quae in religionibus syncretisticis antiquitatis comparet, antiquitate exeunte introducta est.[10] Mysteriis illis Persephone a Plutone rege inferorum (Ἀίδης) ex manibus Demetris matris abducta repraesentabatur. Qui mythus, dispositus circulo tripartito qui in descensu (propter amissionem) et indagatione et adscensu consistebat, praecipue de adscensu Persephones eiusque cum matre reconciliatione narrabat. Mysteria Eleusina fuerunt feriae maioris momenti aetate Hellenistica celebratae, quae postea Romam manaverunt.[11] Eleusin, nomen oppidi, prae-Graecum esse videtur. Sunt qui putent huic nomini cognationem esse cum Elysio (Graece Ἠλύσιον) et Ilithyia (Graece Εἰλειθυία).[12]
Ritus, caerimoniae, fides fuerunt res absconditae, perpetuo celatae et custoditae. Qui initiati erant credebant sese in vita posteriore compensationem accepturos esse.[13] Hodie multae picturae fragmentaque figlinae sunt quae varios arcanorum aspectus describunt. Quia arcana imaginum visiones et vitae posterioris praestigias comprehendebant, nonnulli eruditi hodierni putant potestatem et longaevitatem mysteriorum Eleusinorum ex rebus psychedelicis emanavisse.[14]