Paeninsula Yucatanensis
From Wikipedia, the free encyclopedia
Paeninsula Yucatanensis,[1][2] sive Paeninsula Yucatanica[1][3] (Hispanice Península de Yucatán), est magna paeninsula in Mexico meridiano et oriente atque adiacentibus Belizae et Guatemalae partibus sita.[4][5][6][7] Ad septentriones et orientem extenditur, Sinum Mexici ad septentriones et occidentem a Mari Caribico ad orientem separans. Canalis Yucatanensis, inter septentrionalem orientalemque paeninsulae marginem et Cubam, haec corpora aquae coniungit.
Superficialis paeninsulae area est circiter 181 000 chiliometra quadrata. Terra, plerumque plana, paene omnino in calce porosa consistit.[8][9]
Paeninsula ad orientem Isthmi Tehuantepecensis iacet, angustissimae Mexici regionis quae Oceanum Atlanticum, Sinu Mexici et Mari Caribico non exclusis, ab Oceano Pacifico separat. Isthmus ab aliquot eruditis putatur finis geographicus inter America Media et reliquias Americae Septentrionalis partes, ut paeninsula in America Media ponatur.[8] Omne Mexicum, Yucatania non exclusa, ad civilitatem late habetur pars Americae Septentrionalis, cum Beliza et Guatemala partes Americae Mediae habeantur. Paeninsula Yucatanensis adiacet reliquia crateris Chicxulub, qui abhinc annorum 66 milliones ab asteroide diametro circiter decem ad quindecim chiliometra aevo Cretaceo exeunte formatus est.[10]