![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/7/76/Rainbow_above_Kaviskis_Lake%252C_Lithuania.jpg/640px-Rainbow_above_Kaviskis_Lake%252C_Lithuania.jpg&w=640&q=50)
ರೋಹಿತ
From Wikipedia, the free encyclopedia
ರೋಹಿತ ಎಂದರೆ ರಾಶಿ, ಸಂವೇಗ, ಅಲೆಯುದ್ದ, ಆವೃತ್ತಿ ಅಥವಾ ಇನ್ನಾವುದೇ ಸಂಬಂಧಿತ ಗುಣದ ಫಲನವಾಗಿ (ಫಂಕ್ಷನ್) ವಿಕಿರಣತೀವ್ರತೆಯ ನಕ್ಷೆ ಅಥವಾ ವ್ಯವಸ್ಥಿತ ಪ್ರದರ್ಶನ (ಸ್ಪೆಕ್ಟ್ರಮ್).[1][2] ಬದಲಾಗುತ್ತಿರುವ ಆವೃತ್ತಿ, ರಾಶಿ, ಅಲೆಯುದ್ದ ಅಥವಾ ಶಕ್ತಿಗಳಂಥ ಯಾವುದಾದರೊಂದು ಲಕ್ಷಣವುಳ್ಳ ವಿಕಿರಣತೀವ್ರತೆ ಅಥವಾ ವಿಕಿರಣತರಂಗಾವರ್ತದ ಪ್ರಾವಸ್ಥೆಗಳ ವಿತರಣೆಯ ದೃಶ್ಯ ದಾಖಲೆ ಅಥವಾ ಫೋಟೊಗ್ರಾಫಿಕ್ ದಾಖಲೆ ಎಂಬ ವ್ಯಾಖ್ಯಾನವೂ ಉಂಟು. ಪರಿಮಾಣದ ಆರೋಹ ಅಥವಾ ಅವರೋಹ ಕ್ರಮದಲ್ಲಿ ಕರಾರುವಾಕ್ಕಾಗಿ ಜೋಡಿಸಿದ ಸದೃಶ ಲಕ್ಷಣಗಳ ಅಥವಾ ಅಸ್ತಿತ್ವವುಳ್ಳವುಗಳ(ಎಂಟಿಟೀಸ್) ಯಾವುದೇ ವರ್ಗ ಎಂಬ ಅತಿ ಸಾರ್ವತ್ರೀಕರಿಸಿದ ವ್ಯಾಖ್ಯಾನವೂ ಉಂಟು (ಉದಾ: α-ರೋಹಿತ, β-ರೋಹಿತ, ಶ್ರವ್ಯ ರೋಹಿತ, ರಾಶಿ ರೋಹಿತ). ಸಾಮಾನ್ಯವಾಗಿ ವಿದ್ಯುತ್ಕಾಂತ ವಿಕಿರಣಕ್ಕೆ ಅನ್ವಯಿಸಿ ಈ ಪದದ ವ್ಯಾಪಕ ಬಳಕೆ ಇದೆ. ಗೋಚರ ಬೆಳಕನ್ನು ಅಶ್ರಗದ ಮೂಲಕ ಹಾಯಿಸಿದಾಗ ಪರದೆಯ ಮೇಲೆ ಗೋಚರಿಸುವ ಬಣ್ಣಗಳ ಪಟ್ಟೆಗೆ ರೋಹಿತ ಎನ್ನುವುದು ರೂಢಿ.
![Thumb image](http://upload.wikimedia.org/wikipedia/commons/thumb/7/76/Rainbow_above_Kaviskis_Lake%2C_Lithuania.jpg/640px-Rainbow_above_Kaviskis_Lake%2C_Lithuania.jpg)
ರೋಹಿತದ ಅವಿಚ್ಛಿನ್ನತೆ ವಿಕಿರಣಾಕರದ ಸ್ವಭಾವವನ್ನು ಆಧರಿಸಿದೆ. ಯಾವುದೇ ದೀಪ್ತಕಾಯ ಉತ್ಸರ್ಜಿಸುವ ವಿಕಿರಣದಿಂದ ಅವಿಚ್ಛಿನ್ನ (ಕಂಟಿನ್ಯುಅಸ್) ರೋಹಿತ ಲಭ್ಯ. ಧಾತುಜನಿತ ರೋಹಿತದಲ್ಲಿ ಒಂದು ಅಥವಾ ಹೆಚ್ಚು ವಿವಿಕ್ತ (ಡಿಸ್ಕ್ರೀಟ್) ಉಜ್ಜ್ವಲ ರೇಖೆಗಳಿರುತ್ತವೆ. ಅಣು ಅನಿಲಗಳು (ಮಾಲಿಕ್ಯುಲರ್ ಗ್ಯಾಸಸ್) ಪಟ್ಟೆ (ಬ್ಯಾಂಡ್) ರೋಹಿತದ ಉತ್ಪಾದಕಗಳು. ಉಷ್ಣಶಕ್ತಿ, ಎಲೆಕ್ಟ್ರಾನ್ ಅಥವಾ ಅಯಾನುಗಳ ಸಂಘಟನೆ ಮತ್ತು ಫೋಟಾನುಗಳ ಅಪಶೋಷಣೆಯಿಂದ ಉದ್ರೇಕಿತ ಆಕರ ವಿಕಿರಣವನ್ನು ಉತ್ಸರ್ಜಿಸುತ್ತದೆ. ಉತ್ಸರ್ಜಿತ ವಿಕಿರಣವನ್ನು ವಿಕ್ಷೇಪಿಸಿದರೆ ದೊರೆಯುವ ರೋಹಿತ ಉತ್ಸರ್ಜಿತ ರೋಹಿತ. ಇದರಲ್ಲಿ ಉಜ್ಜ್ವಲ ರೇಖೆಗಳಿರುತ್ತವೆ. ವಿಕಿರಣ ಶಕ್ತಿ ಯಾವುದಾದರೂ ಮಾಧ್ಯಮದ ಮೂಲಕ ಹಾಯುವಾಗ ಅದರ ನಿರ್ದಿಷ್ಟ ಘಟಕಗಳನ್ನು ಆ ಮಾಧ್ಯಮ ಅಪಶೋಷಿಸುತ್ತದೆ. ತಜ್ಜನಿತ ಅಪಶೋಷಿತ ರೋಹಿತದಲ್ಲಿ ಕಪ್ಪು ರೇಖೆಗಳಿರುತ್ತವೆ.