From Wikipedia, the free encyclopedia
არია სტარკი (ინგლ. Arya Stark) — გამოგონილი პერსონაჟი ამერიკელი მწერლის, ჯორჯ რეიმონდ რიჩარდ მარტინის ნაწარმოებში „ყინულისა და ცეცხლის სიმღერა“ და HBO-ს მიერ ამავე ნაწარმოების სატელევიზიო ადაპტაციაში „სატახტოთა თამაში“. სერიალში მას განასახიერებს ინგლისელი მსახიობი მეიზი უილიამსი. ის ერთადერთი პერსონაჟია ნაწარმოებში, რომელიც წიგნების სერიის ყველა გამოცემაში გამოჩნდა.
არია სტარკი | |
---|---|
„ყინულისა და ცეცხლის სიმღერა“ - პერსონაჟი | |
მეიზი უილიამსი არია სტარკის როლში, HBO-ს სატელევიზიო სერიალში „სატახტოთა თამაში | |
პირველი გამოჩენა |
|
ბოლო გამოჩენა | „რკინის ტახტი“ (2019) |
შემქმნელი | ჯორჯ რეიმონდ რიჩარდ მარტინი |
მსახიობი |
მეიზი უილიამსი („სატახტოთა თამაში“) |
ინფორმაცია | |
ზედმეტსახელ(ებ)ი |
|
სქესი | მდედრობითი |
ოჯახი | სტარკების საგვარეულო |
მეორე ნახევარი | გენდრი |
ნათესავები |
|
არია სტარკი პირველად 1996 წელს, „სატახტოთა თამაშში“ გამოჩნდა, როგორც ნედ სტარკისა და კეიტლინ სტარკის უმცროსი ქალიშვილი. ის ქალთა ტრადიციულ საქმიანობებს არ ეუფლება და ბიჭებში ხშირად ერევათ. არია ფლობს ციხესიმაგრეში გამოჭედილ ფოლადის მცირე ზომის ხანჯალს, სახელწოდებით „ნემსი“, რომელიც მას თავისმა ნახევარ-ძმამ, ჯონ სნოუმ აჩუქა. არია ბრავოსის სტილში ხმლით ბრძოლაში სირიო ფორელმა გაწვრთნა.
არია სერიალის ყველაზე პოპულარულ პერსონაჟებს შორისაა. უილიამსის შესრულებამ კრიტიკოსების მოწონება დაიმსახურა. მეიზი უილიამსი როლის შესრულებისთვის ორჯერ იყო ნომინირებული ემის დაჯილდოებაზე საუკეთესო მეორეხარისხოვანი როლის შემსრულებელი მსახიობი ქალის კატეგორიაში, 2016 და 2019 წლებში.[1] უილიამსი სერიალის სხვა მსახიობებთან ერთად კინომსახიობთა გილდიის ჯილდოზე დრამატულ სერიალში სამსახიობო ჯგუფის შესანიშნავი შესრულებისთვის 2011, 2013, 2014, 2015, 2016 და 2017 წლებში იყო წარდგენილი.
არია დაიბადა 289 წელს (აეგონ ტარგარიენის მმართველობის დამხობიდან), ჩრდილოეთის მმართველ და უინტერფელის ლორდ ედარდ სტარკისა და ლედი კეიტლინ სტარკის ოჯახში, როგორც მესამე შვილი და ყველაზე პატარა ქალიშვილი. პერსონაჟი რომანის დასაწყისში ცხრა წლის იყო. მას ხუთი და-ძმა ჰყავს: უფროსი ძმა - რობი, უფროსი და - სანსა, ორი უმცროსი ძმა: ბრანი და რიკონი და უფროსი, უკანონო ნახევარ-ძმა ჯონ სნოუ. დედის მხრიდან ის ასევე არის რობერტ არინის ბიძაშვილი.
არია ცაციაა და მას კარგად გამოდის შეკრება-გამოკლება. მისი უფროსი დისგან, სანსასგან განსხვავებით, რომელიც ტრადიციული დიდგვაროვანი ქალბატონების საქმიანობითაა დაკავებული, არია ცეკვის, კერვისა და სიმღერით დაინტერესებული არაა და სხვა აქტივობებითაა დაკავებული, მათ შორისაა ჯირითიც. დედამისმა, კეტლინი მას ხშირად მოიხსენიებს, როგორც „მგლისსისხლიანს“, იმპულსურ და „რთულად მოსათვინიერებელს“. არია მუდმივი „თავის ტკივილია“ მისი მასწავლებელის, სეპტა მორდანისთვის. ის განსაკუთრებულად ახლოსაა თავის ნახევარ-ძმა, ჯონ სნოუსთან, რომელიც არიას ეხმარება და რომელმაც, განშორების წინ, დას საჩუქარი მისცა.[2] ნაჩუქარ ხმალს არიამ „ნემსი“ უწოდა. ხმალს პერსონაჟი მოგვიანებით ბრავოსულ „წყლის ცეკვის“ (ფარიკაობა) სასწავლად იყენებს, რაც პერსონაჟს სწრაფად შეტევაში ავარჯიშებს. დროტა განმავლობაში არია დაუნდობელი ხდება.
არია თავის და-ძმას შორის ერთადერთია, რომელსაც სტარკებისთვის დამახასიათებელი ყველა გარეგნული ნიშანი აქვს: ტანის მოყვანილობა, ყავისფერი თმა, ნაცრისფერი თვალები და გრძელი სახე (ამის გამო მას სანსას თანმხლებმა პირებმა „ცხენისსახა“ უწოდეს). ის ძალიან ჰგავს მამიდა ლიანას, როგორც გარეგნობით, ასევე ტემპერამენტრით.[3] მას კარგად აქვს განვითარებული ინსტინქტი და ტელეპათიის უნარი, რითაც თავის მგლის ლეკვს, ნიმერიას აკონტროლებს, განსხვავებული კონტინენტიდანაც კი. სერიალის დასაწყისში ის მოზარდია და ხშირად ერევათ ბიჭებში. მისი ფიზიკურობის ჩამოყალიბებაში დიდი გავლენა მოახდინა ბრავოსში გარეულ კატებზე ნადირობამ.[4]
სერიალში „სატახტოთა თამაში“, არია სტარკის როლს ინგლისელი მსახიობი, მეიზი უილიამსი ასრულებს. არიას როლი უილიამსის სადებიუტო ნამუშევარს წარმოადგენს. მსახიობის შესარჩევად მთელი ინგლისის მასშტაბით 300-მდე გოგონამ გაიარა კასტინგი, სადაც უილიამსმა გაიმარჯვა.[5]
არია შესაძლებელია ანტიგმირადაც ჩაითვალოს.[6] The Guardian-ის წარმომადგენელმა, სოფი ჰივუდმა არიას რვა სეზონიან ცვლილებას „საყვარელი, პატარა დისგან სერიულ მკვლელად ჩამოყალიბება“ უწოდა (საერთო ჯამში 64 მკვლელობა).[7] არია არის ახალგაზრდა პერსონაჟი, რომელიც მამის უსამართლო სიკვდილით დასჯის მომსწრე გახდა და საკუთარი თვალით იხილა დედისა და ძმის გარდაცვალების შედეგები (ამ უკანასკნელის გვამზე დამაგრებული მგლის თავის ჩათვლით). შურისძიებისთვის პერსონაჟს აქვს შედეგნილი სპეციალური სია, სადაც ჩამოთვლილია იმ პირების სახელები, ვისაც მისი ახლობლების სიკვდილში მიუძღვის წვლილი.[8][9][10] ექვსი სეზონის განმავლობაში მარტო ყოფნის შემდეგ ის ოჯახს დაუბრუნდება როგორც კარგი მებრძოლი და გაწვრთნილი მკვლელი.[11][12] არია სერიალში ძალიან მნიშვნელოვანი ფიგურაა. სწორედ მან გადაარჩინა მთლიანად უესტეროსის კონტინენტი კინოსა და ტელევიზიის ისტორიაში ყველაზე გრძელ ბრძოლის სცენაში, როდესაც ღამის მეფე მოკლა („სიკვდილის ღმერთი“). სწორედ ღამის მეფის სიკვდილით განადგურდა თეთრი მოხეტიალეების უზარმაზარი დაუმორჩილებელი არმია.[13][14][15][16]არიას მიერ ღამის მეფის მკვლელობა ბრიტანული აკადემიის სატელევიზიო ჯილდოს ნომინაციებს შორის მოხვდა, „აუცილებლად სანახავი მომენტების“ კატეგორიაში.[17]
ტერმინი არია სამხრეთ აზიის ენებში, რომლის წარმოშობასაც სანსკრიტსა და სპარსულ ენებს უკავშირებენ ორივე სქესის აღსანიშნავად გამოიყენება.[18][19] 2012 წლიდან, მას შემდეგ რაც „სატახტოთა თამაში“ ტელეეკრანებზე ოფიციალურად გამოჩნდა, სახელი არია ყველაზე სწრაფად მზარდი სახელი გახდა გოგონებისთვის ამერიკის შეერთებული შტატების მასშტაბით. პოპულარობა 711-ე აგილიდან 413-ე პოზიციაზე გადავიდა, რაც მეიზი უილიამსის პერსონაჟის სიყვარულით იყო განპირობებული.[20][21] 2019 წელს სახელი ამერიკის მასშტაბით პოპულარობით 92-ე იყო, ხოლო მისი სხვაგვარი ვარიაცია (არია, რომელიც Y-ის ნაცვლად I-ის საშუალებით იწერებოდა) სიაში მე-20 ადგილზე აღმოჩნდა.[22][23] სახელი 2017 წელს ახალდაბადებულ გოგონათა ყველაზე პოპულარულ სახელებს შორის შევიდა (200 სახელისგან შემდგარი სია) უელსისა და ინგლისის მასშტაბით.[24][25][26]
2017 წლის საერთაშორისო ჰიტი, „Look What You Made Me Do“, რომელიც ტეილორ სვიფტს ეკუთვნის ნაწილობრივ შთაგონებული იყო უილიამსის შესრულებული არია სტარკის პერსონაჟით. სიმღერის ტექსტი შეიცავს მონაკვეთს, სადაც მომღერალი ამბობს: „მე სახელების სია მაქვს, სადაც შენი წითლადაა, ხაზგასმული“. ინსპირაციის წყაროს სწორედ არია სტარკის „მკვლელობების სია“ წარმოადგენდა. კანადელმა რეპერმა, დრეიკმა არია სტარკს მადლობა გადაუხადა ღამის მეფის მოკვლისთვის 2019 წელს ბილბორდის მუსიკალურ დაჯილდოებაზე სიტყვით გამოსვლისას.[27][28] მეიზი უილიამსი ასევე იყო სატახტოთა თამაშის ათი მსახიობიდან ერთ-ერთი, რომელიც Royal Mail-ის პირველი კლასის საფოსტო მარკებზე დაიტანეს. ეს საფოსტო ბარათები გაერთიანებული სამეფოს ფოსტამ 2018 წლის იანვარში გამოუშვა სერიალში ბრიტანეთის წვლილის აღსანიშნავად.[29][30][31]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.