Humboldtforum

Humboldtforum utawa Forum Humboldt ing basa Jawa iku siji proyèk musiyum gedhèn-gedhènan lan gedhong anyar ing Berlin.^[1] Proyèk iki diparingi jeneng miturut Alexander von Humboldt, lan doné kanggo nggawé punjering budaya donya. Humboldtforum iki papané ana ing tilasé Palast der Republik lan Berliner Stadtschloss. Modèle padha karo gedhong Berliner Stadtschloss kang wis digempur pamaréntah Jerman Wétan sawisé Perang Donya II.

Makèt gedhong anyar Humboldtforum

Humboldt Forum (2020)

Pérangan jeroné bakal dirancang modèren kajaba salah siji palataran jero, ing ngendi fasad-fasadé bakal digawé mawa gagrag asli (Schlüterhof).

Watu bata kapisan disèlèhaké déning Présidèn Joachim Gauck sajeroning upacara ing tanggal 12 Juni 2013.^[2] Manawa gedhong iki rampung ing taun 2019, mengko bakal ngamot siji musiyum modèren kang isiné kolèksi kagunan Afrika lan non-Éropah liyané, saha rèstoran loro, téater siji, biyoskup siji lan siji auditorium.^[3]

Konsèp panrapan Gedhong Berliner Stadtschloss

Fasad sisih kulon Berliner Stadtschlosses (2014)

Artikel utama: Pambangunan ulang Berliner Stadtschloss

Sawijining komisi sujana internasional mutusaké ing taun 2002, sabeciké Gedhong Berliner Stadtschloss kang diyasa manèh iku kanggo apa. Komisi iki banjur mènèhi rembung supaya Humboldtforum diadegaké ana ing jero kastil iki.^[4] Gedhong kastil anyar, samesthiné ora diadegaké manèh supaya ana kastilé manèh, nanging uga kudu nduwé fungsi wigati kang kongkrit. Mula kastil kang diyasa manèh kudu dadi punjer budaya amarga ing laladan iki jaman mbiyèn iku papané punjer sains lan budaya. Ing ngendi gedhong-gedhong Museumsinsel (Pulo Musiyum), Berliner Stadtschloss minangka dalemé Wangsa Hohenzollern, Gréja Berliner Dom lan Zeughaus Berlin manunggal nuduhaké sujarahé Kakaisaran Jerman.

Humboldtforum lan Museumsinsel samesthiné bisa nyaosi sinèrgi antara kagunan, budaya lan sains mawa kolèksi, kapustakan lan kamar-kamar pamèrané. Kajaba iku gumandhèngé kolèksi Éropah ing Museumsinsel lan kolèksi jaba-Éropah ing Humboldtforum bisa nglantari dialog budaya donya ing punjering kutha raja Jerman.

Sing mènèhi jeneng lan yeyasané

Alexander von Humboldt minangka panliti ing nagara ngamanca

Artikel utama: Yeyasan Berliner Schloss – Humboldtforum

Sing mènèhi jeneng proyèk iki, ya iku Humboldt kakang adhi: Alexander lan Wilhelm von Humboldt. Alexander iku minangka warga donya kang wis nglakoni lelampahan adoh lan siji panliti nglambangaké kolèksi jaba-Éropah lan Wilhelm minangka siji sarjana universal nglambangaké gagasan akèh jurusan ngèlmu lan kawruh bisa manunggal sangisoring atep siji. Kayadéné kakang adhi kang manunggal iki, ing tembé ing Humboldtforum, ngèlmu sains lan kawruh ya bakal manunggala.

Kolèksi

Kagunan saka Guwa Buda-Sèwu ing Bäzäklik ing China, mbiyèn isih ing Museum für Asiatische Kunst, Berlin

Ing kamar-kamar pamèran Humboldtforum mengko wiwit taun 2019 bakal didodoki lih-lihan kolèksi kagunan jaba-Éropah darbèné Stiftung Preußischer Kulturbesitz (Yeyasan Kagungan Budaya Prusia) saka Museumszentrum Berlin-Dahlem. Mengko kolèksi karo kolèksi kagunan Éropah kang disimpen ing Museumsinsel bakal nyaosi siji papan Budaya Donya. Gedhong Museumszentrum Berlin-Dahlem saiki iki kawujudaké saka antarané kolèksiné Ethnologisches Museum lan Museum für Asiatische Kunst.

Pendhapa ing papané wong lumebu gedhong, bakal diwènèhi pamèran kang nggandhèngaké kabèh téma lan dadi daya tariké para pamirsa. Perkara iki mèmper panemuné Gottfried Wilhelm Leibniz, minangka téater ngèlmu lan kawruh. Kajaba iku mengko uga bakal ditambahi musiyum sains kang isiné ya iku kolèksi médis Rudolf Virchow lan kolèksi buku kang ana gandhèngané, kolèksiné Kapustakan Zentral-und Landesbibliothek Berlin tuwin Staatsbibliothek zu Berlin. Punjer pamèran kang diarani "Agora" bakal dadi dialog antara budaya-budaya donya.^[5]

Mengko ing tingkat loro bakal dipamèraké kagunan budaya Oséania, saha budaya Amérika lan Afrika. Kamangka mengko ing tingkat telu bakal dipamèraké budaya Asia. Kolèksi-kolèksi kagunan jaba-ëropah kang saiki disinggahaké ing Ethnologisches Museum lan ing Museum für Asiatische Kunst ing Berlin-Dahlem nduwé punjul 500.000 artéfak lan barang kagunan.^[6]

Gladri

• 
  Sesawangan saka forum kastil iki ngliwati Portal IV marang musiyum lawas, Juni 2015
• 
  Sesawangan saka undhak-undhakan marang pendhapa (Agora), Juni 2015
• 
  Lawang lumebu lan nyawang kubah, Juni 2015
• 
  Undhak-undhakan ing tingkat 1, ing tembé dadi kamar pamèran Staatliche Museen zu Berlin (SMB), Juni 2015
• 
  Kamar pamèran SMB ing tembé, Juni 2015
• 
  Undhak-undhakan lumebu ing Humboldtforum, Juni 2015
• 
  Sesawangan ing Schlüterhof ing Portal V, Juni 2015
• 
  Fasad Schlüterhof, Juni 2015
• 
  Kubah kang lagi diyasa, Juni 2016

Réferènsi

1. Knight, Ben; Brown, Mark. "Appointment of Neil MacGregor as head of Humboldt Forum silences critics". the Guardian. Dibukak ing 2015-10-30.
2. Harriet Alexander (12 Jun 2013). "Berlin begins reconstruction of King Frederick the Great's palace". The Telegraph. Dibukak ing 14 June 2013.
3. Hickley, Catherine. "Berlin Palace Rebuilding Begins 63 Years After Explosion". Bloomberg.com. Dibukak ing 2015-10-30.
4. [ttp://www.bmvi.de//cae/servlet/contentblob/27894/publicationFile/82/schlossplatz-berlin-abschlussbericht-der-internationalen-expertenkommission.pdf Die Internationale Expertenkommission „Historische Mitte Berlin“, sumber: Bundesministerium für Verkehr, Bau und Stadtentwicklung, diaksès 2015-06-01]
5. Letzte Ausfahrt Agora. Ing: Frankfurter Allgemeine Zeitung, 21 Dhésèmber 2010.
6. Das Humboldt-Forum. Hrsg. Stiftung Berliner Schloss – Humboldtforum, Februar 2011, S. 20.

Uga delengen

• Humboldt-Box

Pranala njaba

Wikimedia Commons duwé médhia ngenani Humboldtforum.

• Humboldtforum (Stiftung Preußischer Kulturbesitz)
• Humboldt-Box (Informationszentrum am Stadtschloss)
• Broschüre zum Humboldtforum (Hrsg. Stiftung Berliner Schloss – Humboldtforum, Februar 2011)
• Webcams: Hochauflösende Bilder der Baustelle des Berliner Stadtschlosses aus verschiedenen Ansichten Archived 2016-08-08 at the Wayback Machine.