Sameinað Rússland

Sameinað Rússland (kyrillískt letur: Единая Россия; Jedínaja Rossíja) er rússneskur stjórnmálaflokkur. Flokkurinn er sá stærsti í Rússlandi og telur til sín um þrjá fjórðu þingsætanna á rússnesku ríkisdúmunni. Sameinað Rússland hefur haft þingmeirihluta frá árinu 2007.

Sameinað Rússland Единая Россия
Leiðtogi	Vladímír Pútín (óformlega)
Formaður	Dmítríj Medvedev[1]
Aðalritari	Vladímír Jakúshev
Þingflokksformaður	Vladímír Vasíljev
Stofnár	1. desember 2001; fyrir 23 árum (2001-12-01)
Stofnendur	Sergej Shojgú, Júríj Lúzhkov, Míntímer Shajmíjev
Höfuðstöðvar	39. byggingin, Kútúsovskíj-götu, Moskvu, Rússlandi, 121170[2]
Félagatal	2.073.772 (2013)[3]
Stjórnmálaleg hugmyndafræði	Ríkishyggja, íhaldsstefna, rússnesk þjóðernishyggja
Einkennislitur	Hvítur, blár og rauður
Sæti á sambandsráðinu
Sæti á ríkisdúmunni
Vefsíða	er.ru/

Sameinað Rússland var stofnað í desember 2001 með samruna flokkanna Einingar og Föðurlandsins/Alls Rússlands.^[4] Flokkurinn styður stefnumál Vladímírs Pútín Rússlandsforseta, sem er eiginlegur en óformlegur leiðtogi flokksins.^[5]

Bestu kosningaúrslit Sameinaðs Rússlands voru í þingkosningum árið 2007, en þá fékk flokkurinn 64,4% atkvæðanna. Fylgi flokkurins dalaði niður í 49,32% árið 2011 en hann var áfram stærsti þingflokkurinn, á undan Kommúnistaflokki Rússlands, sem hlaut 19,19% atkvæða. Í kosningunum 2016 hlaut flokkurinn 54,2% atkvæða en Kommúnistaflokkurinn 13,3%.

Sameinað Rússland fylgir engri einsleitri hugmyndafræði en flokkurinn styður fjölbreyttan hóp stjórnmálamanna og embættismanna^[6] sem styðja ríkisstjórn Pútíns.^[7] Flokkurinn höfðar síður til hugmyndafræðilegra kjósenda^[8] og því er gjarnan litið á Sameinað Rússland sem „breiðfylkingu“^[9][10][11] eða „valdaflokk“.^[12][13] Árið 2009 lýsti flokkurinn yfir að hugmyndafræði sín væri „rússnesk íhaldsstefna“.^[14][15]

Sameinað Rússland hlaut um helming atkvæða í þingkosningum ársins 2021 samkvæmt opinberum talningum en talið er að kosningasvindl hafi verið útbreitt og hart var sótt að fjölmiðlum og stjórnarandstæðingum í aðdraganda þeirra.^[16]

Ásakanir um spillingu

Stjórnarandstaðan hefur ítrekað sakað Sameinað Rússland um að standa fyrir kerfislægri spillingu og hefur gjarnan kallað það „flokk bófa og ræningja“ (rússneska: партия жуликов и воров; uppnefnið er upprunnið hjá aðgerðasinnanum Aleksej Navalnyj).^[17] Í október 2011 birti Novaja Gazeta grein sem fjallaði um fólk sem hafði skrifað slagorðið „flokkur bófa og ræningja“ á peningaseðla í mótmælaskyni.^[18]

Þann 24. nóvember 2011 sagði ríkisþingmaðurinn Aleksandr Khínshtejn, sem er meðlimur í Sameinuðu Rússlandi, í sjónvarpsumræðum á stöðinni Russia-1:

Sameinað Rússland virkar. Það gerir allt til að bæta lífsskilyrði í landinu okkar. Þeir tala við okkur um „flokk bófa og ræninga.“ Ég skal svara þeim. Það er betra að vera í „flokki bófa og ræningja“ en í „flokki morðingja, nauðgara og ruplara.“[19]

Gengi í kosningum

Forsetakosningar

Kosningar	Frambjóðandi	Fyrri umferð		Seinni umferð		Niðurstaða
		Atkvæði	%	Atkvæði	%
2004	Flokkurinn studdi Vladímír Pútín[a]	49.565.238	71,31	—		Vann
2008	Dmítríj Medvedev	52.530.712	70,28	—		Vann
2012	Vladímír Pútín	46.602.075	63,60	—		Vann
2018	Flokkurinn studdi Vladímír Pútín[a]	56.430.712	76,69	—		Vann
2024	Flokkurinn studdi Vladímír Pútín[a]	76.277.708	88,48	—		Vann

1. Pútín hafnaði tilnefningu Sameinaðs Rússlands og var formlega óháður frambjóðandi.

Þingkosningar

Kosningar	Leiðtogi	Atkvæði	%	Þingsæti	+/–	Sæti	Stjórnarþátttaka
2003	Borís Gryzlov	22.779.279	37,57	223 / 450	122[a]	1.	Meirihluti
2007		44.714.241	64,20	315 / 450	92	1.	Meirihluti
2011	Vladímír Pútín	32.379.135	49,32	238 / 450	77	1.	Meirihluti
2016	Dmítríj Medvedev	28.527.828	54,20	343 / 450	105	1.	Meirihluti
2021	Sergej Shojgú	28.064.258	49,82	324 / 450	19	1.	Meirihluti

1. Miðað við sameinað fylgi Einingar og Föðurlandsins/Alls Rússlands í síðustu kosningum