Konungur Sádi-Arabíu
From Wikipedia, the free encyclopedia
Konungur Sádi-Arabíu er einvaldur í Sádi-Arabíu. Hann er bæði þjóðhöfðingi og stjórnarleiðtogi landsins. Hann er auk þess höfuð Sád-ættar. Konungurinn er ávarpaður sem „verndari mosknanna tveggja“ sem vísar til mosknanna Masjid al Haram í Mekka og Al-Masjid an-Nabawi í Medina.
Fyrsti konungur Sádi-Arabíu var Ibn Sád sem endurheimti emírsdæmi fjölskyldunnar í Ríad árið 1902. Hann lagði í kjölfarið héruðin Nejd og Hejaz undir sig. Árið 1921 lýsti hann yfir stofnun soldánsdæmisins Nejd. Árið 1926 var hann hylltur sem konungur Hejaz og gerði Nejd einnig að konungsdæmi skömmu síðar. Árið 1932 voru þessi tvö ríki sameinuð sem konungsríkið Sádi-Arabía.