Efsaga
From Wikipedia, the free encyclopedia
Efsaga er hugleiðing um hvað hefði getað gerst ef atburðir í mannkynssögunni hefðu farið á annan veg. Vinsælar „hvað ef“-hugleiðingar fjalla um seinni heimsstyrjöldina: til dæmis, „Hvað ef Hitler hefði ekki ráðist inn í Sovétríkin?“[1] Í efsögum eiga sér stað sögulegir atburðir, sem fara á annan hátt en gerðist í raun og veru og niðurstaðan verður einhver annar veruleiki.[2][3][4][5] Efsögur eru þannig eins konar blanda af sögulegum skáldskap og vísindaskáldskap. Ein undirgrein efsögunnar notar tímaflakk og hliðarheima sem frásagnarþátt. Þannig verða til ólíkar tímalínur innan sögunnar.[6]
Gríska hugtakið ουχρονία úkrónía „tímaleysi“ er í ýmsum málum notað yfir efsögur.[7]
Frá 1993 hafa Sidewise-verðlaunin verið veitt árlega fyrir bestu efsöguna. Þau eru oftast veitt á ráðstefnunum WorldCon eða NASFiC.