Chattanooga, Tennessee

Chattanooga esas urbo en Usana stato Tennessee. Segun la demografiala kontado di 2020, ol havis 181 099 habitanti. Lua tota surfaco esas 388,7 km².

Chattanooga
Horizonto di Chattanooga.
Standardo	Blazono
Lando:	Usa
stato:	Tennessee
Informo:
Latitudo:	35°02'44"N
Longitudo:	85°16'02"W
Altitudo:	206 m
Surfaco:	388,7 km²
Habitanti:	181 099 (2020)
Denseso di habitantaro:	491,21 hab./km²
Disto de Nashville:	213,3[1] km
Horala zono:	UTC-5 (UTC-4 dum la somero)
Urbestro:	Tim Kelly
Mapo:
Oficala retosituo:
http://www.chattanooga.gov/

Centro di Chattanooga.

Chattanooga esis decidiganta urbo dum l'interna milito di Usa pro la granda quanto di ferovoyi konverginta ibe^[2]. Pos finir la milito, la ferovoyi posibligis l'expanso di industrii. Nun, la maxim importanta industrii esas automobilala, moderna industrii, produktado di nutrivi e drinkaji, sanesala, asekurala e turismo. Ultre to, la urbo koncentras la sideyi di multa importanta kompanii. Ol ank esas koncentro-punto por choseala transporto. Ol distas 190 kilometri nord-weste de Atlanta, Georgia, 180 kilometri sud-weste de Knoxville, Tennessee, 213 kilometri sud-este de Nashville, Tennessee, 164 kilometri este-nord-este de Huntsville, Alabama, e 237 kilometri nord-este de Birmingham, Alabama.

Ol esas internacione konocata pro la kansono "Chattanooga Choo Choo" da Glenn Miller e lua orkestro, enrejistrita en 1941. La kampusi dil universitato di Tennessee en Chattanooga (Angle: University of Tennessee at Chattanooga, abreviuro UTC) e di la Fakultato Chattanooga State Community College jacas en Chattanooga.

Geografio

Chattanooga kun rivero Tennesee, vidita de monto Lookout.

La reliefo di Chattanooga esas preske plana, kun poka kolineti, jacanta inter monti Apalachi e kolini Walden, an la rivo di rivero Tennessee. La mezavalora altitudo dil urbo esas 206 metri.

La klimato di Chattanooga esas humida subtropikala (Cfa segun la klimatala klasifikuro da Köppen), kun moderema vintri. Tamen mezavalore dum 3,2 dii omnayare, enrejistresas temperaturi infre 0°C. Nivo povas falar en januaro, e plu ofte en februaro. La mezavalora temperaturo en januaro (vintro) esas 5,4°C, kontre ke la mezavalora temperaturo en julio (somero) esas 27,1°C.

La mezavalora yarala pluvo-quanto dil urbo esas 1397 mm. Novembro til marto esas periodo relate pluvoza. La maxim pluvoza monato esas marto, kun mezavalore 136 mm. Julio ank esas pluvoza monato (mezavalore 129 mm), freque kun sturmi. Tamen, ne existas sezono komplete sika. Malgre esar cirkondata da monti, Chattanooga frapabas recente da tornadi^[3].

Referi

1. https://www.rome2rio.com/s/Nashville/Chattanooga
2. Battle of Chattanooga | Civil War, Union Victory, Confederate Defeat | Britannica - Publikigita da Encyclopaedia Britannica. Idiomo: Angla.
3. Chattanooga, TN Natural Disasters and Weather Extremes - Publikigita da USA.com. URL vidita ye 30ma di januaro 2025. Idiomo: Angla.