Joaquín González (politiko)
Filipino a mangngagas ken politiko From Wikipedia, the free encyclopedia
Filipino a mangngagas ken politiko From Wikipedia, the free encyclopedia
Ni Joaquín González (Hulio 22, 1853 – Septiembre 21, 1900) ket maysa idi a politiko a Filipino ken kameng ti Kongreso ti Malolos a nagsurat iti Batay-linteg ti Malolos, ti immuna a Batay-linteg ti Filipinas, kalapasan idi inrangarang ti wayawaya ti pagilian manipud iti Espania idi 1898. Isuna ket maysa kadagiti dua a nabutosan a delegado a nangirepresenta ti probinsia ti Pampanga, ti sabali ket ni Jose Rodriguez Infante. Kakuyog ni Felipe Calderon y Roca, ti nangruna a nagsurat iti batay-linteg, ni Dr. González ket paset idi ti komite a nakibinglay kadagiti debato a naipan kadagiti artikulo kada artikulo manipud idi Oktubre 25 aginggana idi Nobiembre 29, 1898.[1]
| Dr. Joaquín González | |
|---|---|
| Nayanak | Hulio 22, 1853 Baliuag, Bulacan, Kapitania Heneral ti Filipinas |
| Natay | Septiembre 21, 1900 (tawen 47) Malate, Manila, Is-isla ti Filipinas |
Ni Dr. González ket maysa idi a Espaniol a mestiso anak da Fausto López (manipud iti Valladolid, Espania) ken María Amparo González y de los Ángeles (manipud iti Baliuag, Bulacan). Nagsanay isuna kas maysa a Doktor ti Medisina idiay Espania iti Universidad de Valladolid ken ti Universidad Central de Madrid (itan ket ti Universidad Complutense de Madrid). Kamaudian a dimmar-ay iti Instituto ti Optalmologo ni Dr. Wecker iti Paris, Pransia, tapno agbalin nga espesialista kadagiti sakit ti mata. Nakunkuna a nagobra ni José Rizal iti isu met laeng nga instituto ngem saan met a nagsabat dagiti dua a Filipino.
Idi Oktubre 19, 1898, naidutok ni Dr. González a kas ti immuna a Rektor/Presidente ti Universidad Cientifico-Literaria de Filipinas, ti inunaan ti Unibersidad ti Filipinas babaen ni Presidente Emilio Aguinaldo. Ti unibersidad ket addaan kadagiti pakultad kadagiti linteg ti sibil ken krimen, ken ti pay medisina ken operasion.[2] Nagisusuro isuna ti linteg ti medisina, toksikolohia ken kinadalus ti publiko.
Idi Abril 1899, ni Dr. González ket nagbalin a maysa kadagiti pito a kameng ti Permanente a Komision ti Nailian nga Asemblia[1] babaen ti Batay-linteg ti Malolos nga addaan kadagiti mangay-aywan a bileg iti labes ti Presidente ti Republika, dagiti Pannakabagi, dagiti Sekretario ti Gabinete, ti Pangulo ti Hustisia ken ti Solisitor Heneral idi las-ud ti panagsardeng ti Asemblia.[3]
Inasawana ni Florencia Sioco y Rodríguez (1860–1925) ken nagannakda kadagiti sangapulo a lallaki, da Fernando, Jesus, Emilio, Augusto (ama ti dati a Sekretario ti Edukasion Andrew Gonzalez), Octavio, Virgilio, Javier, Bienvenido (maika-6 a Presidente ti Unibersidad ti Filipinas), Joaquin ken Fausto (dati a Kongregista ti Pampanga).
Pimmusay ni Dr. González iti nakaro a apendisitis iyi Malate, Manila idi Septiembre 21, 1900. Nairangarang idi ti maysa a dakkel a nailian a panagminatay, ken ti pannagna dagiti mapan mangitabon ket dinar-ayan ti intero a Komision Sibil nga indauluan babaen ti immuna a presidentena ken ti Amerikano a Gobernador Heneral, ni William Howard Taft; dagiti turay ti militar ti Amerikano; dagiti nadayeg a Filipino ken dadduma pay a tattao.[4]
