Քայլող մեռյալները (հեռուստասերիալ)

«Քայլող մեռյալները» (անգլ.՝ The Walking Dead), ամերիկյան հետապոկալիպտիկ և սարսափ բազմասերիանոց հեռուստասերիալ։ Ցուցադրվել է 2010 թվականի հոկտեմբերի 10-ից՝ ընդհանուր առմամբ ունենալով 10 եթերաշրջան։ Հիմնված է Ռոբերտ Քըրքմանի, Թոնի Մուրի և Չառլի Ադլարդի հեղինակած համանուն պատկերապատման (կոմիքս) վրա։

Քայլող մեռյալները
Ժանր	սարսափ հեռուստասերիալ, հեռուստադրամա, հետապոկալիպտիկ հեռուստասերիալ, zombie apocalyptic television program? և television adaptation?
Թեմա	զոմբի, գոյատևման հմտություն և societal collapse?
Ստեղծող	Ֆրենկ Դարաբոնտ
Երկիր	ԱՄՆ[1][2]
Հիմք	Քայլող մեռյալները
Լեզու	անգլերեն
Ռեժիսոր	Ֆրենկ Դարաբոնտ
Գլխավոր դերերում	Էնդրյու Լինքոլն, Ջոն Բերնթալ, Սառա Ուեյն Քելիս, Լորի Հոլդեն, Ջեֆրի Դեման, Սթիվեն Յան, Չենդլեր Ռիգս, Նորման Ռիդուս, Լոուրեն Քոհեն, Դանայ Գուրիրա, Մայքլ Ռուքեր, Դևիդ Մորիսի, Մելիսա Մաքբրայդ, Սքոթ Ուիլսոն, Մայքլ Քադլից, Էմիլի Քինի, Չադ Քոլմեն, Սոնեքուա Մարտին-Գրին, Լերի Ջիլիարդ, Ալանա Մաստերսոն, Ջոշ Մաքդերմիթ, Քրիստիան Սերատոս, Էնդրյու Ուեսթ, Սեթ Գիլիամ, Ռոս Մարքուանդ, Ալեքսանդրա Բրեքենդրիջ, Թովա Ֆելդշու, Օսթին Նիքոլս, Սունքրիշ Բալա, Էնդրյու Ռոտենբերգ, Խուան Գաբրիել Պարեհա, Այրոնի Սինգլթոն, Ջերիլ Փրեսքոթ, Ադամ Մինարովիչ, Մեդիսոն Լինթց, Ջեֆրի Դին Մորգան, Օսթին Ամելիո, Քեյթլին Նեյկոն, Էմմա Բել, Թոմ Փեյն, Քսանդեր Բերքլի, Լենի Ջեյմս[3], Սթիվեն Օգ[3], Սարբինա Բրիգթոն[3], Լյու Թեմփլ[3], Խոսե Պաբլո Կանտիլո[3], Դալլաս Ռոբերտս[3], Փրուիթ Թեյլոր Վինս[3], Ֆիլիպ ԴեՎոնա[3], Մայքլ Ռայմոնդ-Ջեյմս[3], Նոահ Լոմաքս[3], Վինսենթ Ուորդ[3], Ալեքսա Նիքոլաս[3], Մելիսա Փոնզիո[3], Կայլ Գալներ[3], Վինսենթ Մարտելա[3], Ջուլիանա Հարքավի[3], Օդրի Մարի Անդերսոն[3], Քըրք Ասևեդո[3], Էնվեր Գյոկայ[3], Քերի Քոնդոն[3], Մայքլ Զեգեն[3], Ջեֆֆ Կոբեր[3], Էդդի Միլլեր[3], Քայլա Քենեդի[3], Քեյշա Քասլ-Հյուզ[3], Ջոն Քերոլ Լինչ[3], Ջ. Դ. Էվերմոր[3], Իթան Էմբրի[3], Քուլեն Մոս[3], Էլդիս Հոջ[3], Քամերոն Դին Ստյուարտ[3], Խուլիո Սեդիլյո[3], Գարի Վիքս[3], Ջեյսոն Դուգլաս[3], Օսթին Աբրամս[3], Ռ․ Քեյթ Հարրիս[3], Ալիսիա Ուիթ[3], Ջանեն Գուսեն[3], Ռաս Բլեքվել[3], Խարի Փեյթոն[3], Սիդնի Փարկ[3], Լոգան Միլլեր[3], Թոմաս Ֆրենսիս Մերֆի[3], Թայլեր Ջեյմս Ուիլյամս[3], Քորի Հոուքինզ[3], Դևիդ Սիլվերման[3], Ռոբին Լորդ Թրեյլոր[3], Դենիզ Քրոսբի[3], Թրեյսի Դինվիդի[3], Քալլան ՄակՕլիֆ[3], Լի Նորիս[3], Ադամ Հիքս[3], Քենրիք Գրին[4], Նադիա Հիլքեր, Սամանթա Մորթոն, Ռայան Հերստ և Քիշա Թիլս[4]
Պրոդյուսեր	Ֆրենկ Դարաբոնտ
Գործադիր պրոդյուսեր	Գեյլ Էն Հարդ
Օպերատոր	Դեյվիդ Բոյդ և Դևիդ Թաթերսոլ
Երաժշտություն	Բեր ՄակՔրիրի
Պատմվածքի վայր	Ջորջիա, Վիրջինիա և Ատլանտա
Գեղարվեստական աշխարհ	The Walking Dead Television Universe?
Նկարահանման վայր	Ջորջիա[4]
Եթերաշրջանների քանակ	11
Սերիաների քանակ	177
Էկրաններին է	հոկտեմբերի 31, 2010[1]-ից
Հեռուստաալիք	AMC (ԱՄՆ-ում) Fox International (այլ երկրներում)
Ընկերություն	AMC Studios Circle of Confusion Darkwood Productions Valhalla Motion Pictures
Դիստրիբյուտոր	Նեթֆլիքս և Դիսնեյ+
Պատկերի ձևաչափ	16:9
Ձայնի ձևաչափ	Dolby Digital 5.1 (DVD) Dolby TrueHD 5.1 (Blu-ray) Dolby TrueHD 7.1 (Blu-ray)
Պարգևներ	Saturn Award for Best Supporting Actress on Television? Saturn Award for Best Television Presentation? և MTV կինոմրցանակ լավագույն չարագործին
Առաջադրում	Հեռուստատեսային քննադատների մրցանակ լավագույն նոր հաղորդման համար, Հեռուստատեսային քննադատների մրցանակ լավագույն նոր հաղորդման համար, Հեռուստատեսային քննադատների միության մրցանակ տարվա հեռուստահաղորդման համար, Էմմի մրցանակ լավագույն հատուկ վիզուալ էֆեկտների համար, ԱՄՆ գրողների գիլդիայի հեռուստամրցանակ նոր սերիալների համար, Էմմի մրցանակ լավագույն հատուկ վիզուալ էֆեկտների համար, Directors Guild of America Award for Outstanding Directing – Drama Series? և Գիլդիայի անվան մրցանակ
Կապակցված	Վախեցեք քայլող մեռյալներից
Կարգավիճակ	Ընթացիկ
Պաշտոնական կայքէջ

Սերիալը պատմում է շերիֆի տեղակալ Ռիք Գրայմսի մասին (Էնդրյու Լինքոլն), որը տևական կոմայից վերականգնվելուց հետո հայտնաբերում է, որ ողջ աշխարհը ենթարկվել է զոմբի ապոկալիպսիսի։ Գործողությունները կատարվում են մի քանի առանցքային կերպարների շուրջ, որոնք տեղից տեղ են փախչում՝ փորձելով ապահով վայր գտնել և հեռու մնալ քայլող մարդկային դիակներից, ինչպես նաև վտանգավոր մարդկանցից։

Միացյալ Նահանգներում հեռուստասերիալը ցուցադրվում է AMC հեռուստաալիքով^[5]։

Առաջին եթերաշրջանից մինչև հինգերորդ եթերաշրջանի առաջին կեսը գործողությունները զարգանում են Ատլանտայի քաղաքային ագլոմերացիայում, իսկ սկսած երկրորդ կեսից՝ Ալեքսանդրիա քաղաքում։

Հեռուստասերիալն ունի դրական ընդունելություն քննադատների շրջանում և արժանացել է բազմաթիվ անվանակարգերի, մասնավորպես՝ Ամերիկյան սցենարիստների միության մրցանակի, ինչպես նաև Ոսկե գլոբուսի` «Լավագույն դրամա ժանրի հեռուստասերիալ» անվանակարգում։ Հեռուստասերիալի երրորդ եթերաշրջանը ունեցել է ռեկորդային 10,9 միլիոն դիտորդ, որով դարձել է ամենադիտված հեռուստադրաման կաբելային հեռուստատեսության պատմության մեջ^[6]։

2015 թվականի օգոստոսի 23-ին եթեր է բարձրանում «Վախեցեք քայլող մեռյալներից» զուգահեռ սփին-օֆֆ հեռուստադրաման^[7]։

Սյուժե

Առաջին եթերաշրջան (2010)

Շերիֆի տեղակալ Ռիք Գրայմսը (Էնդրյու Լինքոլն) ծառայության ժամանակ վիրավորվում է հանցագործի արձակած փամփուշտից։ Գրայմսին տեղափոխում են մոտակա հիվանդանոց, որտեղ նա որոշ ժամանակ գտնվում է կոմայի մեջ։ Տևական ժամանակ անց Ռիքը արթնանում է կոմայից և հայտնաբերում, որ հիվանդանոցը կիսախարխուլ վիճակում է, և այնտեղ ոչ ոք չկա։ Հաջորդիվ, Գրայմսը պարզում է նաև, որ աշխարհը ենթարկվել է զոմբի-ապոկալիպսիսի. ամենուրեք երևում են քայլող մարդկային դիակներ՝ ծամծմված մարմիններով և սահմռկեցուցիչ հայացքներով։ Զոմբիները, որոնց (նաև պատկերապատումներում) պայմանականորեն կոչում են քայլողներ (walkers), նախկինում եղել են սովորական մարդիկ, որոնք մահացել են, այնուհետև «վերակենդանացել» որպես վտանգավոր արարածներ։ Ռիքը հայտնաբերում է նաև, որ կինն ու որդին անհետացել են։ Ապաստան գտնելով Մորգան անունով մի մարդու և նրա որդու՝ Դուեյնի մոտ, Ռիքը որոշակի պատկերացում է կազմում քայլողների մասին։ Նրան բացատրում են, որ քայլողին սպանելու միակ ձևը ուղեղը վնասելն է, քանի որ հենց ուղեղն է կառավարում արարածի՝ արդեն մահացած մարմինը։ Մոտակա ամայացած ոստիկանատանը սպառազինվելով՝ Ռիքը ուղևորվում է դեպի Ատլանտա` համարելով, որ «Հիվանդությունների վերահսկաման և կանխարգելման կենտրոն»-ը ինչ-որ լուծում տված կլիներ այդ անհասկանալի համաճարակին։ Այնուամենայնիվ, մուտք գործելով քաղաք Ռիքը պարզում է, որ տեղի բնակչությունը նույնպես զոմբիացվել է։

Միևնույն ժամանակ Ատլանտայից մի քանի մղոն հեռու Ռիքի կինը` Լորին (Սառա Ուեյն Քելիս) և որդին՝ Կարլը (Չենդլեր Ռիգս) մի շարք փախստականների հետ պատսպարվում են քայլողներից։ Խումբը ղեկավարում է Ռիքի լավագույն ընկեր և ոստիկանական գործընկեր Շեյն Ուելշը (Ջոն Բերնթալ), որը սիրահարվել էր Լորիին։ Խմբի մի քանի անդամ մեկնել էր Ատլանտա, ինչը ճակատագրական դեր է ունենում Ռիքի համար, քանի որ հենց նրանք են փրկում նրան։ Ատլանտայի խումբը Ռիքի հետ միասին ուղևորվում է Շեյնի ճամբար, որտեղ Ռիքը գտնում է կնոջն ու որդուն։ Մի գիշեր խումբն հարձակման է ենթարկվում քայլողների կողմից և կրում որոշ մարդկային կորսուստներ։ Փրկվածներն ուղևորվում են դեպի Ատլանտայի հիվանդությունների վերահսկաման և կանխարգելման կենտրոն։

Հասնելով կենտրոն, մարդիկ պարզում են, որ այնեղ միայն մեկ կենդանի մարդ կար՝ դոկտոր Էդվին Ջենները (Նոա Էմերիչ), իսկ մյուսները կամ փախուստի էին դիմել, կամ էլ ինքնասպանություն գործել։ Ջենները մարդկանց բացատրում է, որ չի կարողացել որևէ դեղամիջոց ստանալ այդ համաճարակի դեմ։ Շուտով հրդեհային գեներատորների համար նախատեսված վառելիքի պակասի պատճառով շինությունը ավտոմատ կերպով պատրաստվում է ինքնաոչնչացման՝ կանխելու հնարավոր մահաբեր հիվանդությունների արտանետումը։ Ջենները ցանկություն չի հայտնում լքելու շենքը։ Շենքում մնալու և պայքարը ավարտելու ցանկություն է հայտնում նաև Ջեքին, որը Ռիքի խմբի անդամներից էր։ Խումբը հաջողությամբ փախչում է կենտրոնից, որն անմիջապես պայթում է։

Երկրորդ եթերաշրջան (2011-2012)

Կենտրոնը լքելուց հետո Ռիքի խումբը՝ բաղկացած Շեյնից, Լորիից, Կարլից, Գլենից (Սթիվեն Յան), Քերոլից (Մելիսա Մակբրայդ), նրա դուստր Սոֆիայից (Մեդիսոն Լինթզ), Անդրեայից (Լոուրի Հոլդեն), Թեոդոր «Թի Դոգ» Դուգլասից (Այրոն Սինգլթոն), Դերոլից (Նորման Ռիդուս) և ծերունի Դեյլից (Ջեֆրի Դեման), որն առաջարկում է որպես պատսպարվելու վայր ընտրել Ֆորտ Բենինգը։ Վերջինս հանդիսանում է Միացյալ Նահանգների զինված ուժերի խոշորագուն ռազմակայաններից մեկը։ Խումբը 85-րդ միջնահանգային ճանապարհով երթևեկելիս ընկնում է լքված մեքենաների խցանման մեջ։ Ամայացած մեքենաներից խումբը փոքր քանակությամբ սնունդ և դեղամիջոցներ է գտնում։ Սակայն, նրանց է մոտենում քայլորդների ստվար զանգված։ Գիտակցելով, որ պատրաստ չեն կռվի, հերոսները շուտափույթ թաքնվում են ամայացած մեքենաների տակ։ Դժբախտաբար, զոմբիներից մեկը նկատում է փոքրիկ Սոֆիային, որը զարհուրած փախչում է դեպի անտառ։ Ռիքը շտապում է աղջնակի հետևից։ Նկատելով, որ Սոֆիային երկու քայլող են շրջապատել՝ Ռիքը նրան թաքցնում է մոտակա ծառի խոշոր արմատների տակ՝ որպեսզի սպանի զոմբիներին։ Ծանր քարերի միջոցով զոմբիներին սպանելուց հետո Ռիքը վազում է դեպի Սոֆիայի թաքստոցը, սակայն նրան այդտեղ չի գտնում։ Ճարահատյալ Ռիքը վերադառնում է մարդկանց մոտ՝ Քերոլին խոստանալով, որ դեռ կգտնի նրա դստերը։

Երբ Ռիքը, Կարլը և Շեյնը անտառում մի գեղեցիկ եղնիկ են նկատում, Կարլը, դյութված կենդանու գեղեցկությամբ, ցանկանում է ավելի մոտիկից տեսնել նրան։ Հանկարծակի կրակոց է լսվում, և հրացանի փամփուշտը, անցնելով եղնիկի պարանոցով վիրավորում է Կարլին։ Կրակոցի հեղինակը Օտիս անունով մի որսորդ է լինում, որը չէր նկատել Կարլին։ Օտիսը ցայտնոտված շտապում է դեպի երեխան։ Այնուհետև խումբը շտապում է դեպի մոտակա ֆերման, որտեղ բնակվում էր նաև Օտիսը։ Ֆերմայում նրանց դիմավորում է անասնաբույժ Հերշել Գրինը (Սկոտ Ուիլսոն)։ Այնուհետև Օտիսը Շեյնի հետ մեկնում է տեղի ավագ դպրոց, որպեսզի այնտեղից դեղամիջոցներ գտնի, քանի որ Կարլի վերահատման համար Հերշելին մի շարք դեղեր էին անհրաժեշտ, հակառակ դեպքում տղան կմահանար։ Անհրաժեշտ դեղամիջոցները գտնելուց հետո Շեյնը զոհաբերում է Օտիսին և փախչում դեպի ֆերմա։ Վիրահատությունը հաջող է անցնում։ Մինչ Կարլը կապաքինվեր, Ռիքի խմբի մյուս անդամները նույնպես գալիս են ֆերմա և որոշ ժամանակ ապրում Հերշելի ընտանիքի հետ։ Դերոլը մի քանի անգամ ուղևորվում է անտառ՝ Սոֆիային փնտրելու՝ այդ կերպ ավելի մոտ հարաբերություններ հաստատելով Քերոլի հետ։ Լորին պարզում է, որ հղի է (առանց իմանալու, թե ով է երեխայի հայրը)։ Գլենը սիրավեպ է ունենում Մեգիի (Լոուրեն Քոհեն) հետ, որը Հերշելի ավագ դուստրն էր։ Գլենը նաև պարզում է, որ ֆերմայում գտնվող անասնագոմը լի է զոմբիներով, որոնցից մի քանիսը Հերշելի ընտանիքի անդամներն են եղել։ Շեյնը այդ մասին իմանալով բաց է անում գոմի դուռը և հատ-հատ սպանում քայլողներին։ Հանկարծ դուրս է գալիս վերջին զոմբին, և խմբի անդամները ճանաչում են փոքրիկ Սոֆիային։ Ռիքը կրակում է զոմբիացված Սոֆիայի վրա։

Պատահարից հետո խումբը գտնվում է բավականին ծանր հոգեբանական վիճակում։ Քերոլը դստեր մահվանից հետո գրեթե չի խոսում որևէ մեկի հետ։ Դերոլը մեկուսանում է խմբից։ Հերշելի կրտսեր դուստր Բեթն ուշաթափվում է, իսկ Հերշելն անհետանում է։ Ռիքը Գլենի հետ ուղևորվում է նրան փնտրելու։ Հերշելին գտնում են մոտակա ամայացած բարում, որտեղ նա ալկոհոլային խմիչքներ էր վայելում։ Հանկարծ բար են մտնում երկու կասկածելի անձինք և շուտով փորձում սպանել հերոսներին, սակայն Ռիքը ավելի հմուտ է գտնվում և ինքն է սպանում կասկածելի անձանց։ Հանկարծ մահացածների խմբակիցները դրսից սկսում են կրակել։ Ռիքը, Հերշելը և Գլենը ֆիզիկական վնասներ են հարուցում ավազակներին, և վերջիններս նահանջում են՝ մարտի դաշտում թողնելով իրենց վիրավորված ընկերոջը՝ Ռենդալին։ Խումբը վերադառնում է ֆերմա՝ Ռենդալին տանելով իրենց հետ։ Մինչ ֆերմայում որոշում են Ռենդալի ճակատագիրը, Դեյլի վրա հարձակվում է մի քայլող և մերկ ձեռքերով սկսում է փորփրել ծերունու ստամոքսը։ Ուշացած կրակոցը տապալում է զոմբիին, սակայն Դեյլի վիճակը ծայրահեղ ծանր է լինում, ուստի Դերոլը ճարահատյալ կրակում է նրան։

Խումբը դրանից հետո սկսում է փնտրել Ռենդալին, ում Շեյնը գաղտնի տարել էր անտառ և սպանել։ Դերոլը և Գլենը գտնում են Ռենդալի զոմբիացված մարմինը։ Նրան սպանելուց հետո նրանք պարզում են, որ Ռենդալը մահացել էր ոչ թե այլ զոմբիների կծոցից, այլ պարանոցի կոտրվածքից, որը կարող էր միայն մարդը անել։ Միևնույն ժամանակ Շեյնը Ռիքին տանում է անտառ՝ կեղծ փնտրում իրականացնելու համար։ Հանկարծակի Շեյնը ատրճանակը պահում է Ռիքի վրա ցանկանալով սպանել լավագույն ընկերոջը և տիրել նրա ընտանիքին։ Ռիքը, սակայն, դանակով հարվածում և սպանում է Շեյնին, որից հետո սկսում է լաց լինել։ Կարլը ամեն ինչ տեսնում է և ատրճանակը պահում է անորոշ ուղղությամբ։ Ռիքին թվում է, թե ատրճանակը իրեն էր ուղղված, սակայն Կարլը սպանում է զոմբիացված Շեյնին, որն արդեն սկսում էր հարձակվել անտեղյակ Ռիքի վրա։

Կրակոցը գրավում է մեծ քանակությամբ զոմբիների, որոնք հարձակվում են ֆերմայի վրա։ Արյունալի մարտի ժամանակ քայլողները հոշոտում են Բեթի ընկեր Ջիմիին և Օտիսի այրի Պատրիցիային։ Անդրեան փախչում է անտառ և միայնակ դիմակայում քայլողների դեմ։ Նրա կյանքը փրկում է քողարկված մի կին։ Խմբի մնացյալ անդամները վերախմբավորվում են եթերաշրջանի սկզբում նկարագրված միջնահանգային ճանապարհի մոտ։ Իմանալով Ռենդալի մահվան մեջ մարդկային, այլ ոչ թե զոմբիական գործոնի առկայության մասին, Ռիքը հայտնում է ընկերներին, որ Ատլանտայում դոկտոր Ջեները խոստովանել էր այն մասին, որ բոլոր մարդիկ վարակված են զոմբիական հիվանդությամբ, այսինքն՝ էական չէ, թե մարդուն կծել են զոմբիները, թե նա մահացել է իր մահով, կարճ ժամանակ անց հանգուցյալը վերակենդանանում է որպես քայլող մեռյալ։ Եթերաշրջանի ավարտին մեծ պլանով ցուցադրվում է մի հսկայական բանտ, որին շատ մոտ գտնվում էին հերոսները։

Երրորդ եթերաշրջան (2012-2013)

Երրորդ եթերաշրջանը սկսվում է ֆերմայի փախուստից մի քանի ամիս անց, երբ Լորին գտնվում է հղիության վերջին շրջանում։ Խումբն արդեն նշմարելի փորձ է ձեռք բերել, և անդամներից յուրաքանչյուրն իր ներդրումն է ունենում ի շահ ամենքի։ Հերոսները հայտնաբերում են զոմբիներով վխտացող հսկայական մի բանտ և սկսում դանդաղորեն մաքրել այն՝ դարձնելով իրենց նոր բնակատեղին։ Ենթադրելով, որ բանտը համեմատաբար շուտ է ենթարկվել ապոկալիպսիսի՝ հերոսները սկսում են մուտք գործել ներքին շինությունները՝ անհրաժեշտ պարեն և դեղորայք փնտրելու։ Մութ միջանցքներում նրանց վրա քայլողների մի զանգված է հարձակվում, ինչի արդյունքում նրանցից մեկը կծում է Հերշելի ոտքը, և Ռիքը ստիպված կացնով անդամահատում է այն, հակառակ դեպքում Հերշելը նույնպես քայլորդի կվերածվեր։ Բանտի ճաշարանում նրանք հանդիպում են պատսպարված կալանավորների մի խմբի, որոնք կարողացել էին դիմակայել սովին ճաշարանում եղած սննդի մեծաթիվ պաշարների հաշվին։ Ռիքը նախկին հանցագործների հետ համաձայնության է գալիս սննդի դիմաց նրանց համար նոր սենյակ մաքրել՝ իր խմբից հեռու։ Մաքրման ընթացքում հանցագործների մեծ մասը տարբեր պատճառներով մահանում է։ Հերթական զոմբիական հարձակումը պառակտման է ենթարկում խումբը։ Պայքարի ժամանակ Թի-Դոգը զոմբիական վնասվածք է ստանում և զոհաբերում է իրեն՝ որպեսզի Քերոլը կարողանա փախչել։ Վերջինս անհետանում է։ Փախչողների մի այլ խումբ՝ Լորին, Կարլը և Մեգին պատսպարվում են բանտի մութ սենյակներից մեկում, որտեղ Լորին զգում է, որ պետք է վաղաժամ ծննդաբերի։ Տեսնելով, որ ծննդաբերության փորձը ձախողվում է, Լորին խնդրում է Մեգիին Կարլի դանակով կեսարյան հատում կատարել՝ երեխայի կյանքը փրկելու համար։ Վիրահատման արդյունքում Լորին մահանում է, և Կարլը մեծ դժվարությամբ կրակում է մորը՝ դին զոմբիականացվելուց փրկելու համար։ Խումբը մի քանի օր անցկացնում է խորը վշտի մեջ։ Հայր ու որդի որոշում են նորածնի անունը Ջուդիթ կնքել։ Դերոլը գտնում է վախից թաքնված Քերոլին։

Այդ ընթացքում խմբից անջատված Անդրեան փրկվում է Միշոն (Դանայ Գուրիրա) անունով երիտասարդ սևամորթ կնոջ կողմից։ Միշոնը բավականին լավ մարտիկ էր և իր հետ կրում էր ճապոնական կատանա տեսակի սուր։ Անդրեային և Միշոնին տանում են Վուդբերի կոչվող փոքրիկ ավան, որը պարսպապատված էր և ուներ մոտավորապես 80 մարդկանցից կազմված բնակչություն։ Վուդբերիի փոքրիկ համայնքը ղեկավարվում էր մի մարդու կողմից, ով ինքն իրեն կոչում է «Կառավարիչ»։ Անդրեան պարզում է, որ Դերոլի ավագ եղբայր Մեռլը (Մայքլ Ռուքեր) ողջ է (Մեռլը Ատլանտայում Ռիքի հետ կոնֆլիկտ ունենալու պատճառով ձեռնաշղթաներով գամվել էր շենքի տանիքի վրա գտնվող խողովակներից մեկին, հետագայում երբ Ռիքը Դերոլի, Գլենի և Թի-Դոգի հետ վերադարձել էր Մեռլին փրկելու, տանիքում գտել էր միայն նրա հատված ձեռքը) և Կառավարչի գլխավոր մարդկանցից է։ Միշոնը միանգամից կասկածանքով է վերաբերվում Կառավարչին և որոշում է հեռանալ ապաստանից, սակայն Անդրեան ցանկանում է մնալ։ Հետագայում պարզվում է, որ Միշոնն իրավացի էր, քանի որ սերիաներից մեկում ցուցադրվում է Կառավարչի կերպարի զարգացումը. նա իր մարդկանցով հարձակվում է փոքր ռազմաբազայի վրա և սպանում բոլոր զինվորներին, բացի այդ իր տանը Կառավարիչը գաղտնի անկյուն ուներ, որտեղ ակվարիումներով մարդկային և զոմբիական գլուխներ էր պահում։ Նույն սենյակում Կառավարիչը պահում էր նաև փոքրիկ դստեր շղթայված և զոմիբիացված դիակը և ժամանակ առ ժամանակ «այցելում» էր նրան։ Անդրեան շուտով սիրավեպ է ունենում Կառավարչի հետ։ Մեռլը Կառավարչից հրահանգ է ստանում սպանելու Միշոնին, սակայն նրան հաջողվում է միայն վիրավորել։ Միշոնն էլ իր հերթին սպանում է Մեռլի մարդկանց։ Վերադարձի ճանապարհին Մեռլը սպանում է վերջին զինակցին։ Կառավարիչը նրան կրկին ուղարկում է Միշոնի հետևից։ Այդ ընթացքում վիրավոր Միշոնը հասնում է մի փոքր ամայացած խանութի տարածք։ Հենց այդ պահին Գլենը և Մեգին (որոնք նաև սիրահարներ են) դուրս են գալիս խանութից՝ ձեռքներին զամբյուղով մթերքներ։ Միշոնը իսկույն թաքնվում է։ Հանկարծ Գլենի վրա հարձակում է գործում Մեռլը և նրանց որպես գերի տանում Կառավարչի մոտ։ Միշոնը այդ ամենին ականատես լինելով գտնում է բանտ-թաքստոցը և Ռիքին, Դերոլին ու նախկին բանտարկյալ Օսկարին առաջնորդում դեպի Վուդբերի՝ փրկելու Գլենին և Մեգիին։ Այդ ընթացքում Մեռլը ծեծի է ենթարկում Գլենին՝ որպեսզի իմանա, թե որտեղ է նրանց թաքստոցը, սակայն ապարդյուն։ Այդ տեսնելով Կառավարիչը սպառնում է Մեգիին, որ կսպանի սիրեցյալին, եթե չասի թաքստոցի տեղը, և Մեգին ճարահատյալ խոստովանում է։

Երբ փրկիչ ջոկատը հասնում է Վուդբերի, Միշոնը լքում է մյուսներին և գնում Կառավարչի տուն։ Ներս մտնելով՝ Միշոնը հայտնաբերում է Կառավարչի գաղտնի անկյունը և սպանում զոմբիացված դստերը։ Հանկարծ Կառավարիչը վրա է հասնում։ Կռվի ժամանակ Միշոնը կոտրված ակվարիումի ապակիով կուրացնում է Կառավարչի աջ աչքը և փախչում։

Այս ընթացքում Ռիքը իր փոքրիկ ջոկատով կարողանում է փրկել Գլենին և Մեգին։ Հրաձգության ժամանակ Օսկարը սպանվում է, իսկ Դերոլն անհետանում։

Որոշ ժամանակ անց Կառավարիչը իր բնակիչների հետ ժողով է կազմակերպում, որի ժամանակ հրապարակայնորեն մեղադրանքների տարափ է տեղում Մեռլի հասցեին։ Կառավարչի զինվորները հրապարակ են բերում շղթայված Դերոլին, և նա դիմում է բնակիչներին՝ եղբայրների ճակատագիրը որոշելու համար։ Ամբոխը ցանկություն է հայտնում, որ եղբայրները գոտեմարտեն մինչև նրանցից մեկը չմահանա։ Ռիքը Մեգիի հետ վերադառնում է և փրկում է Դիքսոն եղբայրներին, բոլորը հաջողությամբ դուրս են գալիս Վուդբերիից։ Դիքսոնները որոշում են չվերադառնալ բանտ և երկուսով հեռանում են։

Բանտում Կարլը փրկում է զոմբիների հետ պայքարի մտած մարդկանց մի խմբի՝ ոմն Թայրիզի (Չադ Քոլմեն) գլխավորությամբ, սակայն զգուշության համար նրանց փակում է առանձին սենյակում՝ մինչև հոր վերադարձը։ Երբ Ռիքը վերադառնում է իր խմբի հետ, նա ծանոթանում է Թայրիզի հետ, սակայն հանկարծակի տեսնում է կնոջ՝ Լորիի ուրվականը, ինչը նրան ցնորության է հասցնում։ Հաջորդ օրը Ռիքը սկսում է թափառել բանտի ցանկապատերից դուրս՝ ամեն տեղ նշմարելով հանգուցյալ կնոջ միրաժային պատկերը, այդ պատճառով Գլենն է որոշում ստանձնել խմբավարի պաշտոնը։ Անսպասելիորեն ժամանում է Կառավարիչը և կրակահերթ բացում բանտի ուղղությամբ՝ սպանելով Աքսելին՝ գոյատևած վերջին բանտարկյալին։ Կառավարչի աշխատակիցներից մեկը բեռնատար մեքենայով ջարդում է բանտը շրջապատող ցանկապատի դարպասները և թափքի միջից դուրս բերում զոմբիների զանգված։ Այդ ամենից հետո Կառավարիչը նստում է օգնականի մեքենան և հեռանում։ Դերոլն ու Մեռլը վերադառնում են բանտ և օգնում ընկերներին։

Ռիքը վերադառնում է հայրենի քաղաք՝ զենք փնտրելու։ Այնտեղ Ռիքը գտնում է իր կյանքը փրկած Մորգանին։ Ռիքը պարզում է, որ Մորգանի որդի Դուեյնը մահացել էր։ Ռիքը փորձում է համոզել Մորգանին միանալ իրեն, սակայն Մորգանը գերադասում է մնալ մեկուսացված քաղաքում։

Անդրեային հաջողվում է չեզոք գոտում հանդիպում ստեղծել Կառավարչի և Ռիքի միջև։ Բանակցությունների ժամանակ Կառավարիչը տեղեկացնում է Ռիքին, որ զինադադար կկնքի միայն այն պայմանով, եթե Ռիքը նրան հանձնի Միշոնին։ Կառավարիչը Ռիքին 3 օր մտածելու ժամանակ է տալիս, և եթե 3 օր անց Միշոնը չբերվի նրանց հանդիպման վայր, ապա դա կընդունվի որպես բացասական պատասխան։ Իրականում, սակայն Կառավարիչը գաղտնիորեն պատրաստվում էր համակիրների հետ հարձակվել բանտի վրա։ Անդրեան իմանում է և փախչում է բանտի ուղղությամբ՝ որպեսզի տեղեկացնի Ռիքին Կառավարչի դավադրության մասին, սակայն վերջինս բռնում և ետ է բերում նրան։ Անդրեային շղթայում են երկաթյա աթոռի վրա և փակում մութ խցում։

Մեռլը տեղեկանում է առաջնորդների խոսակցության մասին և և մինչ Ռիքի որոշում կայացնելը ինքն է Միշոնին առևանգում։ Երկար ճանապարհ միասին քայլելով և միասին դիմակայելով զոմբիների հարձակմանը, Մեռլը Միշոնին ազատ է արձակում և մեն-մենակ գնում հանդիպման վայրը, որտեղ Կառավարիչը գնդակահարում է նրան։ Ավելի ուշ Դերոլը գտնում է եղբոր զոմբիացված մարմինը, որը դանդաղորեն սկսում է մոտենալ, սակայն Դերոլը ծանր ապրումներից հետո սպանում է Մեռլի քայլող մարմինը։

Կառավարիչը մի քանի անգամ դանակահարում է իր նախկին խորհրդատու Միլթոնին և նրա կիսամեռ մարմինը թողնում Անդրեայի խցում՝ որպեսզի վերջինս զոմբի վերածվելուց հետո հարձակվեր անպաշտպան Անդրեայի վրա։

Կառավարիչն իր մարդկանցից մի քանիսի հետ հարձակվում է բանտի վրա, սակայն Ռիքի խումբը կարողանում է այնպիսի հակահարված տալ, որ ագրեսորները ետ նահանջեն։ Նահանջի ճանապարհին Կառավարիչը հորդորում է կրկին հարձակվել, սակայն մարդիկ հրաժարվում են, ինչին ի պատասխանը Կառավարիչը մեկ առ մեկ գնդակահարում է բոլորին, բացի Քերենից, որը թաքնվում է դիակների տակ և մեռած ձևանում։ Այնուհետև Կառավարիչը երկու հավատարիմ թիկնապահների՝ Մարտինեսի և Բոումենի հետ նստում է մեքենան և ուղևորվում անորոշ ուղղությամբ։ Քիչ անց դեպքի վայր են ժամանում Ռիքը, Դերոլն ու Միշոնը և գտնում Քերենին։ Ռիքի խումբը Քերենի հետ ուղևորվում է Վուդբերի։ Վուդբերիի բարիկադներում նրանց է միանում Թայրիզը և նրա քույր Սաշան (Սոնեքուա Մարտին-Գրին)։ Միացումից հետո նրանք հայտնաբերում են Անդրեաին, որը չնայած կարողացել էր սպանել Միլթոնի զոմբիին, սակայն Միլթոնը հասցրել էր կծել նրան։ Անդրեան վերցնում է Ռիքի ատրճանակը և մնալով Միշոնի հետ մենակ՝ կրակում է իր գլխին՝ որպեսզի չդառնա զոմբի։

Եթերաշրջանի վերջին դրվագում երևում է, թե ինչպես է Վուդբերիի խաղաղ բնակչությունը տեղափոխվում բանտ, իսկ Կառավարչի ճակատագիրը մնում է անհայտ։

Չորրորդ եթերաշրջան

Չորրորդ եթերաշրջանի դեպքերը մեկնարկում են նախկինի ավարտից մի քանի ամիս անց։ Վուդբերիի նախկին բնակիչների տեղափոխումից հետո կյանքը բանտում համեմատաբար խաղաղվում է։ Որոշակի էմոցիոնալ խնդիրների պատճառով Ռիքն ամիսներ առաջ հայտարարել էր առաջնորդի պարտականություններից հեռանալու մասին։ Ռիքին փոխարինելու համար ձևավորվել էր հատուկ խորհուրդ։ Բանտի խաղաղ կյանքը շուտով խաթարվում է գրիպանման մահացու վարակի տարածման պատճառով։ Վարակը սպանում է բազմաթիվ բնակիչների։ Շուտով վարակվում ու կարանտինացվում է նաև Քերենը (որը Թայրիզի հետ սիրավեպ էր սկսել)։ Որոշ ժամանակ անց Քերենը և մեկ այլ բնակիչ սպանվում ու այրվում են։ Պարզելով, որ կատարվածը նրանց սպանել է Քերոլը, Ռիքն արտաքսում է նրան դեպի այլ բնակավայր։ Շուտով որոնողական խումբը վերադառնում է դեղորայքով։

Միևնույն ժամանակ, արխիվային կադրով ցուցադրվում է, թե ինչպես ձախողված հարձակումից հետո վերջին զինվորները (Մարտինեզ և Շամպերտ) լքում են Կառավարչին, որը հաջորդ օրը մեկնում է զոմբիներով վխտացող Վուդբերի և ամբողջովին այրում առանց այդ էլ մեռյալ բնակավայրը։ Արխիվային կադրերից հետո ցույց է տրվում, թե ինչպես է Կառավարիչն աննպատակ քայլում ավերակների միջով։ Ի վերջո, Կառավարիչը հասնում է մի փոքր բնակավայր՝ ծանոթանալով Չեմբլերների ընտանիքի հետ, որը բաղկացած էր Լիլի և Թերա քույրերից՝ նրանց անբուժելի հիվանդ հայր Դեյվիդից և Լիլիի դուստր Մեգանից։ Կառավարիչը դրական անձ է ձևանում և ընտանիքի համար կատարում մի շարք բարի գործեր։ Դեյվիդի մահից հետո Չեմբլերները Կառավարիչի հետ լքում են բնակարանը։ Շուտով Կառավարիչը հանդիպում է նախկին հանձնակատար Մարտինեզին, որը դարձել էր մի խումբ փրկվածների առաջնորդը։ Կառավարչին հաջողվում է գաղտնի սպանել Մարտինեզին՝ այն ներկայացնելով որպես դժբախտ պատահար։ Ստանձնելով նոր խմբավարի պաշտոնը, Կառավարիչը խմբի անդամներին պատրաստում է դեպի բանտ նոր հարձակման։

Բանտի ցանկապատերից դուրս Կառավարիչը հայտնաբերում է Միշոնին և Հերշելին, որոնց պատանդ է վերցնում։ Շուտով նորաստեղծ բանակի հետ Կառավարիչը ժամանում է բանտի դարպասների մոտ՝ պատվիրելով Ռիքին և մնացածին հանձնվել և հեռանալ բանտից, հակառակ դեպքում կսպանի պատանդներին։ Հրաժարվելով հանձնվելուց, Ռիքն առաջարկում է միավորվել և կռվելու փոխարեն բանտի ներսում միասին ապրել։ Կանխազգալով, որ առաջարկությունը կարող է որոշակիորեն հրապուրել իր մարդկանց, Կառավարիչն անմիջապես Միշոնի կատանա սրով գլխատում է Հերշելին, ինչին հաջորդում է խմբավորումների փոխհրաձգությունը։ Միևնույն ժամանակ փոքրիկ Մեգանը ստանում է զոմբիական խայթ։ Կառավարիչը սառնասրտորեն կրակում է Մեգանի գլխին։ Շուտով խմբավորումների առաջնորդներն ընդհարվում և բռնվում են դաժան ձեռնամարտի։ Կառավարիչը քիչ է մնում սպանի Ռիքին, սակայն ազատված Միշոնը կատանայով խորը վնասվածք է հասցնում նրան։ Ի վերջո, Կառավարիչը սպանվում է Լիլիի գնդակից։ Չնայած հարձակումը փաստացիորեն ձախողվում է, սակայն բանտ են մտնում հազարավոր քայլողներ։

Հրաձգություններից հետո խմբի անդամները ցրվում են։ Յուրաքանչյուր ենթախումբ ճանապարհին ընդհարվում է որոշակի խոչընդոտների։ Երկաթուղային ճանապարհի ողջ երկայնքով հերոսները հանդիպում են ցուցատախտակների, որոնք անցորդներին հրավիրում էին դեպի Տերմինուս՝ «պատսպարան բոլորի համար»։ Շուտով Ռիքին և Կարլին է միանում Միշոնը, Քերոլը գտնում է Թայրիզին (որը դեռ տեղյակ չէր, որ հենց Քերոլն է սպանել իր սիրելիին)։ Քերոլը և Թայրիզը խնդիրներ են ունենում էմոցիոնալ խանգարումներ ունեցող Լիզիի հետ, որը սպանում է կրտսեր քրոջը՝ Միկային։ Փոքրիկ Ջուդիթի և մյուսների անվտանգության համար Քերոլը սպանում է Լիզիին։ Ի վերջո Քերոլը խոստովանում է, որ ինքն է սպանել Քերենին՝ որպեսզի կանխի վարակի տարածումը։ Չնայած նախկինում Թայրիզը խոսք էր տվել անձամբ հաշվեհարդար տեսնել սիրեցյալի մարդասպանի հետ, նա ներում է Քերոլին։ Բեթը, որը Դերոլի հետ պատսպարվել էր սգո ծառայության գրասենյակում, զոմբիների հարձակման ժամանակ առևանգվում է անհայտ անձնանց կողմից։ Մեգին, Սաշան և Բոբ Ստուկին (որը խմբին միացել էր հարձակումներից ընդամենը մեկ շաբաթ առաջ) ճանապարհորդում են միասին։ Բոբը և Սաշան սիրահարված էին միմյանց։ Գլենն իր հերթին թիմակցում է Թերային։ Բանտից փախչելուց հետո Գլենը և Թերան հանդիպում են Զինված ուժերի սերժանտ Աբրահամ Ֆորդին, Ռոզիտա Էսպինոսային և գիտնական Յուջին Պորտերին։ Նոր խումբն ուներ առաքելություն հասնելու մայրաքաղաք Վաշինգտոն և պարզելու, թե արդյոք ինչ-որ բան մնացել է կառավարությունից։ Յուջինը պնդում է, որ գիտի, թե ինչն է զոմբիական ապոկալիպսիսի պատճառը, սակայն չի կարող ոչինչ ասել մինչև չհասնի Վաշինգտոն, քանի որ տեղեկությունը հույժ գաղտնի է։ Ճանապարհին Գլենի և Մեգիի խմբերը միավորվում են։ Նորաստեղծ խումբն առաջինն է ժամանում Տերմինուս, որտեղ նրանց է ողջունում Մերի անունով կին՝ հյուրերին սնունդ առաջարկելով։

Միևնույն ժամանակ, Բեթին կորցնելուց հետո Դերոլը հանդիպում է հանցագործ խմբավորման՝ ոմն Ջոյի առաջնորդությամբ։ Ջոն թույլ է տալիս Դերոլին միանալ իրենց, սակայն եթե վերջինս հետևի խմբավորման կոդեքսներին, որոնք խախտելու դեպքում նրան կսպասվեր դաժան պատիժ՝ ընդհուպ մինչև մահ։ Խմբավորումը շուտով պատանդ է վերցնում Ռիքին, Միշոնին և Կարլին՝ փորձելով վրեժ լուծել նախկին ընդհարման համար, որի հետևանքով Ռիքը խեղդել էր Ջոյի մարդկանցից մեկին։ Շուտով տեղ է հասնում Դերոլը և ի վերջո Ռիքի հետ սպանում բոլորին։ Դերոլի հետ միավորվելուց հետո Ռիքի խումբն ուղևորվում է դեպի Տերմինուս։ Տերմինուսում նրանց են դիմավորում մի շարք մարդիկ՝ հավաստիացնելով, որ հյուրերն ապահով վայրում են։ Այնուամենայնիվ, շուտով Ռիքը նկատում է, որ որոշ տերմինուսցիներ կրում են Հերշելի ժամացույցը, Գլենի զրահաբաճկոնը և Մեգիի թիկնոցը, ինչի պատճառով ընդհարում է տեղի ունենում։ Ուժերի խիստ անհավասարության պատճառով Ռիքի խումբը ստիպված է լինում հանձնվել, իսկ Տերմինուսի առաջնորդ Գարեթը պատվիրում է նրանց փակել գնացքի վագոնում։ Ռիքի խումբը վագոնում միավորվում է Գլենի և Մեգի խմբերի հետ։ Եթերաշրջանն ավարտվում է Ռիքի խոսքերով. «Շուտով նրանք հիմարների պես կզգան իրենց, երբ պարզեն, որ սխալ մարդկանց հետ են գործ բռնել»։

Հինգերորդ եթերաշրջան

Խմբին հաջողվում է փախչել Տերմինուսից այն բանից հետո, երբ օգնության է հասնում Քերոլը և տերմինուսցիների վրա բաց թողնում զոմբիների մի ամբողջ բազմություն, ինչպես նաև տեղանքում մեծ պայթյուն առաջացնում, ինչն էլ ավելի շատ զոմբիների է գրավում։ Թայրիզի և Ջուդիթի հետ վերամիավորվելուց հետո խումբը ճանապարհին քայլողների հարձակումից փրկում է եկեղեցական քահանա Գաբրիել Սթոքսին։ Շուտով խումբն ընդհարվում է Գարեթի և կենդանի մնացած փոքրաթիվ տերմունուսցիների հետ, որոնք առևանգում են Բոբին, կտրում նրա ոտքը և կրակի վրա եփելուց հետո ուտում այն։ Խումբը Բոբին առաջարկում է միանալ իրենց և շարունակել ուտել մարդկանց միս կամ լինել իրենց ուտելիքը, սակայն Բոբը ստացել էր քայլողի խայթոց, երբ նրանք իմանում են այդ մասին Բոբին բաց են թողնում։ Տերմինուսցիները փորձում են ահաբեկել Ռիքի խմբին, սակայն շուտով ոչնչացվում են։ Աբրահամ Ֆորդն ու Ռոզիտա Էսպինոսան որոշում են շարունակել Յուջինին մայրաքաղաք Վաշինգտոն հասցնելու առաքելությունը։ Նրանց են միանում Գլենը, Մեգին և Թերան։ Մի քանի անգամ մեռյալների հսկայական ամբոխների հետ ընդհարվելուց հետո Յուջինն ի վերջո խոստովանում է, որ խաբել է բոլորին և ամենևին էլ գիտնական չէ և պարզապես հորինել էր այդ ամենը, որպեսզի իրեն պաշտպանեն։ Միևնույն ժամանակ Դերոլն ու Քերոլը հետևում են դեպի Ատլանտա ուղևորվող մեքենայի, որն իր ետնամասում ուներ նույն նշագիծը, ինչ այն մեքենան, որով առևանգել էին Բեթին։ Շուտով պարզվում է, որ Բեթը պահվում է մոտակայքում գտնվող մի հիվանդանոցում, որոնք փրկում էին մարդկանց կյանքը, հետո նրանց պարտավորում միանալ հիվանդանոցի անձնակազմին իրենց փրկելու համար։ Քերոլը ընկնում է նրանց մեքենայի տակ և նրան տանում են, իսկ Դերոլը հավաքում է բոլորին, որպեսզի գրոհի։ Նրանք մի քանի ոստիկանների են պատանդ վերցնում, որպեսզի փոխանակեն Բեթի հետ։ Փոխանակումն ավարտվում է Բեթի մահվանով։ Շուտով Թայրիզը ստանում է քայլողի խայթոց, Ռիքը և Միշոնը կտրում են նրա ձեռքը, սակայն նա մահանում է արյուն կորցնելու պատճառով։ Մի ամիս անց Ռիքին և մնացածին մոտենում է մի տղա, որը երկար ժամանակ հետևել է խմբին, և հայտնում, որ նա ունի ապահով ճամբար, որի մարդիկ ունեն Ռիքի մարդկանց կարիքը։ Սկզբում Ռիքը չի վստահում նրան և չի ցանկանում գնալ այնտեղ, սակայն մյուսները նրան մտափոխում են։ Շուտով ամբողջ խումբը սկսում է ապրել այնտեղ, յուրաքանչյուրն ունենում է աշխատանք։ Դիանա անունով կինը լինում է այդ ճամբարի գլխավորը և խմբի բոլոր անդամների հետ առանձին զրուցում է, նրա ամուսինը շատ այլ մարդկանց օգնությամբ կառուցել էր երկար պատ, որը պահպանում էր նրանց թաղամասը քայլողներից։ Դիանան խմբին տրամադրում է երկու մեծ առանձնատուն։

Դերերում

Հեռուստասերալի դերասանական և պրոդյուսերական կազմերի մի մասը Սան Դիեգոյի Կոմիկ-կոն ամենամյա իրադարձության ժամանակ (2012)

Գլխավոր

Դերասան	Կերպար	Եթերաշրջան
		1	2	3	4
Էնդրյու Լինքոլն	Ռիք Գրայմս
Ջոն Բերնթալ	Շեյն Ուելշ			Կամեո
Սառա Ուեյն Քելիս	Լորի Գրայմս
Լորի Հոլդեն	Անդրեա
Ջեֆրի Դեման	Դեյլ Հորվաթ
Սթիվեն Յան	Գլեն Ռի
Չենդլեր Ռիգս	Կարլ Գրայմս
Նորման Ռիդուս	Դերոլ Դիքսոն	Երկրորդական
Մելիսա Մակբրայդ	Քերոլ Պելետիեր	Երկրորդական
Մայքլ Ռուքեր	Մեռլ Դիքսոն	Երկրորդական	Հյուր
Լորեն Կոուեն	Մեգգի Գրին		Երկրորդական
Սկոտ Ուիլսոն	Հերշել Գրին		Երկրորդական
Դանայ Գուրիրա	Միշոն		(եզրափակիչ դրվագ)
Էմիլի Քինի	Բեթ Գրին		Երկրորդական
Դեյվիդ Մորիսի	Ֆիլիպ Բլեյք/Կառավարիչ
Չադ Քոլմեն	Թայրիզ			Երկրորդական
Սոնեքուա Մարտին-Գրին	Սաշա			Երկրորդական
Լարի Գիլիարդ կրտսեր	Բոբ Ստուկի

Երկրորդական

Դերասան	Կերպար	Եթերաշրջան
		1	2	3
Այրոն Սինգլթոն	Թեոդոր Դուգլաս (Թի Դոգ)
Մեդիսոն Լինտզ	Սոֆիա Պելետիեր
Էմմա Բել	Էմմի			Հնչյունավորում
Ջերիլ Փրեսքոթ	Ջեքի			Հնչյունավորում
Էնդրյու Ռոթենբերգ	Ջիմ			Հնչյունավորում
Ադամ Մինարովիչ	Էդ Պելետիեր		Հյուր
Խուան Գաբրիել Պարեհա	Մորալես
Ջեյն Մաքնեյլ	Պատրիցիա
Ջեյմս Ալլեն Մակքյուն	Ջիմմի
Մայքլ Զեգեն	Ռենդալ Կուլվեր
Լյու Թեմփլ	Ակսել
Վինսենթ Ուորդ	Օսկար
Դալաս Ռոբերթս	Միլթոն Մամեթ
Խոսե Պաբլո Կանտիլլո	Սեզար Մարտինեզ

Ռեժիսորի կապը դերասանների հետ

«Քայլող մեռյալների» ռեժիսոր Ֆրենկ Դարաբոնտը նախկինում արդեն համագործակցել էր դերասաններից մի քանիսի հետ, որոնք են Լոուրի Հոլդենը, Ջեֆրի Դեմանը, Մելիսա Մակբրայդը, Սեմ Ուիթվերը և Խուան Գաբրիել Պարեհան։ Նախևառաջ բոլոր թվարկվածները հանդես էին եկել 2007 թվականին նկարահանված «Մառախուղ» ֆիլմում։ Լոուրի Հոլդենը Ջիմ Քերրիի հետ նկարահանվել էր Դարաբոնտի «Մաժեստիկ» ֆիլմում (2001)։ Ջեֆրի Դեմանը նույնպես նկարահանվել է Դարբոնտի բազմաթիվ ֆիլմերում, բացի այդ հանդես է եկել նաև այնպիսի հոլիվուդյան բլոքբաստերներում, ինչպիսիք են «Փախուստ Շոուշենկից» (1994) և «Կանաչ մղոն» (1999) ֆիլմերը։ Սեմյուել Ուիթվերը առաջին եթերաշրջանում մարմնավորում էր մահացած զինվորի դերը, ում զոմբիին սպանում է Ռիքը՝ փակված լինելով տանկի մեջ^[8]։

Թողարկում

Սառա Ուեյն Քելիսը և Էնդրյու Լինքոլնը 2010-ին

Հեռուստասերիալի պրեմիերան Միացյալ Նահանգներում տեղի է ունեցել «AMC» հեռուստաալիքով՝ 2010 թ.-ի հոկտեմբերի 31-ին։ Նահանգներից դուրս պրեմիերան կայացել է «Fox International» հեռուստաալիքով՝ նոյեմբերի առաջին շաբաթում^[9]։

Առաջին եթերաշրջանի DVD և Blu-ray տարբերակներով սկավառակները լույս են տեսնում 2011 թ.-ի մարտի 8-ին^[10]։ Եվրոպայի համար նախատեսված սկավառակները ենթարկվում են հավելյալ մշակման, և որոշ արյունալի դրվագներ մոնտաժվում են^[11]։

Ծանոթագրություններ

1. Fernsehserien.de (գերմ.)
2. Moviepilot (գերմ.) — 2006.
3. ČSFD (չեխերեն) — 2001.
4. Internet Movie Database — 1990.
5. ««Քայլող մեռյալները» մեկնարկում է հելոուինի օրը». AMCtv.com. 2010 թ․ օգոստոսի 24. Արխիվացված է օրիգինալից 2018 թ․ դեկտեմբերի 25-ին. Վերցված է 2010 թ․ օգոստոսի 24-ին.
6. Հիբբերդ, Ջեյմս (2012 թ․ հոկտեմբերի 15). ««Քայլող մեռյալների» պրեմիերան դառնում է այս աշնան բլոքբաստերը». «Էնթերթեյնմենթ վիքլի». Արխիվացված է օրիգինալից 2014 թ․ հուլիսի 19-ին. Վերցված է 2012 թ․ Հոկտեմբերի 15-ին.
7. Սլեզակ, Մայքլ (2015 թ․ հուլիսի 10). «Վախեցեք քայլող մեռյալներից հեռուստասերիալի թրեյլերը (ինչպես նաև պրեմիերայի ամսաթիվը)». TVLine. Վերցված է 2015 թ․ հուլիսի 10-ին.
8. Մարնել, Բլեյր (2012 թ․ հունվարի 5). «AMC-ի «Քայլող մեռյալները» սերիալ վեբիզոդները». «Քրեյվ օնլայն». Արխիվացված է օրիգինալից 2012 թ․ հունվարի 10-ին. Վերցված է 2012 թ․ Ապրիլի 1-ին.
9. «Սերիա 1 - «Անցած օրեր»». tvb.com. Արխիվացված է օրիգինալից 2012 թ․ մարտի 22-ին. Վերցված է 2011 թ․ օգոստոսի 31-ին.
10. ««Քայլող մեռյալները». առաջին եթերաշրջանի DVD-ներն արդեն հասանելի են, պատվերները կատարել նախօրոք». AMC. 2010 թ․ դեկտեմբերի 2. Արխիվացված է օրիգինալից 2013 թ․ հուլիսի 9-ին. Վերցված է 2010 թ․ Դեկտեմբերի 6-ին.
11. ««Քայլող մեռյալները»,(համեմատություն` եվրոպական տարբերակ - ամերիկյան տարբերակ)». Movie-Censorship.com. Վերցված է 2011 թ․ օգոստոսի 1-ին.

Արտաքին հղումներ

• Պաշտոնական կայք(անգլ.)
• Ֆեյսբուքյան էջ
• Թվիթթերյան էջ

Վիքիպահեստն ունի նյութեր, որոնք վերաբերում են «Քայլող մեռյալները (հեռուստասերիալ)» հոդվածին։