Փեթրոնաս աշտարակներ

Փեթրոնաս աշտարակներ, 88-հարկանի երկնաքերներ։ Գտնվում են Մալայզիայի մայրաքաղաք Կուալա Լումպուրում։ Շենքերի նախագծմանը մասնակցել է նաև Մալայզիայի վարչապետ Մահաթհիր Մոհամադը, ով առաջարկել է դրանք կառուցել իսլամական ոճով^[1]։ Աշտարակների հատակագծերն ութածայր աստղեր են, որոնց ավելացվել են կիսաշրջաններ՝ ամրության համար^[2]։ 1998-2004 թթ. համարվում էին աշխարհի ամենաբարձր շինությունները։

Փեթրոնաս աշտարակներ
Petronas Towers
արտաքին տեսքը
Տեղագրություն	Կուալա Լումպուր
Կառուցման ժամանակ	1992–1998
Բարձրություն
Ծայրաձող	451,9 մ
Տանիք	378,6 մ
Վերջին հարկ	375,0 մ
Տեխնիկական պարամետրներ
Հարկերի թիվ	88
Տարածքը շինության մեջ	395,000 քառ․ մ
Փեթրոնաս աշտարակներ (Մալայզիա)
Տեղեկություններ SkyscraperPage կայքում

Շինարարությունը

Շինարարությունը տևել է 6 տարի (1992-1998)։ Աշտարակները կառուցել են երկու տարբեր ընկերություններ, մրցակցություն և արդյունավետություն ապահովելու համար։ Աշտարակների կառուցման ընթացքում պետք է օգտագործվեին միայն Մալայզիայում արտադրվող շինանյութեր, այնպես որ հնարավոր չէր ապահովել պողպատի բավարար քանակ։ Շինարարության համար պատրաստվել է հատուկ, շատ ամուր և միաժամանակ էլաստիկ բետոնի մի տեսակ, որը հնարավոր եղավ արտադրել Մալայզիայում։ Այս պատճառով շինությունը ստացվեց 2 անգամ ծանր, քան նմանատիպ շենքերը, որոնցում օգտագործվել էր պողպատ։ 16000 պատուհանների լվացումը տևում է մեկ ամիս։ Աշխատակիցների քանակը 10000 է։ Կառույցի հիմքը բետոնի հատուկ տեսակ է, որը կվարցի ավելացման շնորհիվ դիմանում է 137 Մպա ճնշմանը։ Շինարարության ընթացքում շինարարները ստիպված են եղել քանդել մեկ հարկ, վատ որակի բետոնի պատճառով։

Երկու աշտարակները պատվիրել է Մալայզիայի «Փեթրոնաս» պետական նավթային ընկերությունը՝ նպատակ ունենալով կառուցելու աշխարհի ամենաբարձր շինությունը։ 1998 թվականին, երբ ավարտվեց 1,5 մլրդ ԱՄՆ դոլար արժողության շինարարությունը, 88 հարկանի աշտարակները իսկապես աշխարհի ամենաբարձր շենքերն էին և մնացին որպես այդպիսին մինչև 2003 թվականը, երբ Չինաստանի 101 հարկանի 1527 ոտնաչափ (509 մ) բարձրություն ունեցող Թայփեին դրանցից խլեց այդ տիտղոսը։ Աշտարակների սալարկավոր հատակը նախագծված է իսլամական ճարտարապետության երկրաչափական սկզբունքների հիման վրա, ինչը արտացոլում է ճարտարապետի՝ ավանդականը արդիականի հետ միավորելու ցանկությունը։ 180 ոտնաչափ (60 մ) բարձրության վրա կառուցված կամուրջը երկու շենքերը իրար է միացնում 41-րդ և 42-րդ հարկերում, որտեղ կա դիտահրապարակ հանրության համար։ «Փեթրոնասը» զբաղեցնում է աշտարակներից մեկը, իսկ մյուսը հիմնականում տրամադրվել է միջազգային ընկերությունների։ Երկու աշտարակներ էլ վեր են խոյանում Կուալա Լումպուրի կենտրոնական զբոսայգու գեղեցիկ միջավայրում՝ ձևավորելով քաղաքի անզուգական հորիզոնը^[3]։

Բնութագրեր

Շենքերն աչքի են ընկնում իրենց չափսերով և կառուցման բարդությամբ։ Աշտարակների ներսի բոլոր տարածքների ընդհանուր մակերեսը կազմում է 213750 քառ. մ, իսկ գետնին զբաղեցրած մակերեսը՝ 40 հեկտար։ Փեթրոնաս աշտարակներում կան գրասենյակներ, ցուցասրահներ, կոնֆերանս դահլիճներ, պատկերասրահ և այլն։ Գլխավոր պատվիրատուի՝ «Փեթրոնաս» ընկերության ծախսերը կազմել են մոտ 800 միլիոն դոլլար։ Կառուցման որոշ ծախսերն իրենց վրա են վերցրել այլ ընկերություններ, որոնք ունեին տարածքներ աշտարակներում։ Աշտարակները միացված են կամրջի տեսք ունեցող փակ անցումով։

Այցելությունները

Զբոսաշրջիկներին թույլատրվում է շենք մտնել խիստ գրաֆիկով։ Աշխատանքային օրերին աշտարակներ մտնել կարելի է 9:00-17:00։ Տոմսերը վաճառվում են ժամը 8:30-ից սկսած։ Աշտարակներով անցկացվում են մինի-էքսկուրսիաներ, որոնք իրենց մեջ ներառում են տեղեկություններ շինության մասին, այցելություն շենքերի մեջտեղի կամուրջ և 86-րդ հարկում գտնվող տեսահարթակ։ Էքսկուրսիան արժի 32 դոլլար։ Առանց ուղեկցորդի տեսահարթակ մտնել չի թույլատրվում։

Մշակույթում

Փեթրոնաս աշտարակները երևում են մի շարք ֆիլմերում ու խաղերում՝

• Քեթրին Զետա-Ջոնսի և Շոն Քոններիի մասնակցությամբ «Թակարդ» ֆիլմում^[4]
• Hitman 2: Silent Assasin խաղում (որոշ գործողություններ կատարվում են աշտարակներից մեկում)^[5]
• «Ապոկալիպսիսի գաղտնաբառը» ֆիլմում
• «Կյանքը մարդկանցից հետո» վավերագրական ֆիլմաշարում (մարդկանց վերացումից 75 տարի անց ընկնում է շենքերի մեջտեղի կամուրջը, իսկ 500 տարի անց փլվում է աշտարակներից մեկը, ընթացքում բախվելով երկրորդին, այդպիսով ոչնչացնում է ողջ համալիրը)։

Ծանոթագրություններ

1. Wee, C. J. Wan-Ling, April Stonghold, James Parpan Almeda (2002). Local cultures and the "new Asia": the state, culture, and capitalism in Southeast Asia. Institute of Southeast Asian Studies. p. 193.
2. Moskal, Greg (2004). Modern Buildings: Identifying Bilateral and Rotational Symmetry. New York: Rosen Classroom. էջ 28. ISBN 0-8239-8989-5.
3. Մարկ Տրուման, Աշխարհի Հրաշալիքները, 100 ամենատեսարժան վայրերն աշխարհում
4. «Filming Locations for Entrapment». imdb.com. Internet Movie Database. Վերցված է 2012 թ․ հոկտեմբերի 21-ին.
5. «Hitman 2 Silent Assassin Prima Official eGuide». Scribd.com. 2012 թ․ դեկտեմբերի 26. Վերցված է 2013 թ․ հունիսի 14-ին.

Արտաքին հղումներ

• Փեթրոնաս աշտարակների պաշտոնական կայքը Արխիվացված 2011-07-19 Wayback Machine
• Petronas Tower 1 Արխիվացված 2012-05-24 Wayback Machine CTBUH Skyscraper Center-ում
• Petronas Tower 2 Արխիվացված 2012-06-19 Wayback Machine CTBUH Skyscraper Center-ում
• Introduction and Overview of the Petronas Towers Արխիվացված 2011-07-17 Wayback Machine
• Design and construction of the Petronas Towers Արխիվացված 2007-11-12 Wayback Machine

Վիքիպահեստն ունի նյութեր, որոնք վերաբերում են «Փեթրոնաս աշտարակներ» հոդվածին։