From Wikipedia, the free encyclopedia
Ջոնի Քարսոն (անգլ.՝ John William «Johnny» Carson, հոկտեմբերի 23, 1925[1][2][3][…], Corning, Այովա, ԱՄՆ[4] - հունվարի 23, 2005[1][3][5][…], Վեսթ Հոլիվուդ, Լոս Անջելես շրջան, Կալիֆոռնիա, ԱՄՆ), ամերիկացի լրագրող, հեռուստահաղորդավար և ռեժիսոր։ Առավել հայտնիություն է ստացել որպես NBC հեռուստաալիքի «The Tonight Show» հեռուստահաղորդման բազմամյա հաղորդավար։ Նա 5 անգամ վարել է «Օսկար» մրցանակաբաշխությունը[8]։ 1987 թվականին Քարսոնը ներառվել է Հեռուստատեսության փառքի սրահում։
| Ջոնի Քարսոն | |
|---|---|
 | |
| Ծնվել է | հոկտեմբերի 23, 1925[1][2][3][…] |
| Ծննդավայր | Corning, Այովա, ԱՄՆ[4] |
| Մահացել է | հունվարի 23, 2005[1][3][5][…] (79 տարեկան) |
| Մահվան վայր | Վեսթ Հոլիվուդ, Լոս Անջելես շրջան, Կալիֆոռնիա, ԱՄՆ |
| Քաղաքացիություն |  ԱՄՆ |
| Մայրենի լեզու | անգլերեն |
| Կրթություն | Լինկոլնի անվան Նեբրասկայի համալսարան |
| Մասնագիտություն | սպա, հեռուստահաղորդավար, դերասան, լրագրող, սցենարիստ, գրող, թատրոնի դերասան, ձեռնածու-աճպարար, կատակերգու, ռազմական գործիչ և հեռուստատեսային դերասան |
| Ամուսին | Jody Morrill Wolcott?, Joanne Copeland?, Joanna Holland? և Alexis Maas? |
| Ծնողներ | հայր՝ Homer Lee Carson?[6], մայր՝ Ruth Hook?[6] |
| Պարգևներ և մրցանակներ | |
| Կայք | johnnycarson.com |
Ստորագրություն | |
 Johnny Carson Վիքիպահեստում | |
Ջոնի Ուիլիամ Քարսոնը ծնվել է 1925 թվականի հոկտեմբերի 23-ին Այովա նահանգի Քորնինգ քաղաքում՝ էներգետիկայի ընկերության մենեջեր Հոմեր Լոյդ Քարսոնի (1899-1983) և իռլանդական ծագմամբ Ռուֆի Էլիզաբեթ Քարսոնի (1901-1985) ընտանիքում։ Մանկությունն անցկացրել է Այովայի հարավ-արևմուտքում քաղաքից քաղաք տեղափոխվելով, մինչև ութ տարեկան հասակում վերջնականապես բնակություն է հաստատել Նորֆոլկում։
Այնտեղ Քարսոնը սկսել է զարգացնել իր տաղանդը՝ իրեն և իր մտերիմներին զվարճացնելու համար։
12 տարեկանում փոքրիկ Ջոնին ընկերոջ տանը մոգության մասին մի գիրք է գտել և իսկույն փոստով պատվիրել է աճպարարի հավաքածու, ինչից հետո սկսել է մշակել իր քարտային հնարքները՝ դրանք ցույց տալով իր ընտանիքին։ Ավելի ուշ սկսել է գումար վաստակել՝ ելույթ ունենալով տարբեր տոնավաճառներում։ Միջնակարգ դպրոցն ավարտելուց հետո նա ավտոստոպով հասել Է Հոլիվուդ, որտեղ ձերբակալվել և տուգանվել է 50 դոլար՝ ոստիկանության աշխատակցին վիրավորելու համար։
1943 թվականի հունիսի 8-ին Ջոնին միացել է ԱՄՆ ռազմածովային նավատորմին և V-12 ռազմածովային ուժերի սպաների նախապատրաստման ծրագիր է անցել Կոլումբիայի համալսարանում ու «Millsaps» քոլեջում։ Պատերազմի վերջում նա տեղափոխվել է Խաղաղ օվկիանոսում գտնվող USS Փենսիլվանիա գծանավ, որտեղ բռնցքամարտի սիրահարների շրջանում 10 խաղ է անցկացրել՝ հաղթելով բոլորը։
Ավելի ուշ նրա նավն ուղարկվել է մարտական գործողությունների գոտի, սակայն Հիրոսիմայի և Նագասակիի ատոմային ռմբակոծումներով պատերազմը ավարտվել է։ Պատերազմից հետո նա երկար ժամանակ զբաղեցրել է կապի սպայի պաշտոնը, որը պատասխանատու էր տվյալների վերծանման համար։
Հարցազրույցներից մեկում նա ասել է, որ իր ռազմական կարիերայի գլխավոր իրադարձությունը ԱՄՆ ռազմածովային ուժերի նախարար Ջեյմս Ֆորեստոլի առաջ մոգական հնարքի կատարումն է եղել։ Ֆորեստոլի հետ զրույցում նախարարը հարցրել է երիտասարդ սպային, արդյոք նա մտադիր է մնալ նավատորմում պատերազմից հետո։ Քարսոնը բացասական պատասխան է տվել և հայտնել, որ ուզում է կախարդ դառնալ։ Ֆորեստոլը խնդրել է նրան ելույթ ունենալ, և Քարսոնը ցույց է տվել իր քարտային հնարքները։
Բանակում ծառայելուց հետո ժամանակը չկորցնելու համար նա օգտվել Է ռազմածովային ուժերի կրթական հնարավորություններից և ընդունվել է Նեբրասկա Լինքոլնի համալսարան, որտեղ միացել է «Phi Gamma Delta» եղբայրությանը՝ շարունակելով մոգական հնարքներ ցուցադրել։ Այնտեղ նա սկսել է խորապես ուսումասիրել լրագրություն՝ հումորային գրող դառնալու լուրջ մտադրությամբ։ Նրա ավարտական աշխատանքը վերնագրվել է «Ինչպես գրել զավեշտական կատակներ»։ Այն բանաքաղություն էր՝ ներկայացված Ջոնիի հետ ռադիոշոուներում ձայնագրված կատակներից, որտեղ նա բացատրում էր կադրից դուրս ձայնի զավեշտական տեխնիկան։ 1949 թվականին նա ստացել է ռադիոյի և խոսքարվեստի բակալավրի աստիճան (ֆիզիկայի լրացուցիչ մասնագիտացմամբ)։
Նրա հաղորդումը թողարկվել է 1962-1992 թվականներին[9]։ «Այն ուժեղ էր ոչ միայն հաղորդավարներով, այլև հեռուստադիտողի համար անտեսանելի խմբագիրների աշխատանքով»[10]։
Ծրագրի ռեժիսորներն էին Դիկ Քարսոնը, Ֆրեդերիկ Դե Կորդովան, Ջերի Լյուիսը։
Ծրագրի սցենարիստներն էին Ջեյ Լենոնը, Ջիմ Մալհոլանդը, Նիկ Արնոլդը, Ջո Բիգելոուն և Դիկ Քարսոնը։
Հաղորդմանը մասնակցել են Ջորջ Սիգալը, Ռիչարդ Դին Անդերսոնը, Ջիմ Աբրահամսը, Ջերի Ցուկերը, Դեյվիդ Ցուկերը, Ալան Քինգը, Դելա Ռիզը, Բեթի Ուայթը, Բիլ Քոսբին, Բոբ Նյուհարթը, Բեն Վերին, Ռոբերտ Բլեյքը,, Վալերի Հարպերը, Օլիվիա Նյուտոն Ջոնը, Ֆրեդի Պրինցը, Բոբ Հոուփը, Ջեյ Լենոն, Ջոան Ռիվերսը, Դոնալդ Ջեյ Ռիքլսը, Դեյվիդ Լեթերմանը, Ստիվ Մարտինը, Էդ ՄակՄահոնը, Հելեն Ռեդդին, Ջուլի Լոնդոնը, ՄակԼին Սթիվենսոնը, Մայքլ Ջեյ Ֆոքսը, Ֆլիպ Ուիլսոնը, Լոլա Ֆալանան, Ֆրանս Նույեն։
Որպես դերասան՝ Քարսոնը նկարահանվել է «Ջիմի Քարթեր։ Մարդը մեծ հարթավայրերից» և «Առաջին հիսուն տարիներ՝ փակ հայացք» ֆիլմերում[11]։
Քարսոնը ամբողջ կյանքի ընթացքում ամուսնացած է եղել չորս անգամ։ 1949-1963 թվականներին նրա կինը եղել է Ջոան Մորիլը, 1963-1972 թվականներին՝ Ջոաննա Քոուփլենդը, 1972-1985 թվականներին՝ Ջոան Հոլենդը։ Նրա վերջին կինը՝ Ալեքսանդրա Մեսը, նրա կողքին է եղել 1987 թվականից մինչև նրա մահը։ Ջոան Մորիլի հետ ամուսնությունից ունեցել է երեք որդի՝ Քրիստոֆերը, Քորին և Ռիչարդը։
Ջոնի Քարսոնը մահացել է 2005 թվականի հունվարի 23-ին 80 տարեկանում Մալիբուի իր սեփական տանը։ Դիակիզված է։
Հայտնի է հետաքրքրական մի դրվագ, երբ Քարսոնին խնդրել են իր համար տապանագիր ընտրել, առանց երկար մտածելու Ջոնին կրկնել է այն արտահայտությունը, որը հազարավոր անգամներ ասել է իր շոուի գովազդային մասերից առաջ՝ «մի հեռացեք, ես շուտով կվերադառնամ»։
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
