Կենդանիների հյուսվածքներ
From Wikipedia, the free encyclopedia
From Wikipedia, the free encyclopedia
Կենդանիների հյուսվածքներ, բջիջների համակարգ կենդանիների օրգանիզմում, որոնք ընդհանուր ծագում ունեն և բնորոշվում են ընդհանուր ձևաբանաֆիզիոլոգական հատկություններով։ Կախված հիմնական ֆունկցիայից, կառուցվածքի և զարգացման առանձնահատկություններից՝ տարբերում են սահմանային կամ էպիթելային, շարակցային, ոսկրային, աճառային, մկանային, նյարդային և հեղուկ հյուսվածքներ։ Օրգանների կառուցվածքի մեջ մտնում են տարբեր հյուսվածքներ։
Էպիթելային հյուսվածքին՝ էպիթելին, բնորոշ է բջիջների խիտ շերտավոր համախմբությունը։ Դրանցից են գոյանում մարմնի ծածկույթները և ներքին օրգանների թաղանթները։ Կատարում է պաշտպանման, ներծծման, հյութազատման, արտազատման ֆունկցիաներ, ծածկում է մարմնի արտաքին մակերևույթը, մարսողական, շնչառական և սեռական օրգանների, միզատար ուղիների խոռոչը, առաջացնում գեղձեր։
Շարակցական հյուսվածքը բնորոշվում է ինչպես բջիջների առկայությամբ, այնպես էլ միջբջջային կառուցվածքներով։ Դրանք հիմնականում կատարում են սնուցողական, պաշտպանման և հենարանային ֆունկցիաներ։ Այդ հյուսվածքներից են արյունը, ավիշը, բուն շարակցային հյուսվածքը, ռեթիկուլային, ճարպային, աճառային և ոսկրային հյուսվածքները։
Ոսկրային հյուսվածքը կազմված է ոսկրային բջիջներից, անօրգանական (հիմնականում՝ կալցիումի) աղերով ներծծված հիմնական նյութից, որը ոսկրին տալիս է ամրություն, և օրգանական նյութերից, որոնցով պայմանավորված են ոսկրի ճկունությունն ու առաձգականությունը։
Աճառային հյուսվածքն իրենից ներկայացնում է միջբջջային նյութում ամփոփված աճառային բջիջների խմբեր (հիալինային, թելքավոր և առաձգական)։
Մկանային հյուսվածքը ստորաբաժանվում է հարթ և միջաձիգ զոլավոր (վերջինները՝ կմախքայինի և սրտայինի)։ Հարթ մկանային հյուսվածքը ձևավորում է ներքին օրգանների, գեղձերի ծորանների և արյան անոթների պատերի մկանային շերտերը, միջաձիգ զոլավորը՝ կմախքային մկանունքը։ Այդ մկանների կծկումներն առաջացնում են ամբողջ օրգանիզմի կամ առանձին օրգանների շարժումներ։
Նյարդային հյուսվածքը կազմված է նյարդաբջիջներից (նեյրոններ), որոնք կատարում են ընկալման ու գրգիռների հաղորդման ֆունկցիաներ, և նեյրոգլիայից, որը կատարում է սնուցողական, մեխանիկական և պաշտպանման ֆունկցիաներ։ Տարբեր հյուսվածքների և օրգանների համաձայնեցված գործունեությունը պայմանավորված է նյարդային և ներզատական համակարգերով։
Հեղուկ հյուսվածքներից է արյունը, որը կազմված է պլազմայից, և նրա մեջ գտնվող արյունային մարմնիկներից։
Այս հոդվածի կամ նրա բաժնի որոշակի հատված վերցված է «Գյուղատնտեսական հանրագիտարանից», որի նյութերը թողարկված են՝ Քրիեյթիվ Քոմմոնս Նշում-Համանման տարածում 3.0 (Creative Commons BY-SA 3.0) թույլատրագրի ներքո։ |
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.