Արամ MP3

Արամ Ավետիքի Սարգսյան (ապրիլի 5, 1984(1984-04-05)^[1], Երևան, Հայկական ԽՍՀ, ԽՍՀՄ), ավելի հայտնի է որպես Արամ MP3, հայ երգիչ-երգահան, հումորիստ, շոումեն և դերասան։ 2014 թվականի մայիսին Դանիայի մայրաքաղաք Կոպենհագենում ներկայացնելով Հայաստանը Եվրատեսիլ 2014 երգի մրցույթում իր «Not Alone» երգով` զբաղեցրել է 4-րդ հորիզոնականը։

Վիքիպեդիայում կան հոդվածներ Սարգսյան ազգանունով այլ մարդկանց մասին։

Արամ MP3
Ի ծնե անուն	Արամ Ավետիքի Սարգսյան
Ծնվել է	ապրիլի 5, 1984(1984-04-05)[1] (40 տարեկան) Երևան, Հայկական ԽՍՀ, ԽՍՀՄ
Երկիր	ԽՍՀՄ և  Հայաստան
Ժանրեր	փոփ
Մասնագիտություն	հեղինակ-կատարող, շոումեն, երգիչ, կատակերգու, կիթառահար, ստեղնահար և ՈՒՀԱ-ի խաղացող
Գործիքներ	վոկալ, դաշնամուր և կիթառ
Աշխատավայր	Շանթ հեռուստաընկերություն
Կրթություն	Երևանի Մխիթար Հերացու անվան Պետական Բժշկական Համալսարան
Ստորագրություն
Aram Mp3 Վիքիպահեստում

Վաղ կյանք

Արամ Ավետիքի Սարգսյանը ծնվել է 1984 թվականի ապրիլի 5-ին Երևանում։ Դեռ մանկուց նա ներգրավված է եղել մի շարք երգչախմբերում և թատերական ներկայացումներում։ Թեև նա միշտ երազել է մեծ բեմի մասին, սակայն ընտրել է դեղագործի մասնագիտությունը՝ ավարտելով Երևանի պետական բժշկական համալսարանը։

Կարիերա

Ուսանողական տարիներին Արամը մասնակցում էր «ՈւՀԱ» հումորային ծրագրի շոուներին։ 2006 թվականին Արամը դառնում է «32 ատամ» հումորային ակումբի անդամը, որտեղ էլ իր գործընկերներից մեկը՝ Վահագն Գրիգորյանը, նրան անվանել է MP3, և նա որոշում է դարձնել այն իր բեմական կեղծանունը^[2]։ 2007 թվականին Արամը ճանաչվում է հաղթող «Հանրային հեռուստաընկերության» «2 աստղ» մրցույթում։

Արամը կատարում է իր «Not Alone» երգը Եվրատեսիլ 2014-ի բեմում

Համագործակցելով «Շանթ» հեռուստաընկերության հետ՝ նա վարել է այդ հեռուստաընկերության «Իքս-Ֆակտոր», «Հայ Սուպերսթար», «Իմ անունն է», «10-ի ուժը» և այլ նախագծեր։ Արամը հանդիսացել է «Վիտամին ակումբ» հումորային նախագծի անդամ, որը հեռարձակվում էր յուրաքանչյուր շաբաթ «Շանթ» հեռուստաընկերությամբ։ «Հանրային հեռուստաընկերությունում» Գարիկ Պապոյանի հետ վարել է "Լավ երեկո" հաղորդումը։ Նա նույնիսկ եղել է «Վելո MP3»-ի հաղորդավար, որտեղ ինքը հեծանիվով բացահայտում էր Հայաստանի չբացահայտված վայրերը։

Եվրատեսիլ 2014 երգի մրցույթ

Հիմնական հոդված՝ Հայաստանը Եվրատեսիլ 2014 երգի մրցույթում

2013 թվականի դեկտեմբերի 31-ին «Հանրային հեռուստաընկերության» Ամանորյա գլխավոր ծրագրի ընթացքում հայտարարվեց, որ ներքին ընտրությամբ Արամն ընտրվել է Եվրատեսիլ 2014 երգի մրցույթում Հայաստանի ներկայացուցիչ^[3]։ Փետրվարի 21-ին հայտնի դարձավ, որ Եվրատեսիլում Հայաստանը ներկայացնելու համար Հանրային հեռուստաընկերությունը 75 երգ է ստացել հայ և արտասահմանյան երգահաներից, սակայն նրա երգը հայտնի կդառնա մարտ ամսին^[4]։ Մարտի 14-ին հայտարարվում է, որ մրցույթում Արամը կատարելու է «Not Alone» երգը^[5]։ Մայիսի 6-ին Կոպենհագենի «B&W Hallerne» արենայում անցկացված Եվրատեսիլ 2014 թվականի առաջին կիսաեզրափակչի քվեարկությունից հետո Արամը հեռուստադիտողի և ժյուրիի քվեարկության արդյունքում 4-րդ հորիզոնականով անցնում է եզրափակիչ փուլը^[6]։ Մայիսի 10-ին մրցույթի եզրափակիչ փուլի քվեարկության արդյունքում նա զբաղեցնում է 4-րդ հորիզոնականը՝ 174 միավորով։

Անձնական կյանք

2008 թվականին Արամը ամուսնացել է Աննա Մարգարյանի հետ։ 2011 թվականի հունիսին զույգը ունեցել է իրենց առաջնեկին^[7], որդու անունը Առնո են դրել։ Մյուս որդին՝ Դավիթը լույս աշխարհ է եկել 2017 թվականի հոկտեմբերին^[8]։

Սկավառակագրություն

Սինգլներ

• «Positive» (Շպռոտի հետ) (2008)
• «Shine» (2013)
• «If I Tried» (2013)
• «Just Go On» (2013)
• «Not Alone» (2014)
• «Help» (2014)
• «Magic» (2014)
• «You're My Sunshine» (2015)
• «Ասա» (2016)
• «Դաշտերով» (Իվետա Մուկուչյանի հետ) (2017)
• «Սկսում ենք» (3.33-ի հետ) (2017)
• «Ալաբալանիցա» (2019)
• «Հանինա» (2019)
• «Կուզես» (2019)
• «Հերիք Եղավ» (2020)
• «Հերոս տղերք» (Արամեի, Արաբո Իսպիրյանի, Միհրան Ծառուկյանի, Մկրտիչ Արզումանյանի և Արսեն Սաֆարյանի հետ) (2020)
• «Քոչարի» (3.33-ի հետ) (2020)
• «Թամզարա» (Գուրգեն Դաբաղյանի հետ) (2021)
• «Սիրո Նվեր» (Սոնա Ռուբենյանի հետ) (2021)
• «Мир Спешит к Добру» (Սոնա Ռուբենյանի, Էրիկ Կարապետյանի, Անի Վարի, Մարիամ Մերաբովաի, Լիլիթ Հովհաննիսյանի և Մարգարիտա Պոզոյանի հետ) (2021)
• «Արև» (Սարո Թովմասյանի հետ) (2021)
• «Կհամոզեմ» (2021)
• «Սիրո հասակ» (2021)
• «Քնել չկա» (2022)
• «Ռեքվիեմ» (Ֆորշի հետ) (2022)
• «Նոր տարի» (2022)
• «Լսիր» (2023)
• «Դեպի բարձունք» (2023)
• «Ամառ է Երևանում» (Գարիկ Մարտիրոսյանի հետ) (2023)
• «Շատ ապրես, Երևան» (2023)
• «Առաջ-առաջ հայեր» (2023)
• «Հոլի պես» (2023)
• «Գալիս ես» (2023)

Ծանոթագրություններ

1. Discogs — 2000.
2. «Արամ mp3-ն սկզբում չէր սիրում իր անունը». The Armenian Times. 2008 թ․ դեկտեմբերի 9. Արխիվացված է օրիգինալից 2014 թ․ մայիսի 8-ին. Վերցված է 2014 թ․ հունվարի 2-ին.
3. Omelyanchuk, Olena. «Aram Mp3 to represent Armenia in Copenhagen». European Broadcasting Union. Վերցված է 2014 թ․ հունվարի 1-ին.
4. «Eurovision 2014's Armenian representative's song is chosen». Panorama.am. Վերցված է 2014 թ․ փետրվարի 21-ին.
5. Brey, Marco. «Aram MP3 to sing "Not Alone" for Armenia». European Broadcasting Union. Վերցված է 2014 թ․ մարտի 14-ին.
6. Roxburgh, Gordon. «The ten winners from tonight's show». European Broadcasting Union. Վերցված է 2014 թ․ մայիսի 6-ին.
7. «Արամ MP3». Bravo.am. 2011 թ․ հունիս.
8. «Ծնվել է Արամ MP3–ի երկրորդ զավակը». Sputnik Արմենիա — news. Վերցված է 2022 թ․ հուլիսի 6-ին.

Վիքիպահեստն ունի նյութեր, որոնք վերաբերում են «Արամ MP3» հոդվածին։