Jan Pawoł Nagel

Jan Pawoł Nagel (* 8. meje 1934 we Łazu jako Horst Nagel; † 21. meje 1997 w Złyčinje) bě serbski komponist kaž tež předsyda Domowiny mjez 1991 a 1992.

Narowny kamjeń Jana Pawoła Nagela na Łazowskim kěrchowje

Narosće na burskim statoku swojeju staršeju Pawoła (1903–82) a Marty Nagelec (1907–77). Hižo w starobje 14 lět bě kantor Łazowskeje wosady, pozdźišo studowaše na Němskej wysokej šuli za hudźbu w Berlinje a bě wot 1964 za dwě lěće chórowy nawoda w Serbskim ludowym ansamblu. Wot 1966 dźěłaše jako swobodny komponist. Za čas NDR bě předsyda dźěłoweho kruha serbskich hudźbnych wědomostnikow. W lěće 1986 załoži wón Klub Handrija Zejlerja za Złyčin, Łaz, Bjedrichecy a Drěwcy, předchadnik dźensnišeho Spěchowanskeho towarstwa Dom Zejlerja a Smolerja we Łazu. Na druhej hłownej zhromadźizny serbskeho třěšneho zwjazka po přewróće we Wětrowskim Kulturnym domje bu ze 94 wot cyłkownje 183 hłosow za předsydu Domowiny woleny.

Jan Pawoł Nagel bě w druhim mandźelstwje woženjeny z awtorku Elke Nagel, kotraž wuda jeho twórby wot 1991 w jeje nakładnistwje ENA. Wón bu na Łazowskim kěrchowje pochowany.

Wotkaz

• Jan Pawoł Nagel – Literatura w katalogu Němskeje narodneje biblioteki (němsce)

Předsydźa Domowiny

Arnošt Bart (1912–1927) • Jakub Šewčik (1927–1930) • Jan Křižan (1930–1933) • Pawoł Nedo (1933–1950) • Kurt Krjeńc (1951–1973) • Jurij Grós (1964–1990) • Bjarnat Cyž (1990–1991) • Jan Pawoł Nagel (1991–1992) • Jakub Brankačk (1993–2000) • Jan Nuk (2000–2011) • Dawid Statnik (wot 2011)