Sonja Wölkowa
serbska slawistka a sorabistka / From Wikipedia, the free encyclopedia
Dr. habil. Sonja Wölkowa (rodź. Michałkec; * 08. meje 1956 w Bad Dübenje) je serbska slawistka a sorabistka.
Wona narodźi so jako dźowka rěčespytnika Frida Michałka w Bad Dübenje pola Lipska a studowaše wot 1974 do 1978 pólsku rěč a literaturu při uniwersiće Adama Mickiewicza w Poznanju a dźěłaše potom hač do lěta 1991 jako wědomostna sobudźěłaćerka při Centralnym instituće za rěčespyt Akademije wědomosćow NDR w Berlinje. 1989 bu z dźěłom wo serbskej frazeologiji promowowana. Wot 1992 do 1996 bě wědomostna sobudźěłaćerka Instituta za sorabistiku w Lipsku a wot meje 1997 wědomostna sobudźěłaćerka we rěčespytnym wotrjedźe Serbskeho instituta w Budyšinje, hdźež běše wot 2001 do 2014 nawodnica wotrjada za rěčespyt. 2002 bu habilitowana z dźěłom wo stawiznach serbskeho gramatikopisa.
Hłowne slědźenske wobłuki Sonje Wölkoweje su serbska frazeologija, dialektologija a rěčne stawizny kaž tež stilistika hornjoserbšćiny, stawizny sorabistiki a leksikografija.
Sonja Wölkowa je předsydka hornjoserbskeje rěčneje komisije, čłonka redakcije Lětopisa a čłonka komisije za Słowjanski rěčny atlas a komisije za gramatisku strukturu słowjanskich rěčow při Mjezynarodnym komiteju slawistow.